కృష్ణా దీవుల్లో గోల్ఫ్‌ కోర్సు!
యూఏఈకి చెందిన బీఎల్‌ఎఫ్‌తో సీఆర్‌డీఏ ఎంఓయూ
రాజధాని ప్రాజెక్టుల పురోగతిపై ఏపీ సీఎం చంద్రబాబు సమీక్ష
ఫిల్మ్‌, టీవీ ఇన్‌స్టిట్యూట్‌కు సహకరించాలన్న నిర్మాత డి.సురేష్‌బాబు
ఈనాడు, అమరావతి: ఆంధ్రప్రదేశ్‌ రాజధాని అమరావతికి పక్కనే కృష్ణా నదిలోని రెండు దీవుల్లో 18 హోల్స్‌ గోల్ఫ్‌కోర్సు, కన్వెన్షన్‌ సెంటర్‌, హోటళ్లు, రిసార్టులు, విల్లాలు అభివృద్ధి చేసేందుకు యునైటెడ్‌ అరబ్‌ ఎమిరేట్స్‌(యూఏఈ)కు చెందిన బిజినెస్‌ లీడర్స్‌ ఫోరం(బీఎల్‌ఎఫ్‌) ముందుకొచ్చింది. ముఖ్యమంత్రి చంద్రబాబు సమక్షంలో గురువారం బీఎల్‌ఎఫ్‌, రాజధాని ప్రాంత అభివృద్ధి ప్రాధికార సంస్థ(సీఆర్‌డీఏ) మధ్య అవగాహన ఒప్పందం(ఎంఓయూ) కుదిరింది. కృష్ణానదిలో ఒక దీవిలో 399, మరో దీవిలోని 99 ఎకరాల్లో ఈ ప్రాజెక్టు అమలు చేయాలన్నది ప్రతిపాదన. ఒప్పందంపై బీఎల్‌ఎఫ్‌ అధ్యక్షుడు రామ్‌బుక్సానీ, సీఆర్‌డీఏ కమిషనర్‌ చెరుకూరి శ్రీధర్‌ సంతకాలు చేశారు. రాజధాని ప్రాజెక్టుల పురోగతిపై ముఖ్యమంత్రి సీఆర్‌డీఏ, అమరావతి అభివృద్ధి సంస్థ(ఏడీసీ) అధికారులతో గురువారం సమీక్షించారు. కృష్ణా నదిలో మొత్తం 14 దీవుల్లోనూ ఏడింటి అభివృద్ధికి వీలుందని అధికారులు వివరించారు. ఏడు దీవుల్లో 3,800 ఎకరాలు అందుబాటులో ఉన్నాయని తెలిపారు. రెండు దీవుల్లో చేపట్టే ప్రాజెక్టులపై స్పష్టమైన ప్రతిపాదనలు, ప్రణాళికలతో రావాలని బీఎల్‌ఎఫ్‌ సంస్థ ప్రతినిధులకు ముఖ్యమంత్రి సూచించారు.
25 ఎకరాల్లో సినీ స్టూడియో!: అమరావతిలోని మీడియా సిటీలో అత్యుత్తమ ప్రమాణాలతో 25 ఎకరాల్లో సినీ స్టూడియో నిర్మాణ ప్రతిపాదనలను అధికారులు వివరించారు. రాజధానిలో తొమ్మిది థీమ్‌సిటీలపై మెకన్సే సంస్థ సిద్ధం చేసిన ప్రాజెక్టు ప్రతిపాదనలపై చర్చ జరిగింది. ప్రతి సిటీకి ఒకటి చొప్పున 9కమిటీలు వేసి సలహాలు తీసుకోవాలని సీఎం అదేశించారు.  మీడియా సిటీ ప్రతిపాదనలపై సినీ నిర్మాత దగ్గుబాటి సురేష్‌బాబు తన ఆలోచనల్ని పంచుకున్నారు. అమరావతిలో ప్రపంచస్థాయి ఫిల్మ్‌, టీవీ శిక్షణ కేంద్రం ఏర్పాటుకు ప్రభుత్వం సహకరించాలని కోరారు.
వ్యాధుల వ్యాప్తి నిరోధకానికి కొత్తరకం సిరంజీలు
ఈనాడు డిజిటల్‌, అమరావతి: హెచ్‌ఐవీ వంటి వ్యాధులను అరికట్టేందుకు హిందుస్థాన్‌ సిరంజి, మెడికల్‌ డ్రగ్స్‌ లిమిటెడ్‌ సంస్థ రూపొందించిన కొత్త రకం సిరంజిలను ముఖ్యమంత్రి చంద్రబాబుఆవిష్కరించారు. వీటిని అన్ని ప్రభుత్వాసుపత్రుల్లోనూ ఉపయోగించాలని అధికారులకు సూచించారు. వ్యాధులు వ్యాప్తి చెందకుండా ఉండేందుకు ఈ తరహా సిరంజిలు ఉపయోగపడతాయన్నారు. రోగికి ఇంజక్షన్‌ చేసిన వెంటనే నిరుపయోగంగా మారడం వీటి ప్రత్యేకత. దేశంలోనే మొదటిసారి ఈ తరహా సిరంజిలను రాష్ట్రంలో వాడుకలోకి తేనున్నారు.  వైద్య, ఆరోగ్యశాఖతో గురువారం సచివాలయంలో ముఖ్యమంత్రి సమీక్షించారు. ఈ సందర్భంగా   ముఖ్యమంత్రి మాట్లాడుతూ.. వైద్య చికిత్సల సమాచారాన్ని సేకరించి  పీహెచ్‌సీల్లో హెల్త్‌ ప్రొఫైల్‌ను రూపొందించాలని ఆదేశించారు.

ముఖ్యాంశాలు

జిల్లా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.