ప్ర‌త్యేక క‌థ‌నం

పంటినొప్పికి సర్కారీ చికిత్స
ఏప్రిల్‌ నుంచి రాష్ట్రవ్యాప్తంగా దంత, ఈఎన్‌టీ పరీక్షలు
సీఎం ఆదేశాలు.. వైద్యఆరోగ్యశాఖ సన్నాహాలు
రాష్ట్రంలో 50% నుంచి 60% దంత సమస్య బాధితులే
చెవి ముక్కు గొంతు సమస్యలూ అధికమే
ఈనాడు - హైదరాబాద్‌
పన్నునొప్పితో దవడ లాగేస్తుంటే.. నాటువైద్యులు బలవంతంగా పట్టకారుతో గుంజేయడం వంటి సంఘటనలు ఇప్పటికీ జరుగుతూనే ఉన్నాయి. నాణ్యమైన వైద్యం అందరికీ అందుబాటులో లేకపోవడం ఒక కారణమైతే.. చాలామందికి చికిత్స పొందేంత ఆర్థికస్థోమత లేకపోవడం మరో కారణం. ఈ దుస్థితిని రూపుమాపడానికి తెలంగాణ సర్కారు సరికొత్త కార్యక్రమాలకు శ్రీకారం చుట్టనుంది. రాష్ట్రవ్యాప్తంగా దంత, చెవి ముక్కు గొంతు సమస్యలకు ఉచితంగా పరీక్షలు చేయించనున్నట్లు ఇటీవలే ముఖ్యమంత్రి ప్రకటించారు. సీఎం ఆదేశాలతో రాష్ట్ర వైద్యఆరోగ్యశాఖ ఈ సమస్యల పరిష్కారానికి అవసరమైన ఏర్పాట్లపై దృష్టిపెట్టింది. ప్రస్తుతం విజయవంతంగా నిర్వహిస్తున్న కంటి వైద్య శిబిరాల తరహాలోనే రాష్ట్రవ్యాప్తంగా దంతాలు, చెవి, ముక్కు, గొంతుకి సంబంధించిన సమగ్ర పరీక్షల నిర్వహణ కోసం సన్నాహాలు మొదలుపెట్టింది.రాష్ట్రంలో కంటి సమస్యలతో ఎంతమంది బాధపడుతున్నారో.. అంతకంటే ఎక్కువమందిని దంత సమస్యలు వేధిస్తున్నాయి. జనాభాలో దాదాపు 50-60 శాతం ప్రజలు ఏదో ఒక రకమైన పంటి సమస్యతో బాధపడుతున్నారని అంచనా.


కంటి శిబిరాలు అయ్యాకే..
ప్రస్తుతం నిర్వహిస్తున్న కంటి వైద్య పరీక్షలు వచ్చే ఏడాది మార్చి నెలాఖరుకు పూర్తవుతాయని వైద్యవర్గాలు తెలిపాయి. వైద్యఆరోగ్యశాఖ ఈలోగా సమగ్ర ప్రణాళిక సిద్ధం చేసి, ఏప్రిల్‌ నుంచి తొలుత దంత పరీక్షలు, అనంతరం చెవి ముక్కు కంటి పరీక్షలను దశల వారీగా నిర్వహించాలని యోచిస్తోంది. శిబిరాలన్నీ ఒకేసారి నిర్వహించాలా? వేర్వేరుగానా? అనే విషయంలో ఇంకా తుది నిర్ణయానికి రాలేదు.


15% ప్రజలకు చెవి, ముక్కు, గొంతు సమస్యలు
* చెవి, ముక్కు, గొంతు సమస్యలతో బాధపడుతున్నవారు రాష్ట్రంలో దాదాపు 10-15% ఉంటారని ప్రభుత్వ ఈఎన్‌టీ ఆసుపత్రి వర్గాలు    చెబుతున్నాయి.
* ఫలితంగా మాటలు కూడా రాకపోవడం
* పుట్టుకతో వచ్చే చెవి, ముక్కు, గొంతు సమస్యలకు త్వరగా చికిత్స ఇప్పించలేకపోవడం
* బాల్యంలోనే వినికిడి లోపాన్ని గుర్తించకపోవడం

గ్రామీణంలోకి వెళ్లి..
దంత, చెవి, ముక్కు, గొంతు సమస్యలకు అత్యవసరంగా చికిత్స అందించేందుకు ఆరోగ్యశాఖ కార్యాచరణపై కసరత్తు చేస్తోంది. ఆర్‌బీఎస్‌కే పథకం కింద 18 ఏళ్ల లోపు పిల్లల్లో ఈ పరీక్షలను నిర్వహిస్తోంది. వయసుతో సంబంధం లేకుండా అన్ని వయసుల వారికీ ఈ సమస్యలపై పరీక్షలు నిర్వహించాలని నిర్ణయించారు. కంటి వైద్య శిబిరాలను నిర్వహించినట్లుగానే.. గ్రామీణంలోకి వెళ్లి వారి సొంతూళ్లలోనే ఈ పరీక్షలను కూడా నిర్వహించే దిశగా సన్నాహాలు చేస్తున్నారు. ఈ శిబిరాల్లో స్వచ్ఛంద సంస్థల సహకారాన్ని తీసుకోవాలని భావిస్తున్నారు.

మరిన్ని

జిల్లా వార్తలు
జిల్లా తాజా వార్తలు
    ఎక్కువ మంది చదివినవి (Most Read)

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.