ఎండ తగలక కాబోలు!
close

తాజావార్తలు

ఎండ తగలక కాబోలు!
పెళుసుబారుతున్న ఎముకలు
నగరంలో పెరుగుతున్న సమస్య
సూర్యరశ్మికి దూరంగా జనం
60 శాతం మందిలో విటమిన్‌ డి లోపం
నేడు బోలు ఎముకల వ్యాధి దినం
లక్షణాలు
* తరచూ వెన్ను నొప్పి
* నిర్దేశిత వయసుకు ముందే ఎముకల ఎదుగుదల ఆగిపోవడం
* ఎత్తు పెరగకపోవడం
* కాళ్లు, చేతి ఎముకల్లో చీలిక రావడం
* తుంటి కీలు దెబ్బతినటం
* వెన్నెముక వంగటం
* మణికట్టు వద్ద సమస్య

కారణాలు
* సూర్యరశ్మికి దూరంగా ఏసీ గదులకు పరిమితం కావడం
* విటమిన్‌ డి, కాల్షియం లోపం
* పర్యావరణ కాలుష్యం
* మహిళల్లో ఈస్ట్రోజన్‌ హార్మోన్‌ తగ్గిపోవడం
* ఎముకలోని కణజాలం క్షీణించడం
* ఎముకల నిర్మాణ శైలిలో మార్పులు
* వృద్ధాప్యం

ఈనాడు, హైదరాబాద్‌
నగరంలో చాప కింద నీరులా బోలు ఎముకల వ్యాధి(ఆస్టియోపొరోసిస్‌) విస్తరిస్తోంది. ఎక్కువ శాతం మంది ఏసీ గదులకు పరిమితం కావడంతో సూర్యరశ్మికు దూరంగా ఉంటున్నారు. డి విటమిన్‌ శరీరానికి అందడం లేదు. సరైన ఆహారపుటలవాట్లు పాటించక సరైన మోతాదులో కాల్షియం శరీరానికి అందడం లేదు. ఎముకల్లో బలహీనత ఏర్పడుతోంది. పురుషులకంటే మహిళలు ఎక్కువ శాతం మంది ఈ వ్యాధి బారిన పడుతున్నట్లు వైద్య నిపుణులు పేర్కొంటున్నారు. ఇతమిద్ధంగా అధ్యయనాలు లేనప్పటికీ మహిళల్లో 20 శాతం మంది ఈ సమస్య ఎదుర్కొంటున్నారు. పురుషుల్లో 10-12 శాతం మంది బారిన పడుతున్నట్లు అంచనా. ఎముకలోని కణజాలం క్షీణించడం, ఎముక నిర్మాణశైలిలో మార్పులు రావడం వల్ల ఎముకల్లో వ్యాధి నిరోధక శక్తి సన్నగిల్లుతుంది. శరీరంలోని కణజాలాలతో ఎముక రూపుదిద్దుకుంటుంది. ఎముకలు బలహీనపడి పెళుసుబారడం ఈ వ్యాధి లక్షణం. ఏ ఎముకపై అయినా ప్రభావం చూపించవచ్చు. తుంటి(హిప్‌) ఎముక, వెన్నెముక, మణికట్టు ఎముకలపై ఎక్కువ ప్రభావం ఉంటుంది. తరచూ ఎముకలు విరిగిపోయే ప్రమాదం ఉంది. వయస్సు పెరిగేకొద్దీ పురుషులు, మహిళల్లో ఎముకల సాంద్రత తగ్గుతుంది. మహిళల్లో మెనోపాజ్‌ తర్వాత ఈస్ట్రోజన్‌ తగ్గి ఆ ప్రభావం ఎముకలపై పడి ఈ వ్యాధికి దారి తీస్తుంది. రుమటాయిడ్‌ ఆర్థరైటిస్‌, క్రానిక్‌ అబ్‌స్ట్రెక్టివ్‌ పల్మనరీ డిసీజ్‌(సీవోపీడీ) కూడా బోలు ఎముకల వ్యాధికి కారణమవుతాయి. శనివారం ప్రపంచ ఆస్టియోపొరోసిస్‌ దినం సందర్భంగా నగరంలో పరిస్థితిపై కథనం.

ఎండకు దూరంగా..
నగరంలో అపార్ట్‌మెంట్‌ జీవనంతో చాలామంది సూర్యరశ్మికి దూరంగా ఉంటున్నారు. గంటల తరబడి ఏసీ గదులకు పరిమితమవుతున్నారు. దీంతో తగినంత ఎండ తగలడం లేదు. రాత్రిపూట ఉద్యోగాలు చేసేవారు పగలు ఆలస్యంగా నిద్ర లేవడం, ఇంటికే పరిమితం కావడంతో ఇలాంటి వారికీ సూర్యరశ్మి తగలడం లేదు. నగరంలో దాదాపు 60 శాతం మంది డి విటమిన్‌ సమస్యను ఎదుర్కొంటున్నారని వైద్యులు చెబుతున్నారు. జంక్‌ ఫుడ్స్‌ వినియోగం పెరిగింది. కాల్షియం ఎక్కువగా ఉండే ఆకు కూరలు, సోయా ఉత్పత్తులులాంటి వాటికి దూరంగా ఉంటున్నారు. వ్యాయామం చేసేటప్పుడు సూర్యరశ్మి తగిలేలా చూసుకోవాలి. చేపలు, పాలు, గుడ్లు, ఆకుకూరలు, పప్పు దినుసులు తీసుకోవడం ముఖ్యం.

ఈ జాగ్రత్తలు అవసరం:
* తక్కువ కొవ్వు ఉన్న పాల ఉత్పత్తులు తీసుకోవడం.
* ఆకు కూరలు ఎక్కువగా తినడం
* సోయాబీన్‌ ఉత్పత్తులు ఆహారంలో ఉండేలా చూసుకోవడం
* కాల్షియం ఆధారిత జ్యూస్‌లు తాగడం
* నిత్యం 30 నిమిషాలు శరీరానికి ఎండ తాకేలా చూసుకోవడం
* రోజూ 45 నిమిషాలు వ్యాయామం చేయడం
* కాల్షియం, విటమిన్‌ డి ఎక్కువగా ఉండే ఆహారం తీసుకోవడంవ్యాయామం ఎంతో మేలు చేస్తుంది

- డాక్టర్‌ నరేంద్రనాథ్‌, ప్రముఖ ఆర్థోపెడిక్‌ వైద్యులు
క్రమంగా తప్పకుండా వ్యాయామం చేయడం వల్ల కాళ్లు, చేతులు, వెన్నెముకలోని ఎముకల సాంధ్రత పెరుగుతుంది. వయసు పెరుగుతున్నకొద్దీ తగిన జాగ్రత్తలు తీసుకోవాలి. రోజూ కనీసం 30 నిమిషాలపాటు వేగవంతమైన నడక లేదా ఇతర వ్యాయామాలు చేయవచ్చు. పెద్దవాళ్లలో ఎక్కువగా తుంటి ఎముకలు విరిగిపోవడం చూస్తుంటాం. ఎలాంటి ఇబ్బంది అనిపించినా వైద్యులను సంప్రదించి చికిత్స తీసుకోవడం మేలు.

కాల్షియం లోపం లేకుండా చూసుకోవాలి
- డాక్టర్‌ శ్రీకృష్ణ చైతన్య, కన్సల్టెంట్‌ ఆర్థోపెడిక్‌ వైద్యులు
పాలిచ్చే తల్లులు, గర్భిణులు, పిల్లల్లో కాల్షియం లోపం రానివ్వొద్దు. పౌష్టికాహారంతో ఎముక మజ్జ పెరిగి ఎముక సాంద్రత పెరుగుతుంది. ఆరోగ్యకరమైన అలవాట్లుతోపాటు వ్యాధికి సరైన చికిత్స అందించాలి. చిన్న వయసులోనే వ్యాయామం ప్రారంభించి కొనసాగించాలి. డ్యూయల్‌ ఎమిషన్‌ ఎక్స్‌రే అబ్సార్సోమెట్రీ పరీక్ష ద్వారా ఆస్టియోపొరాసిస్‌ను గుర్తించవచ్చు. ఏటీ స్కోర్‌ విలువ 2.5 కంటే తక్కువగా ఉండాలి.


జనరల్‌

రాజకీయం

సినిమా

మరిన్ని

క్రైమ్

మరిన్ని

స్పోర్ట్స్

మరిన్ని

బిజినెస్‌

మరిన్ని

జాతీయ-అంతర్జాతీయ

మరిన్ని
జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.