పేదల ఆరోగ్యానికి పెద్ద పథకం
పీఎంజేఏవైకి 27 రాష్ట్రాలు, యూటీలు సిద్ధం
ఎల్లుండి ప్రారంభించనున్న ప్రధాని
ప్రపంచంలోనే అతిపెద్ద  ఆరోగ్య యోజన!
దిల్లీ
కోట్లాది కుటుంబాల ఆరోగ్య పరిరక్షణకు కేంద్రం ప్రతిష్ఠాత్మకంగా అమలు చేయనున్న పథకంలో చేరేందుకు 27 రాష్ట్రాలు, కేంద్రపాలిత ప్రాంతాలు సిద్ధమైనట్లు నీతి ఆయోగ్‌ సభ్యుడు, పథకం ప్రధాన రూపకర్త వీకే పౌల్‌ వెల్లడించారు. ‘ప్రధానమంత్రి జన్‌ ఆరోగ్య యోజన (పీఎంజేఏవై)’ పేరిట ఈ పథకాన్ని ఈనెల 23న ప్రధాని మోదీ ప్రారంభించనున్నారు. అనంతరం పండిట్‌ దీన్‌దయాళ్‌ ఉపాధ్యాయ జయంతి సందర్భంగా 25 నుంచి అమల్లోకి వస్తుంది. ఈ పథకంలో చేరని రాష్ట్రాల్లో అవి ఆమోదం తెలిపేంతవరకు పీఎంజేఏవై అమల్లోకి రాదని పౌల్‌ వెల్లడించారు. ఓ వార్తాసంస్థకు ఇచ్చిన ముఖాముఖిలో ఆయన పథకం వివరాలను వెల్లడించారు.

ఐటీ.. మేటి..
పీఎంజేఏవైకి సంబంధించి రూపొందించిన ఇన్ఫర్మేషన్‌ టెక్నాలజీ (ఐటీ) సాఫ్ట్‌వేర్‌ను తెలంగాణలో ప్రయోగాత్మకంగా పరిశీలించి అభివృద్ధి చేశారు. ఎలాంటి అంతరాయాలు లేని విధానానికి రూపకల్పన చేశారు.

నిధులు.. విధులు..
ప్రపంచంలోనే అతిపెద్ద ప్రభుత్వ ఆరోగ్య సంరక్షణ పథకంగా చెబుతున్న పీఎంజేఏవైకి కేంద్రం 60 శాతం నిధులందిస్తుండగా.. మిగతాది రాష్ట్రాలు భరించాల్సి ఉంటుంది. ప్రస్తుత ఆర్థిక సంవత్సరంలో కేంద్రంపై  రూ. 3,500 కోట్ల మేర భారం పడే అవకాశం ఉంది. 2018-19 బడ్జెట్‌లో ‘ఆయుష్మాన్‌ భారత్‌’ పేరిట ముందుగా రూ. 2,000 కోట్లు కేటాయించారు. అవసరాలకు అనుగుణంగా అదనంగా నిధులు కేటాయిస్తారు.

వైద్యం
పీఎంజేఏవై అమలుకు దేశంలో 15వేలకు పైగా ప్రభుత్వ, ప్రైవేటు ఆసుపత్రులు ముందుకొచ్చాయి. ఇందులో దాదాపు సగం ప్రైవేటు ఆసుపత్రులు. వచ్చే ఐదేళ్లలో ద్వితీయ, తృతీయ శ్రేణి నగరాల్లో వేలాది ఆసుపత్రులు చేరే అవకాశం ఉందని అంచనా.

ప్రయో‘జనం’
దేశ జనాభాలో దాదాపు 40 శాతానికి చెందిన 10.74 కోట్లకు పైగా పేద కుటుంబాలకు రూ. 5 లక్షల వరకు ఆరోగ్య బీమా కల్పించాలన్నది లక్ష్యం. పథకం ప్రయోజనాలను పొందడానికి లబ్దిదారులు ఆధార్‌ లేదా ఓటరు గుర్తింపు కార్డు లేదా రేషన్‌కార్డు కలిగి ఉంటే సరిపోతుంది. సామాజిక-ఆర్థిక, కుల గణన 2011 ద్వారా గుర్తించిన పేదలంతా ఈ పథకానికి అర్హులు.

త్వరలో భారత్‌, పాక్‌ భేటీ..
దిల్లీ: ఐక్యరాజ్య సమితి సర్వ ప్రతినిధి సభ ఉన్నతస్థాయి సమావేశం సందర్భంగా భారత్‌, పాక్‌ విదేశాంగ మంత్రులు సుష్మాస్వరాజ్‌, ఖురేషీ భేటీ కానున్నట్లు భారత విదేశీ వ్యవహారాల శాఖ ప్రతినిధి రవీష్‌ కుమార్‌ గురువారం వెల్లడించారు. అయితే పాకిస్థాన్‌ పట్ల భారత వైఖరిలో ఎలాంటి మార్పు ఉండదని స్పష్టం చేశారు. పాక్‌ విజ్ఞప్తి మేరకే భేటీని ఖరారు చేసినట్లు  తెలిపారు.

మెట్రోలో మోదీ!... సెల్ఫీలకు పోటీపడిన ప్రయాణికులు
దిల్లీ: ప్రధాని మోదీ గురువారం మధ్యాహ్నం దిల్లీలోని ధౌలాకువాన్‌ నుంచి ద్వారక వరకు మెట్రోలో రాకపోకలు సాగించారు. ద్వారకలోని సెక్టర్‌ 25లో ‘ఇండియా ఇంటర్నేషనల్‌ కన్వెన్షన్‌ అండ్‌ ఎక్స్‌పో సెంటర్‌’ శంకుస్థాపన కార్యక్రమంలో ఆయన పాల్గొన్నారు. ఒకవైపు ప్రయాణానికి 14 నిమిషాలు పట్టినట్లు మెట్రో అధికారులు తెలిపారు. మెట్రో రైలులో ప్రధానిని చూసిన ప్రయాణికులంతా ఆశ్చర్యం వ్యక్తం చేస్తూ ఆయనతో సెల్ఫీలు దిగడానికి పోటీపడ్డారు. ద్వారక నుంచి తిరుగు ప్రయాణం సందర్భంగా ప్రధాని పలువురితో ముచ్చటించినట్లు పీఎంఓ తెలిపింది. అత్యంత ప్రముఖుల రాకపోకల సందర్భంగా ట్రాఫిక్‌ నిలిచిపోతుండటంతో.. ఇలాంటి ఇబ్బందులను అధిగమించేందుకు ప్రధాని మోదీ పలు సందర్భాల్లో మెట్రో రైలులో ప్రయాణాలు చేస్తున్నారు.


కూర్చుని మాట్లాడుదాం..
మోదీకి పాక్‌ ప్రధాని లేఖ
ఇస్లామాబాద్‌: ఉగ్రవాదం, కశ్మీర్‌ సహా - ఉభయ దేశాల సంబంధాలకు సవాల్‌గా మారిన కీలకాంశాలన్నింటిపైనా ద్వైపాక్షిక చర్చలు పునఃప్రారంభిద్దామంటూ పాకిస్థాన్‌ ప్రధాని ఇమ్రాన్‌ఖాన్‌ భారత ప్రధాని నరేంద్ర మోదీని కోరారు. ఈమేరకు ఇమ్రాన్‌ఖాన్‌ లేఖ రాసినట్లు పాక్‌ విదేశాంగ కార్యాలయం వెల్లడించింది. ఇస్లామాబాద్‌లో నిర్వహించనున్న ‘సార్క్‌’ విదేశాంగ మంత్రుల సదస్సుకు ముందే.. భారత్‌, పాక్‌ విదేశాంగ మంత్రులు సుష్మాస్వరాజ్‌, షా మెహ్‌మూద్‌ ఖురేషీల భేటీకి ఇమ్రాన్‌ఖాన్‌ లేఖలో ప్రతిపాదించారు. ఈమేరకు త్వరలో న్యూయార్క్‌లో జరిగే ఐక్యరాజ్య సమితి సర్వప్రతినిధి సభ సందర్భంగా మంత్రులిద్దరూ భేటీ కావాలని సూచించారు. ‘‘రెండు దేశాల మధ్య పరస్పరం శాంతిని కాంక్షిస్తూ.. ప్రజలకు, ప్రధానంగా భవిష్యత్తు తరాల కోసం ఉభయ తారకంగా చర్చలు జరుపుదాం. అంతరాలను తగ్గించుకుందాం.’’ అని లేఖలో పేర్కొన్నారు. అలాగే తనకు శుభాకాంక్షలు తెలిపిన మోదీకి ఇమ్రాన్‌ కృతజ్ఞతలు తెలిపారు. గత నెలలో ఇమ్రాన్‌ఖాన్‌ పాక్‌ ప్రధానిగా బాధ్యతలు స్వీకరించిన సంగతి తెలిసిందే. ఈమేరకు ఆగస్టు 18న భారత ప్రధాని మోదీ ఆయనకు రాసిన లేఖలో పాక్‌తో నిర్మాణాత్మక, అర్థవంతమైన చర్చలకు భారత్‌ కట్టుబడి ఉన్నట్లు స్పష్టం చేశారు. అలాగే ఉగ్రవాద రహిత దక్షిణాసియా కోసం పనిచేయాల్సిన అవసరాన్ని నొక్కిచెప్పారు. మోదీ లేఖకు స్ఫూర్తిగా ఇమ్రాన్‌ఖాన్‌ సానుకూలంగా స్పందించినట్లు పాక్‌ విదేశీ వ్యవహారాల ప్రతినిధి మహమ్మద్‌ ఫైసల్‌ తెలిపారు. అన్ని అంశాలపైనా సమగ్రంగా చర్చించి పరిష్కరించుకుందామని.. ఈమేరకు భారత్‌ స్పందన కోసం ఎదురు చూస్తున్నట్లు ట్విట్టర్‌లో పేర్కొన్నారు. ఈనెల 14న రాసినట్లు ఉన్న లేఖలో - ‘సార్క్‌’ సదస్సు సందర్భంగా పాక్‌ను సందర్శించి.. చర్చల ప్రక్రియను పునరుద్ధరించాలని ఇమ్రాన్‌ కోరారు.

ముఖ్యాంశాలు

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.