latest breaking telugu news
close

తాజావార్తలు

టాప్‌ 10 న్యూస్‌ @ 9PM

1. పాకిస్థాన్‌ ప్రధానిగా ఇమ్రాన్‌ఖాన్ ఎన్నిక లాంఛనమైంది. శుక్రవారం దిగువ సభలో జరిగిన ఎన్నికల్లో మెజార్టీ సభ్యులు ఇమ్రాన్‌కే మద్దుతు తెలిపారు. పాకిస్థాన్‌ తెహ్రీక్‌ ఈ-ఇన్సాఫ్‌ పార్టీ అధినేత ఇమ్రాన్‌కు 176ఓట్లు పడగా, ప్రతిపక్ష పీఎమ్‌ఎల్‌-ఎన్‌ నేత షెహ్‌బాజ్‌కు 96ఓట్లు పడ్డాయి. స్పీకర్‌ అసాద్‌ ఖైసర్‌ అధ్యక్షతన ప్రారంభమైన ఈ సమావేశాల్లో ఇమ్రాన్‌ ఖాన్ తరఫు సభ్యులకు ‘ఏ’ లాబీ, షెహబాజ్‌ మద్దతుదారులకు ‘బి’ లాబీ కేటాయించారు. ఓపెన్‌ బ్యాలెట్‌ పద్దతిన సాగిన ఈ ఓటింగ్‌లో కాసేపు ఉత్కంఠ నెలకొంది. ఒక్కొక్క సభ్యుడు ముందుకు వచ్చి తాము మద్దతివ్వబోయే వారి పేరు చెప్పి వారికి కేటాయించిన లాబీల్లో కూర్చున్నారు. దీంతో ఇమ్రాన్‌కు 176మంది సభ్యుల మద్దతు లభించింది. పూర్తి వార్త కోసం క్లిక్‌ చేయండి

2. ప్రధానమంత్రి నరేంద్రమోదీ కేరళకు బయలుదేరారు. కేరళలో వరద బీభత్సంపై ఈరోజు రాత్రి ఆ రాష్ట్ర ముఖ్యమంత్రి పినరయి విజయన్‌, అధికారులతో ప్రధాని సమీక్షించనున్నారు. రేపు ఉదయం వరద ప్రభావిత ప్రాంతాల్లో విహంగ వీక్షణం ద్వారా పరిస్థితిని అంచనావేయనున్నారు. వరదల కారణంగా కేళలో ఇప్పటి వరకూ 324 మంది మృతిచెందగా, 2,23,139 మంది నిరాశ్రయులయ్యారు. 13 జిల్లాల్లో 1500కు పైగా పునరావాస శిబిరాలు ఏర్పాటు చేశారు.

3. వరదలతో అతలాకుతలమవుతున్న కేరళకు తెలంగాణ ప్రభుత్వం రూ.25 కోట్ల సాయాన్ని ప్రకటించింది. తక్షణమే కేరళ ప్రభుత్వానికి వరద సాయం అందజేయాల్సిందిగా తెలంగాణ సీఎం కేసీఆర్‌ ప్రభుత్వ ప్రధాన కార్యదర్శి శైలేంద్ర కుమార్‌ జోషిని ఆదేశించారు. కేరళలో వరద బీభత్సానికి గత తొమ్మిది రోజుల్లో 324 మంది మృతిచెందినట్లు సీఎం పినరయి విజయన్‌ కొద్దిసేపటి క్రితం ప్రకటించారు.

4. భారీ వర్షాలతో పాటు కొండచరియలు విరిగిపడుతుండటంతో కేరళ ప్రజలు అల్లాడుతున్నారు. వరద బీభత్సం కారణంగా దాదాపు రెండు లక్షల మందికిపైగా నిరాశ్రయులవ్వగా, వేలాది హెక్టార్లలో పంటలు దెబ్బతిన్నాయి. రాష్ట్రంలోని 14 జిల్లాల్లో ప్రజలు బిక్కుబిక్కు మంటూ కాలంగడుపుతున్నారు. గడిచిన వందేళ్లలో ఎప్పుడూ ఇలాంటి వరద బీభత్సం చూడలేదని కేరళ ముఖ్యమంత్రి పినరయి విజయన్‌ తెలిపారు. 80 డ్యామ్‌ల గేట్లు తెరిచి నీటిని దిగువకు విడుదల చేస్తున్నారు. ఈ వారాంతం వరకూ వర్షాలు కురుస్తాయన్న వాతావరణశాఖ హెచ్చరికతో కేరళ వాసులు మరింత భయాందోళనకు గురవుతున్నారు. పూర్తి వార్త కోసం క్లిక్‌ చేయండి

5.మూడు రోజులుగా కురుస్తున్న వర్షాలతో తెలంగాణ ప్రభుత్వం ప్రతిష్ఠాత్మకంగా చేపట్టిన కాళేశ్వరం ప్రాజెక్టు పనులు నిలిచిపోయాయి. జయశంకర్‌ భూపాలపల్లి జిల్లా మహదేవపూర్‌ మండలంలో నిర్మిస్తున్న కాళేశ్వరం ప్రాజెక్టు పరిస్థితిని ఉన్నతాధికారులు ఎప్పటికప్పుడు పర్యవేక్షిస్తున్నారు. ఎల్లంపల్లి వద్ద గేట్లు ఎత్తివేయడంతో నీటిని దిగువకు వదిలారు. ఈ క్రమంలో భారీగా ప్రవాహం వస్తుండటంతో ముందస్తు చర్యలు చేపడుతున్నారు. కాళేశ్వరం ప్రాజెక్టులోని మొదటి, రెండో బ్యారేజి‌ అన్నారం, మేడిగడ్డ వద్ద భారీ ప్రవాహం ఉన్నందున ఇంజినీరింగ్‌, పోలీస్‌ ఉన్నతాధికారులు జాగ్రత్త చర్యలు తీసుకుంటున్నారు. పూర్తి వార్త కోసం క్లిక్‌ చేయండి

6. భద్రాచలం వద్ద గోదావరి నీటి మట్టం వేగంగా పెరుగుతోంది. ప్రస్తుతం 47.3 అడుగుల స్థాయి వద్ద ఉద్ధృతంగా ప్రవహిస్తోంది. గత రాత్రి 11.20 నిమిషాలకు 43 అడుగులు దాటడంతో భద్రాచలం సబ్‌కలెక్టర్‌ భవేశ్‌ మిశ్రా మొదటి ప్రమాద హెచ్చరిక జారీ చేశారు. ప్రస్తుతం 47.3 అడుగులు ఉన్న నీటి మట్టం 48 అడుగులకు దాటితే అధికారులు రెండో ప్రమాద హెచ్చరిక జారీ చేయనున్నారు. వరద నీరు భారీగా రావడంతో భద్రాచలం వద్ద స్నాన ఘట్టాలు విద్యుత్‌ స్తంభాలు వరద నీటిలో మునిగి పోయాయి. పూర్తి వార్త కోసం క్లిక్‌ చేయండి

7. భారత మాజీ ప్రధాని, భారతరత్న అటల్‌ బిహారీ వాజ్‌పేయీ మృతిపట్ల పాకిస్థాన్‌ ప్రభుత్వంతో సహా ఆ దేశ ప్రముఖ నేతలంతా సంతాపం ప్రకటించారు. రెండూ దాయాది దేశాలైనప్పటికీ పాక్‌తో శాంతి నెలకొల్పేందుకు చేసిన కృషి కారణంగా ఆయనకు పాక్‌లో కూడా అభిమానులుండడం గమనార్హం. పాకిస్థాన్‌ ప్రధానిగా బాధ్యతలు చేపట్టనున్న ఇమ్రాన్‌ఖాన్‌ వాజ్‌పేయీ మృతికి సంతాపం తెలిపారు. భారత్‌-పాకిస్థాన్‌ల మధ్య శాంతి నెలకొల్పేందుకు ఆయన చేసిన కృషి ఎన్నటికీ మరువలేనిదని పేర్కొన్నారు. పూర్తి వార్త కోసం క్లిక్‌ చేయండి

8. కేరళలో ప్రకృతి విలయ తాండవం చేస్తోంది. ఒక్కరోజులోనే మృతుల సంఖ్య తీవ్రంగా పెరిగింది. గడిచిన తొమ్మిది రోజుల్లో ప్రాణ నష్టం 324కు చేరిందని ముఖ్యమంత్రి పినరయి విజయన్‌ వెల్లడించారు. రాష్ట్రం ఎదుర్కొంటున్న విపత్కర పరిస్థితులపై తాజాగా అప్రమత్తత ప్రకటిస్తూ నివేదిక విడుదల చేశారు. దాదాపు 2 లక్షల మంది నిరాశ్రయులయ్యారు. భారీ వర్షాల కారణంగా వరదలతో అతలాకుతలం అవుతున్న రాష్ట్రాన్ని కొండ చరియలు మరింత ఇబ్బంది పెడుతున్నాయి. ఈ రోజు పరిస్థితి మరింత తీవ్రంగా మారిపో్యింది. పలు ఆసుపత్రులు తీవ్ర ఆక్సిజన్ కొరతను ఎదుర్కొంటున్నాయి. తీవ్ర ఇంధన కొరతతో సతమవుతోంది. యుద్ధ ప్రాతిపదికన సహాయ చర్యలు కొనసాగుతున్నాయి. పరిస్థితిని ప్రధాని మోదీకి వివరించినట్లు విజయన్‌ తెలిపారు. పూర్తి వార్త కోసం క్లిక్‌ చేయండి

9. విశాఖ కేంద్రంగా ప్రత్యేక రైల్వేజోన్‌ సాధించేందుకు అంతిమ పోరాటానికి సిద్ధమవుతున్నట్లు "ప్రత్యేక రైల్వేజోన్ సాధన సమితి'' కన్వీనర్ జె.వి.సత్యనారాయణ మూర్తి ఇవాళ విశాఖలో తెలిపారు. ఈ నెలాఖరున రైల్వేజోన్ సాధన సమితి ప్రతినిధులు ఆఖరి ప్రయత్నంగా ఢిల్లీ పెద్దలను కలిసి రైల్వేజోన్‌ కోసం చర్చించనున్నట్లు సత్యనారాయణ మూర్తి చెప్పారు. అప్పటికీ కేంద్రం స్పందించకపోతే సెప్టెంబరులో విశాఖపట్నం నుంచి శ్రీకాకుళం వరకు ఎక్కడికక్కడ రైల్వే మార్గాలను ఆపేసి రైల్‌రోకో చేస్తామని హెచ్చరించారు. పూర్తి వార్త కోసం క్లిక్‌ చేయండి

10. మాజీ ప్రధాని, భారతరత్న అటల్‌ బిహారీ వాజ్‌పేయీ అంత్యక్రియలు అభిమానులు, సన్నిహితుల కన్నీటి వీడ్కోలు మధ్య ప్రభుత్వ లాంఛనాలతో ముగిశాయి. యమునా నదీ తీరంలోని రాష్ట్రీయ స్మృతిస్థల్‌లో అంతిమ సంస్కారాలు నిర్వహించారు. అటల్‌ దత్తపుత్రిక నమిత.. వాజ్‌పేయీ చితికి నిప్పంటించగా, హిందూ సంప్రదాయం ప్రకారం దహన సంస్కారాలు పూర్తి చేశారు. అంతకుముందు రాష్ట్రపతి రామ్‌నాథ్‌ కోవింద్‌, ఉపరాష్ట్రపతి వెంకయ్యనాయుడు, ప్రధానమంత్రి నరేంద్రమోదీ, భూటాన్‌ రాజు వాంగ్‌చుక్‌, లోక్‌సభ స్పీకర్‌ సుమిత్రా మహాజన్‌, రక్షణ మంత్రి నిర్మలా సీతారామన్‌, త్రివిధ దళాధిపతులు, మాజీ ప్రధాని మన్మోహన్‌సింగ్‌, భాజపా జాతీయ అధ్యక్షుడు అమిత్‌షా, సీనియర్‌ నేతలు అడ్వాణీ సహా పలువురు స్మృతి స్థల్‌లో మహానేతకు నివాళులర్పించారు. పూర్తి వార్త కోసం క్లిక్‌ చేయండి


రాజకీయం

జనరల్‌

సినిమా

మరిన్ని

క్రైమ్

మరిన్ని

స్పోర్ట్స్

మరిన్ని

బిజినెస్‌

మరిన్ని

జాతీయ-అంతర్జాతీయ

మరిన్ని
జిల్లా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.