సగర్వంగా రెండోసారి
ముఖ్యమంత్రిగా కేసీఆర్‌ ప్రమాణ స్వీకారం
మహమూద్‌ అలీకి మంత్రివర్గంలో స్థానం
కీలకమైన హోంమంత్రిత్వ శాఖ కేటాయింపు
తరలివచ్చిన అధికార, అనధికార ప్రముఖులు
ఈనాడు - హైదరాబాద్‌
‘‘కల్వకుంట్ల చంద్రశేఖర్‌రావు అనే నేను శాసనం ద్వారా నిర్మితమైన భారత రాజ్యాంగం పట్ల నిజమైన విశ్వాసం, విధేయత చూపుతానని భారతదేశ సార్వభౌమాధికారాన్ని, సమగ్రతను కాపాడతానని తెలంగాణ రాష్ట్ర ముఖ్యమంత్రిగా నా కర్తవ్యాలను శ్రద్ధతో, అంతఃకరణ శుద్ధితో నిర్వహిస్తానని.. భయం కానీ, పక్షపాతం కానీ, రాగద్వేషాలు కానీ లేకుండా రాజ్యాంగాన్ని, శాసనాలను అనుసరించి ప్రజలందరికీ న్యాయం చేకూరుస్తానని దైవసాక్షిగా ప్రమాణం చేస్తున్నాను..’’ అంటూ కేసీఆర్‌ రెండోసారి ముఖ్యమంత్రిగా ప్రమాణ స్వీకారం చేశారు.
గురువారం మధ్యాహ్నం 1.25కి రాజ్‌భవన్‌లో కన్నుల పండువగా జరిగిన కార్యక్రమంలో గవర్నర్‌ నరసింహన్‌ కేసీఆర్‌తో ప్రమాణం చేయించారు. ఆయనతో పాటు మంత్రిగా మహమూద్‌ అలీ కూడా ప్రమాణం చేశారు. కేసీఆర్‌ తెలుగులో ప్రమాణం చేయగా, మహమూద్‌అలీ ఉర్దూలో ప్రమాణం చేశారు. తెరాస ఎమ్మెల్యేలు, నేతలు జై కేసీఆర్‌, జై తెలంగాణ అంటూ పెద్దఎత్తున నినాదాలు చేశారు. వేములవాడ, భద్రాద్రి ఆలయ అర్చకులు కేసీఆర్‌కు ఆశీర్వచనాలు అందజేశారు. ప్రమాణ స్వీకారం అనంతరం సీఎంను, మహమూద్‌అలీని గవర్నర్‌ అభినందించారు. మహమూద్‌ అలీకి సీఎం అత్యంత కీలకమైన హోంమంత్రిత్వ శాఖను కేటాయించడం విశేషం.
ప్రముఖుల సందడి
ఈ కార్యక్రమానికి కొత్తగా ఎన్నికైన తెరాస ఎమ్మెల్యేలు, ఎంపీలు, ఎమ్మెల్సీలు, ప్రభుత్వ ప్రధాన కార్యదర్శి ఎస్‌కే జోషి, డీజీపీ మహేందర్‌రెడ్డి, తెరాస ప్రధాన కార్యదర్శి కె.కేశవరావు, మజ్లిస్‌ అధ్యక్షుడు అసదుద్దీన్‌ ఒవైసీ, గవర్నర్‌ సతీమణి విమలా నరసింహన్‌, సీఎం సతీమణి శోభ హాజరయ్యారు. కేటీఆర్‌, హరీశ్‌రావు, ఎంపీ కవిత కుటుంబ సమేతంగా తరలివచ్చారు. మండలి ఛైర్మన్‌ స్వామిగౌడ్‌, కాంగ్రెస్‌ నేత పొంగులేటి సుధాకర్‌రెడ్డి, శాసనసభ కార్యదర్శి నర్సింహాచార్యులు, జెన్‌కో సీఎండీ ప్రభాకర్‌రావు, సింగరేణి సీఎండీ శ్రీధర్‌, టీఎస్‌ఐఐసీ సీఎండీ వెంకట నర్సింహారెడ్డిలతో పాటు పలువురు ఐఏఎస్‌, ఐపీఎస్‌, ఐఎఫ్‌ఎస్‌ అధికారులు, బేవరేజెస్‌ కార్పొరేషన్‌ ఛైర్మన్‌ దేవీప్రసాద్‌, టీఎన్జీవో అధ్యకుడు కారెం రవీందర్‌రెడ్డి, టీజీవో అధ్యక్షురాలు మమత, గ్రూపు-1 అధికారుల సంఘం అధ్యక్షుడు మామిండ్ల చంద్రశేఖర్‌గౌడ్‌, తెలంగాణ ఉద్యోగుల సంఘం అధ్యక్షుడు పద్మాచారి, పీఆర్‌టీయూ
అధ్యక్ష, ప్రధాన కార్యదర్శులు సరోత్తంరెడ్డి, కమలాకర్‌రావు, ప్రభుత్వ రంగ సంస్థల ఉద్యోగుల సమాఖ్య నేతలు జీటీ జీవన్‌ సీఎంకు శుభాకాంక్షలు తెలియజేశారు. భాజపా  ఎమ్మెల్యే రాజాసింగ్‌ ఈ కార్యక్రమానికి వచ్చి అందరి దృష్టిని ఆకర్షించారు. ప్రమాణ స్వీకారానికి గజ్వేల్‌ నుంచి 100 మంది వచ్చారు.

97 రోజుల తర్వాత కొత్త ప్రభుత్వం
97 రోజుల తర్వాత.. తెలంగాణలో కొత్త ప్రభుత్వం కొలువుదీరింది. సెప్టెంబరు 6న శాసనసభ రద్దయింది. తర్వాత ఈనెల 7న ఎన్నికలు నిర్వహించగా 11న ఫలితాలు వెల్లడయ్యాయి. 88 స్థానాలను సాధించడంతో తెరాసను ప్రభుత్వం ఏర్పాటు చేయాలని గవర్నర్‌ ఆహ్వానించారు. సీఎం ప్రమాణ స్వీకారంతో రాష్ట్రంలో కొత్త ప్రభుత్వం కొలువుదీరినట్లయింది.

సీఎంకు అభినందనలు
ముఖ్యమంత్రి పదవి చేపట్టిన తర్వాత రాజ్‌భవన్‌లో, ప్రగతిభవన్‌లో శాసనసభ్యులు, అధికారులు కేసీఆర్‌ను కలిసి అభినందనలు తెలిపారు. రాష్ట్ర అర్చక సమాఖ్య, తెలంగాణ ఉద్యోగుల సంఘం  సీఎంకు శుభాకాంక్షలు తెలిపింది. ఉద్యోగుల వయోపరిమితిని 61 సంవత్సరాలకు పెంచడం, ఐఆర్‌, పీఆర్‌సీ అమలు, సీపీఎస్‌ను రద్దు చేయడం తదితర సమస్యలను కొత్త ప్రభుత్వం పరిష్కరిస్తుందని సంఘం అధ్యక్షుడు సంపత్‌ కుమారస్వామి ఆశాభావం వ్యక్తంచేశారు.

ముఖ్యాంశాలు

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.