latest breaking telugu news
close

తాజావార్తలు

టాప్‌ 10 న్యూస్‌ @ 9 PM

1. పటాన్‌చెరు మాజీ ఎమ్మెల్యే సత్యనారాయణ తెరాసలో చేరారు. మంత్రి హరీశ్‌రావు ఆయన్ను పార్టీలోకి ఆహ్వానించారు. మాజీ ఎమ్మెల్యే సత్యనారాయణకు మరోమంత్రి నాయిని నరసింహారెడ్డి కండువా కప్పి పార్టీలో చేర్చుకొన్నారు. ఈ సందర్భంగా హరీశ్‌రావు మాట్లాడుతూ కార్మిక నాయకుడు సత్యనారాయణ చేరికతో మెదక్‌ జిల్లాలో తెరాస పార్టీ బలోపేతమైందని అన్నారు. మెదక్‌ జిల్లాలో తెరాస జెండాను ఎగురవేసి కేసీఆర్‌కు కానుకగా ఇస్తామని హరీశ్‌రావు తెలిపారు. పూర్తి వార్త కోసం క్లిక్‌ చేయండి

2. కలియుగ వైకుంఠం భక్తజనసంద్రమైంది. శ్రీమహావిష్ణువు అనుంగు వాహనమైన గరుత్మంతునిపై అఖిలాండకోటి బ్రహ్మాండనాయకుడిని వీక్షించేందుకు వేలాదిమంది భక్తులు తరలివచ్చారు. మూలవిరాట్టుకు అలంకరించే మకరకంఠి, సహస్రనామ మాల వంటి విశిష్ట ఆభరణాలను ధరించిన మలయప్పస్వామి గరుడునిపై ఆసీనులై తిరుమాడవీధుల విహరిస్తుంటే చూడటం ఎంతో పుణ్యదాయకం. త్రేతాయుగంలో గరుడాద్రి పేరు ప్రధానంగా ఉండేదని వామన పురాణం తెలుపుతుంది. అల వైకుంఠములోని వేంకటమను విష్ణుదేవుని క్రీడాపర్వతాన్ని వరాహ విష్ణుదేవుని ఆదేశానుసారం గరుత్మంతుడు భూమికి తీసుకువచ్చి సువర్ణముఖికి ఉత్తరంగా ప్రతిష్టించాడు. పూర్తి వార్త కోసం క్లిక్‌ చేయండి

3. తెలంగాణలో నిర్వహించిన పోలీస్‌ కానిస్టేబుల్‌ ప్రాథమిక అర్హత పరీక్ష ఫలితాలు విడుదలయ్యాయి. ఈ పరీక్షలో 50.09శాతం మంది అభ్యర్థులు అర్హత సాధించారు. ఈ ఫలితాలను టీఎస్‌ఎల్‌పీఆర్‌బీ వెబ్‌సైట్‌లో అందుబాటులో ఉంచారు. 16,925 పోస్టులకు సెప్టెంబర్‌ 30న ఈ పరీక్షలను నిర్వహించారు. పూర్తి వార్త కోసం క్లిక్‌ చేయండి

4. తెలంగాణ రాష్ట్రంలో ఏఐసీసీ జాతీయ అధ్యక్షుడు రాహుల్ గాంధీ పర్యటన కార్యక్రమాలు ఖరారైయ్యాయి. ఈ నెల 20న ఎన్నికల ప్రచారంలో రాహుల్ గాంధీ పాల్గొననున్నారు. 20వ తేదీ ఉదయం 10.30నిమిషాలకు శంషాబాద్‌ చేరుకొని11గంటలకు చార్మినార్ వద్ద ఏర్పాటు చేసిన రాజీవ్‌ గాంధీ ‘సద్భావన యాత్ర’ సభలో పాల్గొంటారు. అదే యాత్రలో మాజీ ముఖ్యమంత్రి కొణిజేటి రోశయ్యకు ‘రాజీవ్‌ గాంధీ సద్భావన స్మారక అవార్డు’ను అందజేయనున్నారు. అనంతరం మధ్యాహ్నం 12.45నిమిషాలకు ఆదిలాబాద్ జిల్లా బైంసాలో ఎన్నికల సభలో పాల్గొంటారు. సాయంత్రం 4.45నిమిషాలకు కామారెడ్డిలో నిర్వహించే బహిరంగ సభకు హాజరై అనంతరం రాత్రి దిల్లీకి తిరుగుపయనమవుతారు. పూర్తి వార్త కోసం క్లిక్‌ చేయండి

5. నల్గొండ జిల్లా నాంపల్లి మండలం దామర గ్రామానికి చెందిన ఓ వివాహిత(26)పై అదే గ్రామానికి చెందిన బి. మహేశ్ అనే వ్యక్తి‌ యాసిడ్‌తో దాడి చేశాడు. బాధితురాలు పోలీసులకు ఫిర్యాదు చేయడంతో ఈ ఘటన వెలుగులోకి వచ్చింది. మహేశ్‌ శనివారం రాత్రి ఆమెపై అత్యాచార యత్నానికి పాల్పడగా.. ప్రతిఘటించింది. దీంతో నిందితుడు యాసిడ్‌తో దాడి చేశాడు. గతంలోనే ఇదే తరహాలో ఆమెను వేధింపులకు గురిచేయడంతో మహేశ్‌పై పోలీసులు ఎస్సీ, ఎస్టీ అట్రాసిటీ కేసును నమోదు చేశారు. పూర్తి వార్త కోసం క్లిక్‌ చేయండి

6. అరకు ఎమ్మెల్యే కిడారి సర్వేశ్వరరావు, మాజీ ఎమ్మెల్యే సివేరి సోమ హత్యకేసు దర్యాప్తులో కీలక పరిణామాలు చోటు చేసుకున్నాయి. వీరిని హత్య చేసేందుకు మావోయిస్టులకు సహకరించిన నలుగురు వ్యక్తులను ఆదివారం పోలీసులు అరెస్టు చేశారు. యేడేల సుబ్బారావు, గెమ్మెలి శోభన్‌, యేడేల ఈశ్వరి, కొర్రా కమలను అదుపులోకి తీసుకున్న పోలీసులు... వారి వద్ద నుంచి 10 కిలోల మందుపాతర, కరపత్రాలను స్వాధీనం చేసుకొన్నారు. నిందితులను డుంబ్రిగూడ మండలం లివిటిపుట్టులో అదుపులోకి తీసుకున్నారు. మావోయిస్టుల సిద్ధాంతాలకు ఆకర్షితులై వారు సానుభూతిపరులుగా మారినట్లు పోలీసులు గుర్తించారు. పూర్తి వార్త కోసం క్లిక్‌ చేయండి

7. ఉత్తర్‌ప్రదేశ్‌లోని అలహాబాద్‌ పేరును ప్రయాగ్‌రాజ్‌గా మార్చాలంటూ ప్రజల నుంచి వస్తున్న డిమాండ్లను ఆ రాష్ట్రముఖ్యమంత్రి యోగి ఆదిత్యనాథ్‌ త్వరలోనే నెరవేర్చనున్నారు. వచ్చే ఏడాది జనవరిలో జరిగే అర్ధ కుంభమేలా కంటే ముందుగానే అలహాబాద్‌ను ప్రయాగ్‌రాజ్‌గా మారుస్తామని యోగి తాజాగా వెల్లడించారు. ‘2019 కుంభమేళా కంటే ముందుగానే అలహాబాద్‌ పేరును ప్రయాగ్‌రాజ్‌గా మార్చాలని ఇటీవల జరిగిన మార్గదర్శక మండలి సమావేశంలో అఖాడ పరిషత్‌ ప్రతిపాదించింది. ఇప్పటికే గవర్నర్‌ కూడా దీనికి ఆమోదం తెలిపారు. త్వరలోనే అలహాబాద్‌ పేరును మారుస్తాం’ అని యోగి ఆదిత్యనాథ్‌ అన్నారు. పూర్తి వార్త కోసం క్లిక్‌ చేయండి

8. భారత కంపెనీలు ఐరోపాలో అద్భుతాలు చేస్తున్నాయి. జర్మనీలో 74 భారతీయ సంస్థలు 11 బిలియన్‌ యూరోల రాబడి ఆర్జించాయి. దాదాపు 23,300 ఉద్యోగాలు సృష్టించాయి. ఈవై, ఇండో జర్మన్‌ ఛాంబర్‌ ఆఫ్‌ కామర్స్‌, సీఐఐ చేపట్టిన ‘జర్మనీలో భారత పెట్టుబడులు: 2018’ సర్వేలో ఈ విషయాలు వెల్లడయ్యాయి. భారత కంపెనీలు కేవలం నాలుగు రంగాల్లోనే 95 శాతం ఆదాయం సముపార్జించడం గమనార్హం. ‘213కు పైగా భారత సబ్సిడరీ సంస్థలు ఉండగా అందులో 74 కంపెనీల వార్షిక టర్నోవర్‌ 10 మిలియన్ల యూరోలు దాటింది. ఆటోమోటివ్‌, లోహాలు, లోహ అనుబంధ పరిశ్రమ, శాస్త్రసాంకేతిక రంగాల్లోనే ఎక్కువ లాభాలు ఆర్జించాయి. అద్భుతమైన మౌలిక సదుపాయాలు, పరిశోధనకు, నైపుణ్యమున్న కార్మికశక్తి, వ్యాపార అనుకూల పరిస్థితులు ఉండటంతో భారత కంపెనీలు లాభాల బాటను అనుసరించాయి’ అని సర్వే పేర్కొంది. పూర్తి వార్త కోసం క్లిక్‌ చేయండి

9. టీమిండియా ఒకప్పటి ఓపెనర్‌ గౌతమ్‌ గంభీర్‌కు బ్యాటింగ్‌ దిగ్గజం సచిన్‌ తెందుల్కర్‌ శుభాకాంక్షలు తెలియజేశాడు. గౌతీ ఆదివారం 37వ వసంతంలోకి అడుగుపెట్టాడు. ఈ సందర్భంగా అతడికి సచిన్‌, శిఖర్‌ ధావన్‌, అభిమానులు జన్మదిన శుభాకాంక్షలు తెలియజేశారు. ‘గంభీర్‌.. ప్రపంచకప్‌ ఫైనల్లో నీ ఇన్నింగ్స్‌ ఎప్పటికీ గుర్తుంటుంది. ఈ ఏడాదంతా నీకు బాగుండాలి’ అని సచిన్‌ ట్వీట్‌ చేశాడు. ‘గౌతమ్‌ గంభీర్‌ మంచి మనసున్న నిజమైన మనిషి నువ్వు. ఎప్పుడూ ఇలాగే ముందుకు సాగిపోవాలి’ అని శిఖర్‌ ధావన్‌ శుభాకాంక్షలు తెలిపాడు. పూర్తి వార్త కోసం క్లిక్ చేయండి

10. ఎన్టీఆర్‌ కథానాయకుడిగా నటించిన ‘అరవింద సమేత వీరరాఘవ’ మరో రికార్డును సృష్టించింది. తొలి వారాంతానికి రూ.100 కోట్లను(గ్రాస్‌) కలెక్షన్లను వసూలు చేసింది. ఈ నెల 11న ప్రేక్షకుల ముందుకు వచ్చిన చిత్రం బాక్సాఫీస్‌ వద్ద మంచి టాక్‌ తెచ్చుకుంది. ఎన్టీఆర్‌ నటన, త్రివిక్రమ్‌ దర్శకత్వం శైలికి ఇటు అభిమానుల నుంచే కాకుండా, చిత్ర పరిశ్రమ వర్గాల నుంచి ప్రశంసలు లభించాయి. తొలివారాంతంలోనే ‘అరవింద సమేత..’ రూ.100కోట్లు(గ్రాస్‌) వసూలు చేసినట్లు చిత్ర బృందం వెల్లడించింది. పూర్తి వార్త కోసం క్లిక్‌ చేయండి


రాజకీయం

జనరల్‌

సినిమా

మరిన్ని

క్రైమ్

మరిన్ని

స్పోర్ట్స్

మరిన్ని

బిజినెస్‌

మరిన్ని

జాతీయ-అంతర్జాతీయ

మరిన్ని
జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.