14 పార్టీల భేటీ నేడే
మోదీకి వ్యతిరేకంగా తొలిసారి ఒక్కటైన పార్టీలు
మహాకూటమి కీలక సమావేశానికి సిద్ధం
భవిష్యత్తు కార్యాచరణ ఖరారు
చంద్రబాబు సమన్వయం
5 రాష్ట్రాల ఎన్నికల ఫలితాల తర్వాత మరిన్ని పార్టీలు వస్తాయని ధీమా
ఈనాడు, దిల్లీ: ప్రధానమంత్రి నరేంద్ర మోదీ విధానాలను వ్యతిరేకిస్తున్న పార్టీలన్నీ ఏకతాటిపైకి వచ్చాయి. భాజపాకు వ్యతిరేకంగా మహాకూటమిగా రూపుదాల్చి సోమవారం దిల్లీలో సమావేశం అవుతున్నాయి. ఐదు రాష్ట్రాల అసెంబ్లీ ఎన్నికల ఫలితాలు వెలువడేందుకు ఒకరోజు ముందు ఈ సమావేశం జరుగనుండటం విశేషం. 2019 సార్వత్రిక ఎన్నికల్లో మోదీని గద్దె దించి దేశాన్ని, ప్రజాస్వామ్యాన్ని రక్షించాలన్న ఏకైక అజెండాతో ఈ సమావేశాన్ని నిర్వహించనున్నారు. తెదేపా అధినేత, ఏపీ సీఎం చంద్రబాబు నాయుడు సమావేశాన్ని సమన్వయపరుస్తున్నారు. భాజపాయేతర పక్షాల నేతలందరినీ ఆయన ఆహ్వానించారు. కాంగ్రెస్‌ అధ్యక్షుడు రాహుల్‌గాంధీ, చంద్రబాబుల చొరవతో పార్లమెంటు అనుబంధ భవనంలో మధ్యాహ్నం 3.30 గంటలకు జరగబోయే ఈ కీలక    సమావేశంలో 14 పార్టీల నేతలు పాలుపంచుకోబోతున్నారు. ఈ సమావేశంలో యూపీఏ అధ్యక్షురాలు సోనియాగాంధీ, కాంగ్రెస్‌ అగ్రనేతలు మన్మోహన్‌సింగ్‌, గులాంనబీ ఆజాద్‌, మల్లికార్జున ఖర్గే, అహ్మద్‌ పటేల్‌, తృణమూల్‌ కాంగ్రెస్‌ అధ్యక్షురాలు, పశ్చిమబెంగాల్‌ సీఎం మమతా బెనర్జీ, జేడీఎస్‌ అధ్యక్షుడు, మాజీ ప్రధాని దేవెగౌడ, ఆప్‌ కన్వీనర్‌, దిల్లీ సీఎం అరవింద్‌ కేజ్రీవాల్‌, డీఎంకే నేత స్టాలిన్‌, సీపీఎం, సీపీఐ ప్రధాన కార్యదర్శులు సీతారాం ఏచూరి, సురవరం సుధాకర్‌రెడ్డి, ఎన్సీపీ అధ్యక్షుడు శరద్‌ పవార్‌, ఎన్‌సీ అగ్రనేత ఫరూఖ్‌ అబ్దుల్లా, ఆర్‌ఎల్‌డీ నేత అజిత్‌సింగ్‌, ఆర్‌జేడీ యువనేత తేజస్వియాదవ్‌, ఝార్ఖండ్‌ మాజీ సీఎం, జేఎంఎ నేత హేమంత్‌ సోరెన్‌, ఝార్ఖండ్‌ వికాస్‌ మోర్చా అధ్యక్షుడు బాబూలాల్‌ మరాండీ, లోక్‌తాంత్రిక్‌ జనతాదళ్‌ అధ్యక్షుడు శరద్‌ యాదవ్‌, రాష్ట్రీయ లోక్‌సమతాపార్టీ నేత ఉపేంద్రకుష్వాహా, అసోం యునైటెడ్‌ డెమొక్రటిక్‌ ఫ్రంట్‌ నేత బద్రుద్దీన్‌ అజ్మల్‌ పాల్గొంటున్నారు. కాంగ్రెస్‌ పార్టీ ముఖ్యమంత్రులు అమరీందర్‌సింగ్‌ (పంజాబ్‌), నారాయణస్వామి(పుదుచ్చేరి)లతో పాటు కర్ణాటక సీఎం కుమారస్వామి, ఎల్డీఎఫ్‌ సీఎం పినరయి విజయన్‌(కేరళ)లనూ ఈ సమావేశానికి ఆహ్వానించారు. అనారోగ్యం కారణంగా అమరీందర్‌సింగ్‌ రాలేకపోతున్నట్లు సమాచారం అందింది. దేవెగౌడ వస్తున్నందున కుమారస్వామి రాకపోవచ్చన్న అభిప్రాయముంది.

* బీఎస్పీ అగ్రనేత మాయావతి హాజరుపై సందిగ్ధం కొనసాగుతోంది. అయితే, పార్టీ తరఫున సతీశ్‌చంద్ర పాల్గొనవచ్చని చెబుతున్నారు.
* బీజేడీ అధ్యక్షుడు, ఒడిశా సీఎం నవీన్‌ పట్నాయక్‌ సమావేశానికి రాకపోవచ్చని, సాధారణ ఎన్నికల తర్వాత ఆయన కూటమిలో చేరే అవకాశం ఉందని తెలుస్తోంది.
* సమావేశానికి తప్పకుండా హాజరవుతానని సమాజ్‌వాదీ పార్టీ అగ్రనేత ములాయంసింగ్‌ లఖ్‌నవూలో పేర్కొన్నారు. లేనిపక్షంలో ఎస్పీ అధ్యక్షుడు అఖిలేష్‌యాదవ్‌గానీ, పార్టీ నేత రాంగోపాల్‌యాదవ్‌ రావచ్చని తెలుస్తోంది.

సమావేశంలో చర్చలిలా..
భాజపాయేతర కూటమి ఏర్పాటుకు భవిష్యత్తు కార్యాచరణను సిద్ధం చేయడమే ప్రధాన అజెండాగా సమావేశం నిర్వహిస్తున్నట్లు తెలుస్తోంది. ఈ సమావేశంలో నేతలు తమ ఆలోచనల్ని పంచుకొని, భవిష్యత్తు కార్యాచరణను, అజెండాను ఖరారు చేయనున్నారు. కూటమి పార్టీలు జాతీయ స్థాయిలో ఎలా కలిసి పని చేయాలి, వారివారి రాష్ట్రాల పరిధిలో ఎలా ముందుకెళ్లాలన్న దానిపై ఒక అవగాహనకు రానున్నారు. ఈ వేదిక మీదికి వస్తున్న పార్టీల్లో పశ్చిమబెంగాల్‌లో సీపీఎం-తృణమూల్‌, కేరళలో సీపీఎం-కాంగ్రెస్‌, దిల్లీలో కాంగ్రెస్‌-ఆప్‌ల మధ్య ప్రత్యక్ష పోటీ ఉంది. అలాంటి రాష్ట్రాల్లో ఎలాంటి వైఖరితో వెళ్లాలి, మిగిలిన చోట్ల ఎలాంటి సమన్వయంతో వెళ్లాలి వంటి అంశాలనూ ఇందులో చర్చించి కార్యాచరణను ఖరారు చేయనున్నారు. రైతాంగ సమస్యలు, నిరుద్యోగం, పెద్దనోట్ల రద్దు, రఫేల్‌ కుంభకోణం, జీఎస్‌టీ, చమురు ధరలు, రాజకీయ ప్రత్యర్థులపై ఈడీ, ఐటీ దాడులు వంటి ప్రధాన అంశాలను అజెండాగా చేసుకొని ముందుకెళ్లడంపై ఒక కార్యాచరణను రూపొందించవచ్చన్న అభిప్రాయం ఉంది.

పోరాటానికి రూపమిలా..
వివిధ రాష్ట్రాల్లో బహిరంగ సభలు, ర్యాలీలు, చర్చా వేదికలు, రైతు సదస్సులు, విశ్వవిద్యాలయాల సందర్శనలు, బస్సు యాత్రల్లాంటి వినూత్న కార్యక్రమాలకు ఈ సమావేశంలో రూపకల్పన చేసే అవకాశం ఉన్నట్లు అంచనా. ఏ అంశాన్ని ఏ విధంగా ప్రజల్లోకి తీసుకెళ్లాలన్న అంశంపైనా అందరి అభిప్రాయాలు తీసుకొని ఒక్కోదానికి ఒక్కో రూపం ఇవ్వాలని నిర్ణయించనున్నారు. ఏపీకి ప్రత్యేక హోదా, విభజన హామీల అమలు, నిధుల విడుదలలో కేంద్రం చేస్తున్న అన్యాయాన్ని రాష్ట్ర అజెండాగా ఖరారు చేస్తారని తెలుస్తోంది. అదే తరహాలో కూటమి పార్టీలకు ఆయా రాష్ట్రాల్లోని ప్రధాన సమస్యలను స్థానిక అజెండాలుగా నిర్ణయించి వాటిపై ఒక కార్యాచరణ రూపొందిస్తారని సమాచారం. జాతీయ స్థాయి ప్రధాన సమస్యలపై ఉమ్మడి అజెండాను ఖరారు చేస్తారని తెలిసింది.

సోనియా, రాహుల్‌తో స్టాలిన్‌ భేటీ
విపక్షాల భారీ కూటమి సమావేశానికి ఒకరోజు ముందు ఆదివారం డీఎంకే అధ్యక్షుడు స్టాలిన్‌ యూపీఏ ఛైర్‌పర్సన్‌ సోనియాగాంధీ, కాంగ్రెస్‌ అధ్యక్షుడు రాహుల్‌గాంధీలతో సమావేశమై వివిధ అంశాలను చర్చించారు. స్టాలిన్‌తోపాటు డీఎంకే నేతలు కనిమొళి, ఎ.రాజా సోనియాను కలిసి, ఆమెకు జన్మదిన శుభాకాంక్షలు తెలిపారు.

తెదేపా పార్లమెంటరీ పార్టీ సమావేశం
ఏపీ సీఎం చంద్రబాబు సోమవారం ఉదయం 11 గంటలకు దిల్లీకి చేరుకుంటారు. 3.30 వరకు ఏపీభవన్‌లో వివిధ పార్టీల నేతలతో సమాలోచనలు జరుపుతారు. అనంతరం మిత్రపక్షాల సమావేశానికి వెళ్తారు. సాయంత్రం ఏపీభవన్‌లో నిర్వహించే తెలుగుదేశం పార్లమెంటరీ పార్టీ సమావేశంలో పార్లమెంటు శీతాకాల సమావేశాల్లో పార్టీ తరఫున అనుసరించాల్సిన వైఖరిపై ఎంపీలకు చంద్రబాబు దిశానిర్దేశం చేయనున్నారు.

జాతీయ రాజకీయాలకు మలుపు..
ప్రస్తుతానికి 14 పార్టీలు ఈ సమావేశంలో పాల్గొనడానికి సుముఖత వ్యక్తం చేసినా, 5 రాష్ట్రాల ఎన్నికల తర్వాత మరిన్ని పార్టీలు వస్తాయని కాంగ్రెస్‌, తెదేపా నేతలు విశ్వసిస్తున్నారు. సోమవారం నాటి సమావేశం అనంతరం కూటమి నేతలు ఉమ్మడిగా విలేకర్ల ముందుకొచ్చి తమ భవిష్యత్తు కార్యాచరణను ప్రకటించే అవకాశం ఉన్నట్లు సమాచారం. సార్వత్రిక ఎన్నికలకు సమయం ఎంతో దూరం లేనందున కూటమి కార్యకలాపాలను వేగంగా ముందుకు తీసుకెళ్తారని అంచనా వేస్తున్నారు. తొలి సమావేశానికి ఎవరైనా రాకపోయినా భవిష్యత్తులో కచ్చితంగా పాల్గొంటారని కూటమి నేతలు ధీమా వ్యక్తం చేస్తున్నారు. ఇది భావసారూప్య పార్టీల తొలి కలయిక మాత్రమేనని, మొదటిసారే అన్ని పార్టీలూ భాగస్వాములవ్వాలన్న నిబంధన ఏమీ లేదు కాబట్టి సమయం, సందర్భాన్ని బట్టి కొత్త పార్టీలు కలుస్తూ పోతాయని విశ్వసిస్తున్నారు. ఈ తొలి సమావేశానికి ఎవ్వరూ నాయకత్వం వహించడం లేదని, నేతలంతా ఒకరితో ఒకరు మాట్లాడుకొని అందరూ కలిసి ఒకే వేదికపైకి వస్తున్నట్లు కూటమి పార్టీల నేతలు చెప్పారు. మోదీకి వ్యతిరేకంగా జరుగుతున్న ఈ భారీ భేటీ జాతీయ రాజకీయాలను కచ్చితంగా మలుపు తిప్పుతుందని దిల్లీలో ఏపీ ప్రభుత్వ ప్రత్యేక ప్రతినిధి కంభంపాటి రామ్మోహన్‌రావు పేర్కొన్నారు. దేశంలోని రాజకీయ పార్టీలు వచ్చే సార్వత్రిక ఎన్నికల నాటికి మోదీకి అనుకూలమా, వ్యతిరేకమా? అని తేల్చుకోక తప్పని పరిస్థితి వస్తుందని అభిప్రాయపడ్డారు. ఈ కూటమికి ఏదైనా పేరుపెట్టాలా? లేదంటే యూపీఏ పేరుతోనే ముందుకెళ్లాలా? అనేది కూడా ఈ సమావేశంలో చర్చించి నిర్ణయం తీసుకోవచ్చని ఒక ప్రశ్నకు సమాధానంగా చెప్పారు.

ముఖ్యాంశాలు

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.