కర్ణాటకం సార్వత్రికంలో ఫలించేనా!
కాంగ్రెస్‌ పాచిక పారడంపై అనుమానాలు
రాహుల్‌ అభ్యర్థిత్వాన్ని తేల్చనున్న సంఖ్యాబలాలు
కన్నడ నాటకీయ పరిణామాలతో మారనున్న స్వరాలు
దిల్లీ: కర్ణాటకలో ఉప ప్రాంతీయ స్థాయి పార్టీతో కలిసి అధికార పీఠంపై కూర్చోగలిగిన కాంగ్రెస్‌... అలాంటి వ్యూహాన్ని 2019 సార్వత్రిక ఎన్నికల్లోనూ అనుసరించినా పాచిక పారుతుందా అనే అనుమానాలు వ్యక్తమవుతున్నాయి. ఒక్క పార్టీతో వ్యవహారం కాబట్టి కర్ణాటక వరకు ఎత్తుగడ ఫలించినా, అనేక పార్టీల సమాహారంతో ఇలాంటిది పునరావృతం చేయడం అంత సులభం కాదని విశ్లేషకులు అంచనా వేస్తున్నారు. రాజస్థాన్‌, మధ్యప్రదేశ్‌, ఛత్తీసగఢ్‌ రాష్ట్రాల శాసనసభలకు మరికొద్ది నెలల్లో ఎన్నికలు జరగనున్నాయి. ఈ మూడు రాష్ట్రాల్లో కలిపి 65 లోక్‌సభ స్థానాలున్నాయి. ఈ రాష్ట్రాల శాసనసభలను కాంగ్రెస్‌ నెగ్గకపోతే... ఈ 65 లోక్‌సభ స్థానాల్లో ఆ తర్వాత గెలుపు సాధించడం కష్టమవుతుందనే అంచనాలున్నాయి. ఈ రాష్ట్రాల్లో భాజపాతో కాంగ్రెస్‌ ముఖాముఖి తలపడబోతోంది. అక్కడ ఓడిపోతే ప్రాంతీయ పార్టీల దృష్టిలో కాంగ్రెస్‌ మరింత పలచనయ్యే అవకాశం ఉంది. వచ్చే సార్వత్రిక ఎన్నికల్లో కాంగ్రెస్‌ ఏకైక అతిపెద్ద పార్టీగా అవతరిస్తే ప్రధానమంత్రి పగ్గాలు చేపట్టేందుకు తాను సిద్ధమేనని ఆ పార్టీ అధ్యక్షుడు రాహుల్‌గాంధీ ఇటీవల ప్రకటించారు. కర్ణాటకలో ఓట్లు, సీట్లు పరంగా తమదే పైచేయి అయినా జేడీ(ఎస్‌) అభ్యర్థిని ముఖ్యమంత్రిని చేయడానికి సహకరించిన తీరు దృష్ట్యా సార్వత్రిక ఎన్నికల్లో చిన్నచిన్న పార్టీలు సయితం రాహుల్‌ అభ్యర్థిత్వాన్ని ప్రశ్నించే అవకాశం ఉంది.

పెద్ద రాష్ట్రాల్లో ఏదీ ఉనికి?
కాంగ్రెస్‌ సంస్థాపరంగా చాలా చోట్ల బలహీనంగా ఉంది. పంజాబ్‌, మిజోరం, పుదుచ్చేరి, కర్ణాటకల్లో తప్పిస్తే ఆ పార్టీ ప్రభుత్వాలు దేశంలో మరెక్కడా లేవు. ఉత్తర్‌ప్రదేశ్‌ (80 లోక్‌సభ స్థానాలు), పశ్చిమబెంగాల్‌ (42), బిహార్‌ (40), తమిళనాడు (39) వంటి పెద్ద రాష్ట్రాల్లో ఆ పార్టీ ఉనికి లేదు. ఈ నాలుగు రాష్ట్రాల్లోనే 201 లోక్‌సభ స్థానాలున్నాయి. పశ్చిమ బెంగాల్‌లో భాజపా ఒక శక్తిగా ఎదుగుతోంది. తమిళనాడులో సినీ నటులు రజనీకాంత్‌, కమల్‌హాసన్‌ వంటివారు తెరపైకి వస్తున్నారు. మహారాష్ట్రలో శివసేన-భాజపా మధ్య సంబంధాలు అంతంతమాత్రంగానే ఉండడంతో అక్కడ మాత్రం కాంగ్రెస్‌కు కొద్దిగా అవకాశాలు కనిపిస్తున్నాయి. తెలంగాణ(17), ఆంధ్రప్రదేశ్‌(25), ఒడిశా(21), ఝార్ఖండ్‌ (14 స్థానాలు) రాష్ట్రాల్లోనూ కాంగ్రెస్‌ బలంగా లేదు. ఇలాంటి రాష్ట్రాల్లో పొత్తుల ద్వారా అదృష్టాన్ని పరీక్షించుకునేందుకు కాంగ్రెస్‌ ప్రయత్నించనుంది. కర్ణాటక పరిణామాల కోణంలో చూస్తే పెద్దన్న పాత్ర కాంగ్రెస్‌కి లభించడం కష్టమే.

ఎన్డీఏ చీలికపై ఆశలు!
ఈసారి ఎన్నికల్లో భాజపాకి సొంతంగా ఆధిక్యం రాదనీ, ఎన్డీఏ ముక్కలైపోవడం ఖాయమనీ కాంగ్రెస్‌ విశ్వసిస్తోంది. 2014లో 44 స్థానాలకే పరిమితమైన కాంగ్రెస్‌ ఈసారి పనితీరు మెరుగుపరచుకున్నా, 80-90 స్థానాల వద్దకే పరిమితమైతే మాత్రం ప్రధానిగా రాహుల్‌ అభ్యర్థిత్వం అంత సులభం కాబోదు. ఒకవేళ 100 సీట్ల మార్కును కాంగ్రెస్‌ దాటినా ఆయన్ని ప్రధానిగా అంగీకరించడానికి మమతా బెనర్జీ, నవీన్‌ పట్నాయక్‌, మాయావతి, అఖిలేశ్‌యాదవ్‌ వంటి నేతలు ఎంతవరకు ముందుకొస్తారో సందేహమే.

మధ్యప్రదేశ్‌ కాంగ్రెలో లుకలుకలు
భోపాల్‌: మధ్యప్రదేశ్‌ కాంగ్రెస్‌ ఎన్నికల ప్రణాళిక సంఘం అధ్యక్షురాలి పదవికి మాజీ ఎంపీ మీనాక్షి నటరాజన్‌ గురువారం రాజీనామా చేశారు. తన బద్ధవిరోధి అయిన రాజేంద్రసింగ్‌ గౌతమ్‌ను ఈ సంఘంలో సభ్యునిగా తీసుకోవడంతో కినుక వహించి ఆమె ఈ నిర్ణయం తీసుకున్నారు. ఆమె అనుచరులైన మరికొందరు నేతలూ రాజీనామాలు చేశారు. కాంగ్రెస్‌ అధ్యక్షుడు రాహుల్‌గాంధీ జూన్‌ 6న మధ్యప్రదేశ్‌లో పర్యటించనున్నారు.

ముఖ్యాంశాలు

జిల్లా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.