అందుకే శబరిమలలో ఆందోళనలు
కేరళ సీఎం

తిరువనంతపురం: శబరిమల అయ్యప్ప స్వామి ఆలయంలోకి ప్రవేశించడానికి మహిళలందరికీ అనుమతినిస్తూ సుప్రీంకోర్టు ఇటీవల తీర్పునిచ్చిన నేపథ్యంలో అందుకు వ్యతిరేకంగా కొన్ని సంఘాలు చేస్తున్న ఆందోళనలతో ఆ ప్రాంతంలో తీవ్ర ఉద్రిక్త పరిస్థితులు నెలకొన్న విషయం తెలిసిందే. ఈ నేపథ్యంలో ఆ రాష్ట్ర ముఖ్యమంత్రి పినరయి విజయన్‌ పలువురిపై ఆరోపణలు చేస్తూ ఆగ్రహం వ్యక్తం చేశారు. ‘ఇతర ఆలయాలన్నింటి కన్నా శబరిమలకు చాలా ప్రత్యేకత ఉంది. ఈ ఆలయంలోకి అందరూ ప్రవేశించవచ్చు. ఈ విషయం పట్ల సంఘ్‌ పరివార్‌, ఆర్‌ఎస్‌ఎస్‌ ఎల్లప్పుడూ అసహనంతో ఉంటుంది. ఆ ఆలయానికి ఉన్న ఈ ప్రత్యేకతను చెడగొట్టాలని చాలా ప్రయత్నాలు చేస్తోంది’ అని ఆయన ట్వీట్ చేశారు.

‘కుల, ఫ్యూడల్‌ భావజాలాల వల్ల ప్రేరేపితులు కావడం వల్లే ఆందోళనకారులు హింసకు పాల్పడుతున్నారు. ఇటువంటి ఆందోళనలను ప్రోత్సహిస్తే సమాజంలో వెనకబడిన తరగతుల వారు కూడా శబరిమలకు రాకుండా నిషేధం విధించేలా పరిస్థితులు తలెత్తుతాయి. ఈ పరిణామాలను భక్తులందరూ ఖండించాలి’ అని మరో ట్వీట్‌లో తన అభిప్రాయాన్ని వ్యక్తం చేశారు. మళయాల సమాజానికి చెందిన ఆదివాసీలు శబరిమలలో నిర్వహించే ఆచారాలను ఇప్పటికే కొందరు పూర్తిగా లేకుండా చేశారని, ఇప్పుడు జరుగుతున్న ఆందోళనలను కూడా ఆ దృష్టిలోనే చూడాలని ఆయన అన్నారు. ఆర్‌ఎస్‌ఎస్‌ మద్దతుదారులు భక్తులను అడ్డుకుంటున్నారని, చెడును ప్రచారం చేస్తున్నారని ఆయన ఆరోపించారు.
న్యూయార్క్‌టైమ్స్‌ రిపోర్టర్‌పై దాడి

తిరువనంతపురం: శబరిమలలో రెండో రోజు ఉద్రిక్త పరిస్థితి వాతావరణం నెలకొంది. శబరిమల కొండను ఎక్కేందుకు ప్రయత్నించిన న్యూయార్క్‌ టైమ్స్‌ రిపోర్టర్‌ సుహాసిని రాజ్‌ను ఆందోళనకారులు అడ్డుకున్నారు. పోలీసుల సహాయంతో ఆమె కొంత దూరం వెళ్లినప్పటికీ.. ఆందోళనకారులు రోడ్డును బ్లాక్‌ చేశారు. రహదారికి అడ్డంగా నిలబడి ఆమెపై రాళ్లదాడికి పాల్పడ్డారు. అసభ్యకరంగా తిడుతూ శబరిమలలోకి ప్రవేశానికి అనుమతించబోమంటూ ఆందోళనకు దిగారు. సుహాసినితో పాటు విదేశీ పాత్రికేయురాలు కూడా ఉంది. దీంతో చేసేదేమి లేక ఆమె పంబకు వెనుదిరిగారు. శబరిమల కొండను ఎక్కేందుకు ప్రయత్నించిన మూడో మహిళ సుహాసిని. బుధవారం ఆంధ్రప్రదేశ్‌కు చెందిన మాధవితో పాటు కేరళకు చెందిన పాత్రికేయురాలు లిబిని కూడా ఆందోళనకారులు ఇదే విధంగా వెనక్కి పంపించారు.

ఆలయంలోకి మహిళ ప్రవేశాన్ని వ్యతిరేకిస్తూ ప్రవీణ్‌ తొగాడియా అంతరాష్ట్రీయ హిందూ పరిషత్‌, శబరిమల సంరక్షణ సమితి కేరళలో 24గంటల బంద్‌కు పిలుపునిచ్చింది. కొజికోడ్‌, అటింగళ్‌, ఛెథ్రాల ప్రాంతాల్లో కేఎస్‌ఆర్‌టీసీకి చెందిన బస్సులపై ఆందోళనకారులు రాళ్లదాడికి దిగారు. బంద్‌లో భాగంగా కేరళలోని అన్ని దుకాణాలను మూసివేశారు. రాష్ట్ర భాజపా నేతలు బంద్‌కు మద్దతుగా నిలిచారు. బంద్‌ సమయంలో ఎటువంటి అవాంఛనీయ సంఘటనలు జరగకుండా ఉండేలా పోలీసు బలగాలు పెద్ద ఎత్తున మోహరించాయి. మహిళా భక్తులు ఎవరూ ఇప్పటి వరకు ఆలయంలోకి ప్రవేశించలేకపోయారు.

ముఖ్యాంశాలు

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.