అభ్యర్థులతో కేసీఆర్‌ భేటీ రేపు
పార్టీ ఎన్నికల వ్యూహంపై దిశానిర్దేశం చేయనున్న తెరాస అధినేత
హామీలపై అవగాహన, ప్రచారానికి సూచనలు
ఈనాడు - హైదరాబాద్‌
తెలంగాణ రాష్ట్ర సమితి ఎన్నికల వ్యూహంపై అభ్యర్థులకు పార్టీ అధినేత, ముఖ్యమంత్రి కేసీఆర్‌ స్వయంగా దిశానిర్దేశం చేయనున్నారు. వారితో ఆదివారం(ఈ నెల 21న) తెలంగాణ భవన్‌లో మధ్యాహ్నం 2.30గంటలకు సమావేశం కానున్నారు. తెరాస మొదటి విడత జాబితా కింద 105 మంది అభ్యర్థులను ప్రకటించిన విషయం తెలిసిందే. ఆ తర్వాత కేసీఆర్‌ వారితో ఫోన్‌లో మాట్లాడుతూ ప్రచారంపై సూచనలు ఇస్తున్నారు. అభ్యర్థుల ప్రచారసరళి, పార్టీ బలాబలాలు, ఇతర అంశాలపై సర్వేలు నిర్వహిస్తూ వాటి ఫలితాలను విశ్లేషిస్తున్నారు. తాజాగా తెరాస ఎన్నికల పాక్షిక ప్రణాళికను ప్రకటించారు. ఇందులో మళ్లీ రైతు రుణమాఫీ, నిరుద్యోగ భృతి, ఆసరా పింఛన్ల పెంపు, రైతుబంధు సాయం తదితర హామీలు ఇచ్చారు. ఈ నేపథ్యంలో అభ్యర్థులకు వాస్తవ పరిస్థితులపై అవగాహన కల్పించడంతోపాటు స్థానికంగా లోటుపాట్లు, ఇతర అంశాలపై వారిని అప్రమత్తం చేయడానికి సమావేశం ఏర్పాటు చేసినట్లు తెలిసింది. 105 నియోజకవర్గాల్లో తాజా సర్వే ఫలితాలను ఆయన వెల్లడించనున్నట్లు సమాచారం. మరోవైపు అభ్యర్థుల అభిప్రాయాలు, ఇతర అంశాలను తెలుసుకోవడంతోపాటు అసమ్మతి వాదులు, అసంతృప్తులకు సంబంధించిన అంశాలు, పార్టీ శ్రేణులతో సమన్వయం ఇతర అంశాలను చర్చించే అవకాశం ఉన్నట్లు తెలిసింది. సమావేశం అనంతరం కొంతమంది అభ్యర్థులతో కేసీఆర్‌ ముఖాముఖి సమావేశం కానున్నట్లు సమాచారం. తెరాస ప్రకటించిన తాజా హామీలతో కూడిన ప్రచార సామగ్రిని సైతం అందజేయనున్నారు. పార్టీ సామాజిక మాధ్యమాల బృందం వాటి వినియోగంపై అభ్యర్థులకు శిక్షణ ఇవ్వనుంది. అభ్యర్థులను ప్రకటించని 14 స్థానాలకు సంబంధించి ఆయా నియోజకవర్గాల ముఖ్య నేతలను ఈ సమావేశానికి ఆహ్వానించారు. ఎన్నికలకు సంబంధించి కీలక సమావేశమైనందున మంత్రులు, ఎంపీలను కూడా ఈ సమావేశానికి ఆహ్వానించారు.

మళ్లీ కేసీఆర్‌ పర్యటనలు
ముఖ్యమంత్రి కేసీఆర్‌ నియోజకవర్గాల పర్యటనలు ఈవారం నుంచి తిరిగి ప్రారంభం కానున్నాయి. ఈనెల 6న వనపర్తి పర్యటన తర్వాత బతుకమ్మ, దసరా ఉత్సవాలు ఉండడంతో సీఎం క్షేత్రస్థాయి పర్యటనలకు వెళ్లలేదు. దసరా ముగియడంతో ఆయన ఈనెల 21న పార్టీ అభ్యర్థులతో సమావేశం నిర్వహించనున్నారు. అదేరోజు నియోజకవర్గాలవారీగా పర్యటనల వివరాలను వెల్లడించే అవకాశం ఉంది. దీనిపై ఇప్పటికే నేతలతో చర్చలు జరిపారు. మరోవైపు అభ్యర్థుల అభిప్రాయాలను కోరుతున్నారు. ఇందులో భాగంగా శుక్రవారం పాలకుర్తి మాజీ ఎమ్మెల్యే ఎర్రబెల్లితో ఫోన్‌ మాట్లాడారు. ఈ సందర్భంగా తన నియోజకవర్గానికి రావాలని ఎర్రబెల్లి అభ్యర్థించగా పరిశీలిస్తానని సీఎం చెప్పారు. ఈనెల 22 లేదా 23 నుంచి రోజుకు రెండూ లేదా మూడు నియోజకవర్గాల చొప్పున సీఎం పర్యటించే వీలుంది.

సీఎం దసరా పూజలు
దసరాను పురస్కరించుకొని గురువారం ప్రగతిభవన్‌లోని నివాసంలో, పోచమ్మ ఆలయంలో ప్రత్యేక పూజలు చేశారు. కేసీఆర్‌ సతీమణి శోభ, కోడలు శైలిమ, మనవడు హిమాన్ష్‌, మనవరాలు అలేఖ్య తదితరులు పాల్గొన్నారు.

ముఖ్యాంశాలు

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.