కన్నుమూసిన కర్మయోగి

మాజీ ప్రధాని.. భారతరత్న వాజ్‌పేయీ అస్తమయం
మూడుసార్లు ప్రధానిగా జాతికి సేవలందించిన మహానేత
కవిగా.. రాజనీతిజ్ఞుడిగా.. జనహృదయాల్లో సుస్థిర స్థానం
నేడు స్మృతిస్థల్‌లో ప్రభుత్వ లాంఛనాలతో అంత్యక్రియలు
వారంపాటు సంతాప దినాలు -  జాతీయ పతాకం అవనతం
రాష్ట్రపతి, ఉపరాష్ట్రపతి, ప్రధాని సహా ప్రముఖుల నివాళులు
నేడు సెలవు ప్రకటించిన రాష్ట్ర ప్రభుత్వం
జీవిత ప్రయాణంలో మృత్యువు ఎప్పుడొస్తుందో తెలియదు..
అందుకే దానిపై పోరాటానికి సిద్ధపడి లేను..
కానీ ఇప్పుడు మృత్యువుతో పోరాటం అనివార్యం...
మరణం నన్ను భయపెట్టడానికి ప్రయత్నిస్తోంది...
అయినా పోరాడకుండా ఓటమిని అంగీకరించను..
ఓ మృత్యువా దొంగలా అడుగుల సవ్వడి లేకుండా రావద్దు..
రా! ఎదురుగా వచ్చి పోరాడు..
..అంటూ తన కవిత్వంలో చెప్పినట్లుగానే మరణంతో ధైర్యంగా పోరాడి
అనంత లోకాలకు వెళ్లిపోయారు మాజీ ప్రధానమంత్రి అటల్‌ బిహారీ వాజ్‌పేయీ.
రాజకీయ దిగ్గజం దివికేగిపోయింది. రాజకీయాల్లో మేటి విలువల రేడుగా యావద్దేశం మన్ననలు అందుకున్న మాజీ ప్రధాని అటల్‌ బిహారీ వాజ్‌పేయీ (93) తుది శ్వాస విడిచారు. పరిపాలన దక్షుడు, రాజనీతిజ్ఞుడు, శాంతియోధుడు, అతివాద పార్టీలో ఉన్నా మితవాద పరిమళాలు వెదజల్లిన మహానేత తిరిగిరాని లోకాలకు మరలిపోయారు.
‘ఓ శకం ముగిసింది.. వ్యక్తిగతంగా ఇది నాకు ఎప్పటికీ పూడ్చలేని లోటు. అటల్‌జీ దేశం కోసమే జీవించారు. ఆయన ఆదర్శప్రాయమైన నాయకత్వం సౌభాగ్యవంతమైన, సుదృఢమైన, సంఘటిత భారతావనికి గట్టి పునాదులు వేసింది’
- ప్రధాని మోదీ
‘అటల్‌జీ అస్తమయం నాకు ఎప్పటికీ తీరని లోటు. ఆ బాధను వ్యక్తం చేయడానికి నావద్ద మాటల్లేవు. సమ్మోహన నాయకత్వం.. మంత్రముగ్ధుల్ని చేసే వాక్పటిమ.. శిఖర సమానమైన దేశభక్తి ఆయన సొంతం’
- ఎల్‌.కె. ఆడ్వాణీ
మహాభినిష్క్రమణం
ఒక వ్యక్తి ఎంత గొప్పవాడైనా కావచ్చు. కానీ దేశంకంటే గొప్పవాడు కాదు. ఓ రాజకీయ పక్షం ఎంత శక్తిమంతమైనదైనా కావచ్చు కానీ ప్రజాస్వామ్యంకంటే శక్తిమంతం కాజాలదు
- వాజ్‌పేయీ
దిల్లీ: మాజీ ప్రధాని అటల్‌ బిహారీ వాజ్‌పేయీ (93) తుది శ్వాస విడిచారు. గురువారం సాయంత్రం 5.05కు ఆయన కన్నుమూసినట్లు ఎయిమ్స్‌ వైద్యులు ప్రకటించారు. వాజ్‌పేయీకి 1988లో మూత్రపిండాల శస్త్రచికిత్స జరిగింది. ఆయనకు ఒకటే మూత్రపిండం పని చేస్తోంది. 2009లో స్ట్రోక్‌ రావడంతో ఆయన ఆరోగ్యంపై తీవ్ర ప్రభావం పడింది. మాట పడిపోయింది. చక్రాల కుర్చీకే పరిమితమయ్యారు. ఎవరినీ గుర్తు పట్టలేని స్థితికి చేరుకున్నారు. చిత్తవైకల్యంతో, దీర్ఘకాలిక మధుమేహంతో బాధపడ్డారు. ఆయన ఇన్ని సంవత్సరాలుగా ఇంటికే పరిమితమయ్యారు.
మూత్రపిండ నాళాల ఇన్ఫెక్షన్‌, మూత్రనాళాల ఇన్ఫెక్షన్‌, ఛాతీ సంబంధిత సమస్యతో బాధపడుతుండడంతో ఈ ఏడాది జూన్‌ 11న ఎయిమ్స్‌లో చేర్పించారు. గడచిన 9 వారాలుగా ఆయన ఆరోగ్యం నిలకడగానే ఉందని ఎయిమ్స్‌ గురువారం సాయంత్రం విడుదల చేసిన ప్రకటనలో పేర్కొంది ‘‘దురదృష్టవశాత్తూ గడచిన 36 గంటలుగా ఆయన ఆరోగ్యం విషమించింది. ప్రాణాధార వ్యవస్థలపై ఉంచి చికిత్సలు అందించాం. వైద్యులు శాయశక్తులా కృషి చేసినా ఆయన్ను గురువారం కోల్పోయాం. ఎంతో వేదనతో ఈ విషాద వార్తను తెలియజేస్తున్నాం.’’ అని ఎయిమ్స్‌ ఆ ప్రకటనలో పేర్కొంది.
మాజీ ప్రధాని న్యుమోనియా, వివిధ అవయవాల వైఫల్యంతో బాధపడినట్లు ఎయిమ్స్‌ వైద్యులు వెల్లడించారు. చివరి రోజయిన గురువారం ఎక్‌స్ట్రాకార్పొరియల్‌ మెంబరేన్‌ ఆక్సిజనేషన్‌ (ఈసీఎంవో) వ్యవస్థతోనూ ప్రాణాలు నిలపడానికి ప్రయత్నించినట్లు చెప్పారు. గుండె, ఊపిరితిత్తులు పని చేయలేకపోతే ఈసీఎంఓ సర్క్యూట్‌ కృత్రిమ గుండె, కృత్రిమ ఊపిరితిత్తులుగా పని చేస్తుంది.
వాజ్‌పేయీ ఆరోగ్యం బాగా విషమించడంతో పాటు చివరి క్షణాలు సమీపించాయేనే సమాచారం అందడంతో గురువారం ఉదయం ప్రధాని మోదీ, పలువురు భాజపా నేతలు, విపక్ష నేతలు ఎయిమ్స్‌కు వెళ్లారు. శనివారం నుంచే వాజ్‌పేయీ ఆరోగ్యంపై ఆందోళన ప్రారంభమయింది. కేంద్ర హోం మంత్రి రాజ్‌నాథ్‌ సింగ్‌, భాజపా అధ్యక్షుడు అమిత్‌షా ఆ రోజు ఎయిమ్స్‌కు వెళ్లి వైద్యులనడిగి వివరాలు తెలుసుకున్నారు.
బుధవారం మధ్యాహ్నం నుంచి ఎయిమ్స్‌కు తాకిడి పెరిగింది. ఆ రోజు రాత్రి ప్రధాని నరేంద్రమోదీ ఎయిమ్స్‌కు వచ్చివెళ్లారు. చికిత్స పొందుతున్న భాజపా అగ్రనేత వద్దకు తొలుత కేంద్ర జౌళిశాఖ మంత్రి స్మృతి ఇరానీ వెళ్లి, ఆరోగ్య పరిస్థితిని వాకబు చేశారు. రాత్రి పొద్దుపోయాక రైల్వే శాఖ మంత్రి పీయూష్‌ గోయల్‌, భాజపా ఎంపీ మీనాక్షి లేఖి కూడా ఎయిమ్స్‌కు వెళ్లి వాజ్‌పేయీ ఆరోగ్య పరిస్థితి గురించి తెలుసుకున్నారు. శిఖర సమానుడైన అభిమాన నేత ఆరోగ్యం మెరుగుపడడం లేదని తెలిసినప్పటి నుంచి పార్టీ నేతలు, కార్యకర్తలు ఆత్రుతతో ఆయన గురించి సమాచారం తెలుసుకొనే ప్రయత్నాలు చేశారు. వారి ప్రార్థనలు ఫలించలేదు. తన కవిత్వంలో చెప్పినట్లుగానే మృత్యువుతో ధైర్యంగా పోరాడి వాజ్‌పేయీ తుదిశ్వాస విడిచారు.

నేటి మధ్యాహ్నం అంతిమ యాత్ర
వాజ్‌పేయీ పార్థివదేహాన్ని ప్రజల సందర్శనార్థం కృష్ణమేనన్‌ మార్గ్‌లోని ఆయన అధికారిక నివాసం 6-ఎకు తరలించారు. ప్రజలు శుక్రవారం ఉదయం 7.30 నుంచి 8.30 వరకు దివంగత నేతకు నివాళులర్పించవచ్చని భాజపా అధ్యక్షుడు అమిత్‌షా చెప్పారు. శుక్రవారం ఉదయం 9కి దీన్‌దయాళ్‌ ఉపాధ్యాయ మార్గ్‌లోని భాజపా ప్రధాన కార్యాలయానికి వాజ్‌పేయీ పార్థివ దేహాన్ని తరలిస్తారు. మధ్యాహ్నం ఒంటిగంటకు అంతిమ యాత్ర ప్రారంభమవుతుంది. రాష్ట్రీయ స్మృతిస్థల్‌లో సాయంత్రం 4కు ప్రభుత్వ లాంఛనాలతో అంతిమసంస్కారాలు నిర్వహిస్తారు. ఈ సందర్భంగా కేంద్ర ప్రభుత్వ కార్యాలయాలు,  దేశవ్యాప్తంగా ఉన్న కేంద్ర ప్రభుత్వరంగ సంస్థలు, దేశరాజధాని ప్రాంతంలోని దిల్లీ ప్రభుత్వ కార్యాలయాలకు ఒక పూట సెలవు ప్రకటించారు.ఉత్తర్‌ప్రదేశ్‌ ప్రభుత్వం శుక్రవారం అన్ని కార్యాలయాలు, పాఠశాలలు, కళాశాలలకు సెలవు ప్రకటించింది.

ఏడు రోజులూ జాతీయ పతాకం అవనతం
దివంగత ప్రధాని గౌరవార్థం కేంద్ర ప్రభుత్వం గురువారం నుంచి ఏడు రోజుల పాటు (16-22) అధికారికంగా సంతాప దినాలు ప్రకటించింది. ఈ మేరకు ప్రధాని మోదీ అధ్యక్షతన జరిగిన కేంద్ర మంత్రివర్గ సమావేశంలో నిర్ణయం తీసుకున్నారు. దేశవ్యాప్తంగా ఈ ఏడు రోజులూ జాతీయ పతాకాన్ని అవనతం చేయనున్నట్లు కేంద్ర హోం మంత్రిత్వశాఖ ఒక సర్క్యులర్‌లో తెలిపింది. దేశ వ్యాప్తంగా ఈ వారం రోజులూ అధికారికంగా ఎటువంటి వినోద కార్యక్రమాలూ ఉండవని ప్రకటించింది. అంత్యక్రియలు జరిగే రోజైన శుక్రవారం విదేశాల్లోని భారత రాయబార కార్యాలయాలన్నింటిలోనూ జాతీయ పతాకాన్ని అవనతం చేస్తారు.





ఓ శకం ముగిసింది..
ప్రధాని నరేంద్ర మోదీ
‘‘ఓ శకం ముగిసింది.. వ్యక్తిగతంగా ఇది నాకు ఎప్పటికీ పూడ్చలేని లోటు. అటల్‌జీ దేశం కోసమే జీవించారు. అకుంఠిత దీక్షతో దశాబ్దాల తరబడి నిరుపమాన సేవలందించిన మహానేత. ఆయన ఆదర్శప్రాయమైన నాయకత్వం 21వ శతాబ్దంలో సౌభాగ్యవంతమైన, సుదృఢమైన, సంఘటిత భారతావనికి గట్టి పునాదులు వేసింది. వివిధ రంగాల్లో ఆయన దార్శనిక విధానాల ఫలాలు దేశంలోని ప్రతి పౌరుడికీ అందాయి. ఒడిదుడుకులను ఎదుర్కొంటూ.. నిర్విరామ శ్రమతో..ఒక్కో ఇటుక పేర్చి ఆయన భాజపాను నిర్మించారు. పార్టీ సందేశాన్ని దేశవ్యాప్తం చేసేందుకు ఆసేతు హిమాచలం ప్రయాణించారు. ఫలితంగా జాతీయంగాను, అనేక రాష్ట్రాల్లోనూ భాజపా ఓ బలమైన శక్తిగా అవతరించింది. ఆయన కుటుంబ సభ్యులకు, భాజపా కార్యకర్తలకు, కోట్లాది అభిమానులకు నా ప్రగాఢ సానుభూతి.. ఓం శాంతి.’’

మాటలకందని విషాదం!
ఎల్‌.కె.అడ్వాణీ
‘‘అటల్‌జీ అస్తమయం నాకు ఎప్పటికీ తీరని లోటు. ఆ బాధను వ్యక్తం చేయడానికి నావద్ద మాటల్లేవు. ఆయనతో నా సుదీర్ఘ అనుబంధంలో ఎన్నెన్నో జ్ఞాపకాలు.. ఆర్‌ఎస్‌ఎస్‌ ప్రచారక్‌లుగా ఉన్న రోజుల నుంచి - భారతీయ జన్‌సంఘ్‌ ప్రారంభం, ఎమర్జెన్సీ చీకటి రోజుల్లో సాగించిన పోరు జనతా పార్టీ ఏర్పాటుకు దారితీసిన వైనం, 1980లో భారతీయ జనతా పార్టీ ఆవిర్భావం వంటివెన్నో నా స్మృతిపథంలో నిక్షిప్తం. కేంద్రంలో తొలి సుస్థిర కాంగ్రెసేతర సంకీర్ణ ప్రభుత్వాన్ని విజయవంతంగా నడిపించిన నేతగా ఆయన చిరస్మరణీయులు. ఆరేళ్లు ఆయన వద్ద ఉప ప్రధానిగా పనిచేయడం నాకెంతో గౌరవం. సీనియర్‌గా నిరంతరం నన్ను వెన్నుతట్టి ప్రోత్సహించారు.. మార్గదర్శిగా నిలిచారు. సమ్మోహన నాయకత్వం.. మంత్రముగ్ధుల్ని చేసే వాక్పటిమ.. శిఖర సమానమైన దేశభక్తి ఆయన సొంతం. కరుణ.. ఆదరణ.. ఎదుటివారిని గౌరవించడం.. వంటి సమున్నత మానవీయ విలువలకు ఆయన నిలువుటద్దం. ప్రతికూలతలను జయించగల సమర్ధ నేత.’’

గొప్ప రాజనీతిజ్ఞుడు
గవర్నర్‌ నరసింహన్‌
వాజ్‌పేయీ మృతిపై గవర్నర్‌ నరసింహన్‌ దిగ్భ్రాంతి వ్యక్తంచేశారు. ఆయన గొప్ప దార్శనికుడు, రాజనీతిజ్ఞుడు, మానవతావాది అని గవర్నర్‌ పేర్కొన్నారు. ప్రజాస్వామ్య విలువలకు నిలువుటద్దమని కొనియాడారు.

ప్రపంచానికే ఆదర్శం
తెలంగాణ సీఎం కేసీఆర్‌
మాజీ ప్రధానమంత్రి వాజ్‌పేయీ మృతిపై తెలంగాణ ముఖ్యమంత్రి కేసీఆర్‌ ప్రగాఢ సంతాపం తెలిపారు. విలువలతో కూడిన రాజకీయాలను నడిపి యావత్‌ ప్రపంచానికే ఆదర్శంగా నిలిచిన మహానేత అని కొనియాడారు. వాజ్‌పేయీ మృతి దేశానికి తీరని లోటన్నారు. ఉదారవాది, మానవతావాది, కవి, సిద్ధాంతకర్త, మంచివక్త, నిరాడంబరుడు, నమ్మిన సిద్ధాంతం కోసం జీవితాంతం కృషి చేసిన అటల్‌ ఆత్మకు శాంతి చేకూరాలని సీఎం ఆకాంక్షించారు. ఉపముఖ్యమంత్రులు కడియం శ్రీహరి, మహమూద్‌ అలీ, శాసనసభాపతి మధుసూదనాచారి, మండలి ఛైర్మన్‌ స్వామిగౌడ్‌, మంత్రులు కేటీఆర్‌, హరీశ్‌రావు, ఎంపీలు వినోద్‌, కల్వకుంట్ల కవిత తదితరులు సంతాపం తెలిపారు.

అది వాజ్‌పేయీ శకం..
ఏపీ సీఎం చంద్రబాబు
ప్రధానిగా అటల్‌ పరిపాలన, రాజకీయ అనుభవాలు ‘వాజ్‌పేయీ శకం’గా భారత చరిత్రలో నిలిచిపోతుందని ముఖ్యమంత్రి చంద్రబాబు ప్రస్తుతించారు. ఆయన మృతితో దేశం గొప్ప రాజనీతిజ్ఞుడిని కోల్పోయిందని సంతాప సందేశంలో పేర్కొన్నారు. ‘‘నమ్మిన ఆదర్శాలను నిజ జీవితంలో ఆచరించి చూపిన మానవతావాది.. ఎంపీ, ప్రధాన ప్రతిపక్షనేత, విదేశాంగమంత్రి, ప్రధానమంత్రిగా బహుముఖ పాత్ర పోషించిన ఉదారవాది. పార్లమెంటులో తన అద్భుత ప్రసంగాలతో మార్గదర్శకం చేశారు. విశ్వాస పరీక్షలో ఒక ఓటు తేడాతో ప్రభుత్వం ఓడిపోయినా ఎంతమాత్రం చలించని మేరునగధీరుడు. నదుల అనుసంధానం, స్వర్ణ చతుర్భుజినిర్మాణం ఆయన ఆలోచనలే..’అని చంద్రబాబు పేర్కొన్నారు.

విలువలకు నిలువెత్తు నిదర్శనం..
‘నిజమైన భారత రాజనీతిజ్ఞుడు అటల్‌జీ ఇక లేరని వినాల్సి రావడం తట్టుకోలేనంత బాధాకరం. విలువలకు, హుందాతనానికి నిలువెత్తు నిదర్శనంగా నిలిచిన ఓ మహావ్యక్తిని మనమంతా కోల్పోయాం. అటల్‌జీ నాయకత్వం, దార్శనికత, పరిపక్వత, వాక్పటిమ స్వతహాగానే ఆయనను అత్యున్నతంగా నిలిపాయి.’
- రామ్‌నాథ్‌ కోవింద్‌, రాష్ట్రపతి
సదా చిరస్మరణీయులు..
‘‘అద్భుత వ్యక్తిత్వం, దార్శనికత, వాక్పటిమ, పనిలో అంకితభావం, స్నేహశీలత మేళవించిన అద్వితీయ నాయకత్వంతో అటల్‌జీ దేశానికి చిరస్మరణీయులు. స్వతంత్ర భారతావనిలో అత్యున్నత నేతల్లో ఆయన ఒకరన్నది నిస్సందేహం. ప్రజస్వామ్య పరిష్ఠతకు, సుపరిపాలనకు ఆయన చేసిన కృషి చెరగని ముద్ర వేస్తుంది. అరుదైన ప్రేరణాత్మక శక్తి, దక్షతలతో 23 పార్టీల సంకీర్ణాన్ని విజయవంతంగా నడిపించిన నేత. ఉదయమే ఆయనను చూశాను.. ఇంత త్వరగా మనల్ని విడిచి వెళ్లిపోతారని ఊహించలేకపోయాను..’’
- ఎం.వెంకయ్య నాయుడు, ఉప రాష్ట్రపతి
దేశానికి తీరని లోటు..
‘‘భరతమాత ఓ గొప్పు పుత్రుడ్ని కోల్పోయింది. కోట్లాది ప్రజల ప్రేమాభిమానం, గౌరవాలను పొందిన మహానేత అటల్‌జీ.. ఆయన అస్తమయం మనకందరికీ తీరని లోటు.’’
- రాహుల్‌ గాంధీ, కాంగ్రెస్‌ అధ్యక్షుడు
ప్రజాస్వామ్య విలువలపరిరక్షకుడు..
‘‘అటల్‌జీ పెద్ద శూన్యతను మిగిల్చి వెళ్లిపోయారు. కోట్లాది భారతీయులతో పాటు నేనూ శోకతప్తంలో ఉన్నాను. పార్లమెంటేరియన్‌, కేంద్ర మంత్రి, ప్రధాని.. ఏ పదవిలో ఉన్నా ప్రజాస్వామ్య విలువల కోసం నిలబడిన నాయకుడు. ప్రజా జీవితంలో శిఖర సమానులాయన. గొప్ప దార్శనికుడు.. దేశభక్తుడు.. మంత్రముగ్ధుల్ని చేసే వక్త. అంతకంటే గొప్ప విశాల హృదయులు.. నిజమైన మానవతావాది. ఏ పార్టీల వారితోనైనా.. విదేశీ ప్రభుత్వాలతోనైనా.. అందరితోనూ గౌరవంగా మెలిగే నేత.’’
- సోనియా గాంధీ
భాజపాను వటవృక్షంగా తీర్చిదిద్దారు..!
‘‘భారతీయ జనతా పార్టీని ఆవిర్భావం నుంచి.. భారత రాజకీయాల్లో మహా వటవృక్షంగా తీర్చిదిద్దేవరకూ అటల్‌జీ అలుపెరుగక శ్రమించారు. ఆయన మిగిల్చిన ఆశయాల సాధనకు పార్టీ చేయాల్సింది ఎంతో ఉంది. ప్రజాసేవకే అధికారం అని బలంగా విశ్వసించిన ఆయనది నిష్కళంక రాజకీయ జీవితం. దేశ ప్రయోజనాల పట్ల రాజీలేని వ్యక్తిత్వం ఆయన సొంతం. భారత రాజకీయాల్లో ఆయనది ఎన్నటికీ చెరిగిపోని ముద్ర. బహిరంగ సభల నుంచి లోక్‌సభ దాకా ఆయన ప్రసంగిస్తే అంతా నిశ్శబ్దంగా వినేవారు. దేశం అజాతశత్రువైన ఓ మహానేతను కోల్పోయింది.’’
- అమిత్‌ షా, భాజపా అధ్యక్షుడు
భారతరత్నమే..
‘‘భారతరత్న అటల్‌జీ గొప్ప దేశభక్తుడు.. జీవితాంతం దేశసేవకే అంకితమైన ఆధునిక భారత అత్యున్నత నేతల్లో ఒకరు. గొప్ప ప్రధాని.. జాతీయ, అంతర్జాతీయ స్థాయిలో అద్భుత రాజనీతిజ్ఞుడు.. అత్యుత్తమ పార్లమెంటేరియన్‌.. మంచి వక్త, చెరగని ముద్ర వేసే కవి. ఆయన సేవలు చిరస్మరణీయం.’’
- మన్మోహన్‌ సింగ్‌, మాజీ ప్రధాని
భారత ధ్రువతార..
‘‘భారత రాజకీయాల్లో అటల్‌జీ ధ్రువతార. మాతృభూమికి వన్నెతెచ్చిన అసమాన, అమూల్యమైన ఆభరణం. ఆ మణిమకుటం శూన్యతను మిగిల్చి దివికేగింది.’’
- సుమిత్ర మహాజన్‌, లోక్‌సభ స్పీకర్
వెలకట్టలేని అనుబంధం
ఈనాడు డిజిటల్‌, కరీంనగర్‌: మాజీ ప్రధాని వాజ్‌పేయీ మహానేత. ప్రజల సేవ కోసం ఆయన అనుసరించిన ధ్యేయపూరిత విధానాలు ఆదర్శనీయమైనవని మహారాష్ట్ర గవర్నర్‌ సీహెచ్‌ విద్యాసాగర్‌రావు అన్నారు. ఆయన గురువారం రాత్రి ‘ఈనాడు’తో మాట్లాడుతూ.. వాజ్‌పేయీతో తనకు ఉన్న అనుబంధం వెలకట్టలేనిదని అన్నారు.
- మహారాష్ట్ర గవర్నర్‌ సీహెచ్‌. విద్యాసాగర్‌రావు
తరతరాలకు ఆదర్శప్రాయులు
‘విలువలకు కట్టుబడిన వ్యక్తి. తరతరాలకు ఆదర్శప్రాయులు. ఆయన మరణం భారత రాజకీయాల్లో తీరని లోటు మిగిల్చింది. ఆయన ఆత్మకు శాంతి కలగాలని కోరుకుంటున్నా’
- వై.ఎస్‌.చౌదరి, తెదేపాపా నేత
సినారె గజళ్లంటే ఆసక్తి
సి.నారాయణరెడ్డి గజళ్లను వాజ్‌పేయీ ఆసక్తిగా వినేవారు. వాజ్‌పేయీ ప్రధానిగా ఉన్నప్పుడు సినారె ఆయనను ఆపి గజళ్లు, కవిత్వం వినిపించేవారు. ఆ అపురూప సన్నివేశాలకు ప్రత్యక్ష సాక్షిని. ఐక్యరాజ్య సమితిలో హిందీని అధికార భాషగా ప్రకటింపజేసేందుకు కేంద్రం ప్రయత్నిస్తోంది. అది సాధిస్తే ఆయన కల నెరవేరుతుంది.
- మాజీ ఎంపీ యార్లగడ్డ లక్ష్మీప్రసాద్‌
గురువు.. దైవం ఆయనే
నాకు గురువు, దైవం రెండు అటల్‌జీయే. ఆయనతో నాకు మంచి సంబంధాలు ఉన్నాయి. ఎప్పుడు కనిపించిన హీరో కృష్ణంరాజు ఎలా ఉన్నారంటూ ఆప్యాయంగా పలకరించేవారు. పార్టీలోనూ ప్రోత్సహించిన మహానేత. ఆయన మంత్రివర్గంలో పనిచేయడం పూర్వజన్మ సుకృతం.
- కేంద్ర మాజీమంత్రి కృష్ణంరాజు
అహంభావం తెలియదు
‘వాజ్‌పేయీ స్ఫూర్తి, ప్రేరణతోనే మేం నాయకులుగా మారాం. ఆయనకు అహంభావం అంటే తెలియదు. ఎవరైనా తనను చూడడానికి వెళ్తే పిలిపించి మరీ కూర్చోబెట్టుకొని చర్చించేవారు. పర్యటనల సమయంలో కార్యకర్తల ఇళ్లకే వెళ్లి భోజనాలు చేసేవారు. నేను ఆయన్ను 60 సార్లు కలిసుంటా. విశాఖకు వచ్చిన రోజుల్లో బీచ్‌ రోడ్డులో నడకకు వెళ్లేవారు. స్టీల్‌ప్లాంట్‌, బీహెచ్‌పీవీ, భెల్‌ వంటి పరిశ్రమలు విశాఖకు రావడంలో ఆయన కృషి లేకపోలేదు. తెదేపా ఆవిర్భావ సమయంలో ఎన్టీఆర్‌ గురించి గొప్పగా చెప్పేవారు.
- పీవీ చలపతిరావు, రాష్ట్ర భాజపా మాజీఅధ్యక్షుడు

బహుళ పార్టీ ప్రజాస్వామ్యవాది: వామపక్ష పార్టీల నివాళి
దిల్లీ: వాజ్‌పేయీ బహుళ పార్టీ ప్రజాస్వామ్యాన్ని సంపూర్ణంగా విశ్వసించేవారని వామపక్ష పార్టీలు కొనియాడాయి. ప్రధానిగా ముఖ్యమైన నిర్ణయాలు తీసుకునేముందు ఆయన తప్పనిసరిగా ప్రతిపక్షాలను సంప్రదించేవారని గుర్తుచేసుకున్నాయి. ప్రస్తుత పాలకుల్లో ఈ వైఖరి లోపించిందని పేర్కొన్నాయి. ‘‘ఇరాక్‌పై దాడి సమయంలో సంకీర్ణ దళాల్లో చేరాలని అమెరికా భారత్‌ను కోరింది. ఈ విషయంపై వాజ్‌పేయీ అఖిలపక్ష సమావేశం ఏర్పాటుచేశారు. అమెరికాకు మద్దతుపై వామపక్ష పార్టీలు అభ్యంతరం చెప్పాయి. ఇదే విషయాన్ని వీధుల్లో ఎలుగెత్తి చాటాలని వాజ్‌పేయీ అన్నారు. సంకీర్ణ సేనల్లో భారత్‌ చేరబోదంటూ మరుసటిరోజే పార్లమెంటులో తీర్మానం చేశారు’’ అని సీపీఐ నేత డి.రాజా గుర్తుచేసుకున్నారు. ఆయన అన్ని పార్టీలతో సత్సంబంధాలు నెరిపేవారని సీపీఎం నేత సీతారాం ఏచూరి పేర్కొన్నారు.
‌జన్మదిన ఉత్సవాలను రద్దు చేసుకున్న కేజ్రీవాల్‌
దిల్లీ: రాష్ట్ర ముఖ్యమంత్రి అరవింద్‌ కేజ్రీవాల్‌ గురువారం తన 50వ పుట్టినరోజు వేడుకలను రద్దుచేసుకున్నారు.మాజీ ప్రధాని  అటల్‌ బిహారీ వాజ్‌పేయీ అస్తమయం కారణంగా, ఆయన ఈ నిర్ణయం తీసుకున్నారు.

ముఖ్యాంశాలు

జిల్లా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.