శరణుఘోషే నిరసన మంత్రం
భారీ పోలీసుల బందోబస్తు నడుమ శబరిమల చేరిన ఇద్దరు మహిళలు
అడ్డుకున్న భక్తులు
ఆలయాన్ని మూసివేస్తామని ప్రధాన అర్చకుడి హెచ్చరిక
శబరిమల
బరిమల కొండలు శుక్రవారం ‘స్వామియే శరణం అయ్యప్పా’ అన్న నినాదంతో ప్రతిధ్వనించాయి. ఈ శరణుఘోషను భక్తులు తొలుత నిరసన తెలపడానికి, అనంతరం ఆనందం వ్యక్తం చేయడానికీ ఉపయోగించుకున్నారు. రుతుక్రమ వయసులో ఉన్న ఇద్దరు మహిళలు భారీ పోలీసు బందోబస్తు నడుమ కొండపైకి వచ్చి ఆలయ ప్రవేశానికి ప్రయత్నించడం ప్రస్తుత సమస్యలో కీలక పరిణామంగా మారింది. వారి రాకపై అభ్యంతరం తెలుపుతూ పిల్లలు, వృద్ధులు సహా భక్తులంతా పెద్దయెత్తున శరణుఘోష చేశారు. వారు గర్భగుడి వద్దకు వస్తే ఆలయాన్ని మూసివేస్తామని ప్రధాన అర్చకుడు గట్టిగా హెచ్చరించడం, ఎప్పుడూ లేని విధంగా దాదాపు 35 మంది సహాయ అర్చకులు పూజల్లో పాల్గొనడకుండా ఆందోళనకు దిగడం పరిస్థితి తీవ్రతకు అద్దం పట్టింది. వాస్తవాలను గమనించిన పోలీసులు...భక్తులపై బలప్రయోగం చేసి, స్వామి సన్నిధానం వద్దకు తీసుకెళ్లబోమంటూ ప్రభుత్వం తరఫున ఆ ఇద్దరు మహిళలకు స్పష్టంగా చెప్పడం ఉద్రిక్తతలు తగ్గడానికి మార్గం చూపింది. స్వామి దర్శనం చేస్తామని తొలుత పట్టుపట్టిన ఆ మహిళలు వెనక్కితగ్గడంతో భక్తులు మళ్లీ ఆనందంతో ‘స్వామియే శరణం అయ్యప్పా’ అంటూ నినదించారు.

స్వయంగా తీసుకొచ్చిన ఐజీ
పంబ నుంచి సన్నిధానం వద్దకు వచ్చిన ఇద్దరు మహిళల్లో ఒకరు హైదరాబాద్‌కు చెందిన మోజో టీవీ పాత్రికేయురాలు కవితా జక్కుల (29) కాగా, మరొకరు కేరళలోని కోచికి చెందిన సామాజిక అంశాల ఉద్యమకారిణి రహ్నా ఫాతిమా. నాస్తికవాద భావజాలం ఉన్న రహ్నా బీఎస్‌ఎన్‌ఎల్‌ ఉద్యోగిని కూడా. ఇన్‌స్పెక్టర్‌ జనరల్‌ ఎస్‌.శ్రీజిత్‌ ఆధ్వర్యంలో వందమందికి పైగా పోలీసులు, కమాండోలు ఉన్న బృందం వారిని కొండపైకి తీసుకొచ్చింది. కవిత పోలీసు దుస్తులు, హెల్మెట్‌ ధరించి వెళ్లడం విశేషం. పాత్రికేయ విధులు నిర్వహించడానికే కొండపైకి వెళ్తున్నట్టు ఆమె చెప్పారు. వారు క్యూ లైను అయిన ‘వలియ నాదప్పండాల్‌’ వద్దకు చేరుకోగానే భక్తులు పెద్దపెట్టున శరణుఘోష చేస్తూ నిరసన తెలిపారు.

సహాయ అర్చకుల బైఠాయింపు
ఆ మహిళలను పోలీసులు బంగారు మెట్ల మార్గం ద్వారా ఆలయంలోకి తీసుకొస్తారేమోనన్న అనుమానంతో వాటిపై భక్తులు, ఆలయ ఉద్యోగులు, సహాయ అర్చకులు కూర్చొన్నారు. క్యూలైను వద్ద కూడా భక్తులు బైఠాయించారు. పరిస్థితులు చేజారుతాయని గమనించిన ఐజీ శ్రీజిత్‌ భక్తులతో మాట్లాడారు. తాము చట్టాన్ని అమలు చేస్తున్నామని, భక్తుల మనోభావాలను భంగపరిచే ఉద్దేశం తమకు ఏమాత్రం లేదని స్పష్టం చేశారు. ప్రధాన అర్చకుడు (తంత్రి) చేసిన హెచ్చరికను మహిళలకు చెప్పడంతో వారు తిరిగి వెళ్లిపోవడానికి అంగీకరించారని ప్రకటించడంతో భక్తులు శాంతించారు.

ఇంకో మహిళను, పాత్రికేయురాలిని కూడా..
వారిద్దరినీ పోలీసులు తిరిగి తీసుకెళ్తున్న సమయంలో మరో 46 ఏళ్ల మహిళ పంబ నుంచి సన్నిధానంవైపు వస్తుండడాన్ని గమనించిన భక్తులు ఆమెను వెనక్కి పంపించారు. గురువారం దిల్లీలో న్యూయార్క్‌ టైమ్స్‌ తరఫున పనిచేస్తున్న సుహాసినీ రాజ్‌ (దాదాపు 40 ఏళ్లు)ను భక్తులు తిప్పి పంపించారు. ఆమె తన సహచర ఉద్యోగి అయిన ఓ విదేశీయునితో కలిసి మరక్కూట్టం ప్రాంతం నుంచి సన్నిధానానికి వార్తల సేకరణ నిమిత్తం వెళ్తుండగా భక్తులు అడ్డుకున్నారు.

సుప్రీంకోర్టును ఆశ్రయిస్తాం: టీడీబీ
భక్తుల ఆందోళన కారణంగా నెలకొన్న ఉద్రిక్త పరిస్థితులను సరిదిద్దాలని కోరుతూ సుప్రీంకోర్టు, హైకోర్టులను ఆశ్రయిస్తామని ట్రావన్‌కోర్‌ దేవస్థానం బోర్డు (టీడీబీ) అధ్యక్షుడు పద్మకుమార్‌ తెలిపారు.

పోలీసులు తనిఖీ చేయాలి: మంత్రి
ఈ వ్యవహారంపై కేరళ దేవాదాయ శాఖ మంత్రి కడకంపల్లి సురేంద్రన్‌ రాజధాని తిరువనంతపురంలో విలేకరులతో మాట్లాడారు. పవిత్రమైన శబరిమల బలప్రదర్శనకు, ఉద్యమాలకు వేదిక కాదని సామాజిక ఉద్యమకారులను ఉద్దేశించి వ్యాఖ్యానించారు. ‘సుప్రీంకోర్టు ఆదేశాలను పాటించడం రాష్ట్ర ప్రభుత్వ బాధ్యత. భక్తులకు రక్షణ కల్పిస్తాం తప్ప, ఉద్యమకారులకు కాదు. కొండపైకి వెళ్లాలనుకుంటున్న మహిళల నేపథ్యం ఏమిటన్నదానిపై పోలీసులు తనిఖీ చేసి ఉంటే బాగుండేద’ని అభిప్రాయపడ్డారు.

మూడు రాష్ట్రాలకు కేంద్రం సూచన
శబరిమల సమస్యపై ఆందోళనలు జరుగుతున్న దృష్ట్యా శాంతి భద్రతలపై అప్రమత్తంగా ఉండాలని కేంద్ర హోం శాఖ కేరళ, తమిళనాడు, కర్ణాటక రాష్ట్రాల ప్రభుత్వాలకు సూచించింది. సామాజిక మాధ్యమాల్లో తప్పుడు ప్రచారం జరగకుండా చూడాలని పేర్కొంది.

ముఖ్యాంశాలు

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.