డబుల్‌ కా మీఠా.. డబుల్‌ మెజారిటీ..
వెంకయ్య విజయంపై వాజ్‌పేయీ ఛలోక్తి
ఈనాడు, దిల్లీ:  అది 1983. భారతీయ జనతా పార్టీ ఆవిర్భవించి అప్పటికి మూడేళ్లే. పార్టీ అధ్యక్షుడు వాజ్‌పేయీ. 1978లో జనతా పార్టీ తరఫున నెల్లూరు జిల్లా ఉదయగిరి స్థానంతో ఆంధ్రప్రదేశ్‌ శాసనసభకు ఎన్నికైన ప్రస్తుత ఉప రాష్ట్రపతి వెంకయ్యనాయుడు... అయిదేళ్ల పాటు కాంగ్రెస్‌ను ఉక్కిరిబిక్కిరి చేశారు. మరోసారి ఆయన 1983లో భాజపా నుంచి అదే బరిలో నిలిచారు. అప్పుడే ఎన్టీఆర్‌ తెలుగుదేశాన్ని స్థాపించి కాంగ్రెస్‌కు సవాల్‌ విసిరారు. తమ కంచుకోట ఆంధ్రప్రదేశ్‌ను ఎలాగైనా నిలబెట్టుకోవాలని కాంగ్రెస్‌ ఆరాటం. ఓ వైపు ఎన్టీఆర్‌,  మరోవైపు నాటి ప్రధానమంత్రి ఇందిరాగాంధీ సభలతో రాష్ట్రం హోరెత్తుతోంది. ఉదయగిరిలో వెంకయ్యనాయుడిని ఓడించడమే ధ్యేయంగా ఆ జిల్లాకు చెందిన కాంగ్రెస్‌ నేత నేదురుమల్లి జనార్దన్‌రెడ్డి రంగంలోకి దిగారు. ఇందిరాగాంధీతో ఉదయగిరిలో భారీ బహిరంగ సభ ఏర్పాటు చేయించారు.రాజకీయాలు మొత్తం తెదేపా, కాంగ్రెస్‌ల మధ్య కేంద్రీకృతం కావడంతో భాజపా నాయకుల్లో ఓటమి భయం మొదలైంది. ఎట్టి పరిస్థితుల్లోనూ వాజ్‌పేయీ సభ ఏర్పాటు చేయించాలని వెంకయ్యనాయుడుపై ఒత్తిడి పెంచారు. గెలుపుపై విశ్వాసం ఉన్న ఆయన సమ్మతించ లేదు. విషయం వాజ్‌పేయీకి తెలిసి, ఫోన్‌ చేసి అడిగారు. గెలుస్తానని ఆయన ధీమా వ్యక్తంచేశారు. ‘ఇబ్బందిపడొద్దు. నేను వస్తాను, తేదీ చెప్పండి’ అంటూ వాజ్‌పేయీ చివరకు బహిరంగ సభ తేదీ ఖరారుచేశారు.. ఆ తర్వాత అదే రోజు ఇందిర సభ నిర్ణయమైంది.ప్రధానమంత్రి కావడం వల్ల ఆమె సభ ముందుగా ఉండాలని కాంగ్రెస్‌ నేతలు పట్టుపట్టడంతో, అదే ముందు నిర్వహించారు. వాజ్‌పేయీ మద్రాస్‌ నుంచి ఉదయగిరికి కారులో వచ్చి,. సభలో ప్రసంగించారు. ఉదయగిరికి చెందిన ఓ ముస్లిం నేత తమ ఇంట మిఠాయి తినాలని కోరారు. అక్కడ ‘డబుల్‌ కా మీఠా’ను చూసి దాని తయారీ విధానం తెలుసుకున్న వాజ్‌పేయీ ‘‘నేను డబుల్‌ కా మీఠా తింటా. మీరు వెంకయ్యకు గత ఎన్నికలతో పోల్చితే డబుల్‌ మెజారిటీ తెస్తారా’’ అని ప్రశ్నించారు. ఎన్నికల తర్వాత తన విజయ వార్తను ఫోన్‌లో చెబితే  వాజ్‌పేయీ పెద్దగా నవ్వారంటూ... ఇటీవల వెంకయ్యనాయుడు గుర్తుచేసుకున్నారు.

కథనాలు

జిల్లా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.