ప్ర‌త్యేక క‌థ‌నం



కొడంగల్‌.. బస్తీమే సవాల్‌
మారుమూల కొడంగల్‌ నియోజకవర్గ సమరం సర్వత్రా ఆసక్తి రేకెత్తిస్తోంది. కాంగ్రెస్‌ కీలకనేత రేవంత్‌రెడ్డి బరిలో ఉండటమే అందుకు కారణం.
తెరాస నుంచి పట్నం నరేందర్‌రెడ్డి రంగంలోకి దిగారు. రేవంత్‌రెడ్డిని అసెంబ్లీలో అడుగుపెట్టనివ్వకూడదన్న పట్టుదలతో తెరాస వ్యూహాలు రూపొందిస్తుండగా, ముఖ్యమంత్రే స్వయంగా పోటీకి దిగినా విజయం మాదే అంటూ కాంగ్రెస్‌ కదనభేరి మోగిస్తోంది. భాజపా నుంచి సీనియర్‌ నాయకుడు నాగూరావు నామాజీ పోటీ చేస్తున్నారు. సై అంటే సై అన్నట్లు ఇక్కడ సమరం సాగుతోంది.
సై ..అంటే..సై
సర్వత్రా ఉత్కంఠ రేపుతున్న కొడంగల్‌
రేవంత్‌, నరేందర్‌రెడ్డి మధ్య ప్రతిష్ఠాత్మక పోరు
అక్కడ ఏం జరుగుతుంది? ఎవరు గెలుస్తారు? అధికార పక్షం ఆయనను ఓడిస్తుందా? సర్కారుకు ఎదురొడ్డి ఆయన పైచేయి సాధిస్తారా? ఎన్నికలు జరుగుతున్న తెలంగాణలోనే కాదు.. ఉభయ తెలుగు రాష్ట్రాలలోనూ జోరుగా సాగుతున్న చర్చ ఇది. అందరి దృష్టినీ ఆకర్షిస్తున్న అత్యంత ప్రతిష్ఠాత్మక నియోజకవర్గమది. తెరాస సర్కారుపై పదునైన విమర్శలతో విరుచుకుపడుతున్న కాంగ్రెస్‌ వర్కింగ్‌ ప్రెసిడెంట్‌ రేవంత్‌రెడ్డి పోటీచేస్తున్న కొడంగల్‌ నియోజకవర్గంలో ఇప్పుడు ‘బిగ్‌ఫైట్‌’ జరుగుతోంది.
కొడంగల్‌లో గెలుపుకోసం అటు తెరాస, ఇటు కాంగ్రెస్‌ సర్వశక్తులొడ్డి పోరాడుతున్నాయి. అగ్ర నేతల్ని మోహరించి ప్రచారాన్ని చేస్తున్నాయి. భారీగా డబ్బు ఖర్చుచేయడానికి పార్టీలు సిద్ధమయ్యాయి. మంత్రి పట్నం మహేందర్‌రెడ్డి సోదరుడు నరేందర్‌రెడ్డి తెరాస అభ్యర్థిగా రంగంలో ఉన్నారు. భాజపా నుంచి సీనియర్‌నేత నాగూరావు నామాజీ పోటీ చేస్తున్నారు. ఈ స్థానంలో కాంగ్రెస్‌ ఆరుసార్లు, తెదేపా ఐదుసార్లు గెలవగా స్వతంత్రులు రెండుసార్లు విజయం సాధించారు. తెలంగాణ ఆవిర్భావ సమయంలో జరిగిన ఎన్నికల్లో కూడా తెరాస గాలిని తట్టుకుని తెదేపా గెలుపొందడం కూడా ఓ ప్రత్యేకత

ప్రభుత్వ వైఫల్యాలను చాటుతూ...
తనను ఓడించడానికి అధికార పార్టీ ఎలాంటి వ్యూహాలు అమలు చేస్తోందో, ఎలాంటి ఎత్తుగడలు వేస్తోందో ప్రజలకు వివరించే ప్రయత్నాలు ప్రారంభించారు రేవంత్‌రెడ్డి. తెదేపా-కాంగ్రెస్‌ కూటమిగా ఏర్పడటం తనకు అన్నిరకాలుగా కలసివస్తుందని ఆయన అంచనా వేస్తున్నారు. వికారాబాద్‌ జిల్లాలో కలిపిన దౌల్తాబాద్‌ను తిరిగి మహబూబ్‌నగర్‌ జిల్లాలో కలిపేలా చర్యలు తీసుకుంటానంటూ ఆ మండల ప్రజలకు భరోసా ఇస్తున్నారు. ఈ నియోజకవర్గానికి తెరాస ప్రభుత్వం ఒక్క పథకాన్ని కూడా మంజూరు చేయలేదని చెబుతున్నారు. తన పోరాటం ఫలితంగానే రహదారుల విస్తరణ, తాగునీటి పథకాలు వచ్చాయని చాటుకుంటున్నారు. ప్రస్తుతం  కొడంగల్‌ కన్నా రాష్ట్ర వ్యాప్తంగా ప్రచార సభల్లో పాల్గొనడానికే అధిక ప్రాధాన్యం ఇవ్వాల్సి వస్తున్నందున సహకరించాలని ప్రజలకు విజ్ఞప్తి చేస్తున్నారు.శాసనసభ రద్దయిన తర్వాత ఇప్పటి వరకు రెండుసార్లు మాత్రమే ప్రచారానికి వచ్చిన ఆయన తన సోదరులు, రేవంత్‌ యువసేన నేతృత్వంలో క్షేత్రస్థాయిలో ప్రచారం జరిగేలా చూసుకుంటున్నారు.

అభివృద్ధి మంత్రమే తెరాస ప్రచార అస్త్రం
తెరాస నుంచి బరిలో నిలచిన పట్నం నరేందర్‌రెడ్డికి ఎమ్మెల్సీగా అనుభవం ఉంది. తన రాజకీయ అనుభవం, ప్రభుత్వం నుంచి ఉన్న మద్దతుతో కొడంగల్‌లో విజయం దక్కించుకునేందుకు వ్యూహాత్మకంగా పావులు కదుపుతున్నారు. ప్రభుత్వం కూడా ఏడాది ముందునుంచే ఈ నియోజకవర్గ అభివృద్ధికి ప్రత్యేకంగా నిధులు మంజూరు చేసిందన్న ప్రచారం ఉంది. ఉమ్మడి మహబూబ్న్‌గర్‌, రంగారెడ్డి జిల్లాలకు చెందిన తెరాస నేతలను కొడంగల్‌లో మోహరించారు. మంత్రి లక్ష్మారెడ్డి, ఎంపీ జితేందర్‌రెడ్డి దృష్టి కేంద్రీకరిస్తున్నారు. ఈ నియోజకవర్గానికి సంబంధించి మంత్రి హరీశ్‌రావుకు కూడా సీఎం కేసీఆర్‌ ప్రత్యేక బాధ్యతలు అప్పగించారు. ఇన్నాళ్లూ రేవంత్‌రెడ్డికి మద్దతుగా నిలిచిన జడ్పీటీసీ సభ్యులు, ఇతర ప్రజా ప్రతినిధులు తెరాసలో చేరడం కలిసివస్తుందని నరేందర్‌రెడ్డి భావిస్తున్నారు. అంతేగాకుండా 1978 నుంచి కాంగ్రెస్‌లో సుదీర్ఘకాలం కొనసాగిన గురునాథ్‌రెడ్డి తెరాసకు మద్దతివ్వడం కలిసి వచ్చే అంశమని అంచనా వేస్తున్నారు. కొడంగల్‌ వెనుకబాటుకు కారణాలను, ఈ నాలుగున్నరేళ్లలో తెరాస చేసిన అభివృద్ధిని తెరాస అభ్యర్థి ప్రచారం చేస్తున్నారు. దీనిలో భాగంగానే వికారాబాద్‌ జిల్లాలో మొదటిసారి కొడంగల్‌కు మిషన్‌భగీరథ నీటిని ప్రారంభించారు. నియోజకవర్గానికి ప్రభుత్వం ఇప్పటి వరకు రూ.120 కోట్ల అభివృద్ధి పథకాలను మంజూరు చేసిందని చెబుతున్నారు.
మూటలతో వచ్చినా.. గెలుపు మాదే
మంత్రి పట్నం మహేందర్‌రెడ్డి, నరేందర్‌రెడ్డి సోదరులు మూటలతో వచ్చినా.. ముఠాలతో వచ్చినా కొడంగల్‌ ప్రజల ఆత్మగౌరవాన్ని కొనుక్కోలేరు. ఎక్కడో మారుమూల ప్రాంతంగా ఉన్న కొడంగల్‌ను విశేషంగా అభివృద్ధి చేశా. అందుకే ఎవరెన్ని మాటలు చెప్పినా వాటిని నమ్మి, మోసపోయే పరిస్థితుల్లో ఇక్కడి ప్రజలు లేరు. సాక్షాత్తు ముఖ్యమంత్రే వచ్చి ఇక్కడ పోటీ చేసినా గెలుపు మాదే. ప్రజలు మా పక్కనే నిలుస్తారు.
- రేవంత్‌రెడ్డి, కాంగ్రెస్‌ అభ్యర్థి
రేవంత్‌రెడ్డి బలాలు
* ప్రజలను ఆకట్టుకునే వాగ్ధాటి
* పదేళ్లుగా ఎమ్మెల్యేగా నియోజకవర్గ అభివృద్ధికి పాటుపడటం
* నియోజకవర్గానికి గుర్తింపు తీసుకు  వచ్చారన్న పేరు

బలహీనతలు
* స్థానికంగా అందుబాటులో ఉండరన్న ప్రచారం
* తెదేపాకు చెందిన మద్దతు దారులు తెరాసలో చేరడం

సంక్షేమ పథకాలే గెలిపిస్తాయి
పేదల అభ్యున్నతికి సీఎం కేసీఆర్‌ ఎన్నో పథకాలు ప్రవేశపెట్టారు. వీటివల్ల ప్రజలకు ఎంతో లబ్ధి చేకూరింది. ఆ సంక్షేమ పథకాలే నన్ను గెలిపిస్తాయి. తెదేపా నుంచి తెరాసలోకి చేరిన నాయకులు, కార్యకర్తలతోపాటు తెరాసకు చెందిన అన్నివర్గాల వారు మావెంటే ఉన్నారు. రేవంత్‌రెడ్డి మాటల గారడీకి ఇక కాలం చెల్లింది. కొడంగల్‌లో తెరాస జెండా ఎగురవేస్తాం.
- నరేందర్‌రెడ్డి, తెరాస అభ్యర్థి
 నరేందర్‌రెడ్డి బలాలు
* కేసీఆర్‌ ప్రోత్సాహం.. కొడంగల్‌కు ప్రాధాన్యం ఇవ్వడం
* ప్రభుత్వ సంక్షేమ పథకాలు
* మాజీ ఎమ్మెల్యే గురునాథ్‌రెడ్డి అండదండలు

బలహీనతలు
* ఈ ప్రాంతానికి పూర్తిగా కొత్త కావడం
* ఆకట్టుకునే నైపుణ్యాలు లేవన్న ప్రచారం


- ఈనాడు డిజిటల్‌, వికారాబాద్‌

మరిన్ని

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.