ప్ర‌త్యేక క‌థ‌నం

అడ్డగోలు నిర్మాణాలకు అడ్డుకట్ట!
భారీ భవనాల నిర్మాణానికి ముందు ‘రద్దీ ప్రభావ అంచనా’ చేపట్టాల్సిందే
ఆ తర్వాతే అనుమతి
సరికొత్త విధానం అమలుకు జీహెచ్‌ఎంసీ నిర్ణయం
పదేళ్ల వరకు ఆ ప్రాంతంలో రద్దీ తలెత్తకుండా ప్రణాళిక
ఈనాడు-సిటీ బ్యూరో ప్రధాన ప్రతినిధి: ఇష్టానుసారం భారీ నిర్మాణాలు.. ఇబ్బడిముబ్బడిగా అనుబంధ రద్దీ.. వెరసి తీవ్ర ట్రాఫిక్‌ కష్టాలు.. ఇప్పటి వరకు రాజధాని ప్రజలు అనుభవిస్తున్న ఈ ఇక్కట్లకు పరిష్కారం దిశగా హైదరాబాద్‌ మహానగరపాలక సంస్థ సరికొత్త విధానానికి శ్రీకారం చుడుతోంది. విదేశాల్లో అమల్లో ఉన్న రద్దీ ప్రభావ అంచనా (ట్రాఫిక్‌ ఇంపాక్ట్‌ అసెస్‌మెంట్‌- టీఐఏ) విధానాన్ని ఇక్కడా అమలుచేయాలని నిర్ణయించింది. పూర్తిస్థాయి నిబంధనలు రూపొందించి ప్రభుత్వానికి సమర్పించి ఆమోదం అనంతరం ఈ విధానాన్ని అమల్లోకి తేనున్నారు. మహానగరంలో అనేక భారీ నిర్మాణాలు వచ్చినా.. కొత్త నిబంధనల వల్ల సంబంధిత ప్రాంతాల్లో భవిష్యత్తులో ట్రాఫిక్‌ ఇబ్బందులు ఉండవని అధికారులు చెబుతున్నారు. దేశంలోనే తొలిసారిగా ఈ విధానాన్ని అమల్లోకి తెస్తున్న మహానగరపాలక సంస్థ హైదరాబాదేనని పేర్కొంటున్నారు.

అమలుతోనే ఫలితం..
ఇప్పటి వరకు హైదరాబాద్‌లో ఈ విధానం అమల్లో లేకపోవడంతో అనేక ప్రధాన రోడ్లలో వచ్చిన మాల్స్‌ వల్ల పెద్దఎత్తున ట్రాఫిక్‌ ఇబ్బందులు ఏర్పడుతున్నాయి. ఈ నేపథ్యంలో హైదరాబాద్‌లోనూ కొన్ని ముఖ్యమైన నిర్మాణాలకు అనుమతి ఇచ్చేప్పుడు తప్పనిసరిగా టీఐఏ తరువాతే అనుమతి ఇచ్చే విధానాన్ని అవలంబించాలని బల్దియా అధికారులను పురపాలక శాఖ మంత్రి కేటీఆర్‌ ఆదేశించారు. దీంతో జీహెచ్‌ఎంసీ అధికారుల బృందం నియమ నిబంధనలను రూపొందించింది. ఈ విధానాన్ని ప్రభుత్వం ఆమోదించిన వెంటనే అమల్లోకి తేవాలని నిర్ణయించారు.

ఏమిటీ విధానం..
భారీ నిర్మాణాలు చేపట్టినప్పుడు అందుకు అనుగుణంగా అక్కడ ట్రాఫిక్‌ సమస్యలు లేకుండా చేసేందుకు సహకరించడానికి నిర్మాణదారు ఒప్పుకున్నప్పుడే సంబంధిత నిర్మాణాలకు అనుమతిస్తారు. పలు విదేశాల్లో టీఐఏ చేపట్టిన తరువాతే పెద్ద భవనాలకు అనుమతి ఇస్తున్నారు. దీంతో అక్కడ రద్దీ ప్రాంతాల్లో అతి పెద్ద నిర్మాణాలు వచ్చినా సంబంధిత రోడ్లపై ట్రాఫిక్‌ ఇబ్బందులు ఏర్పడటం లేదు.
* వందకార్ల కన్నా ఎక్కువ పట్టే అపార్టుమెంట్లతోపాటు భారీ నిర్మాణాలన్నీ ఈ విధానం కిందకు వస్తాయి.
* నిర్మాణదారు భవనాన్ని నిర్మించాలంటే ముందుగా సంబంధిత ప్రాంతంలో తాము పెట్టుకునే కన్సల్టెంట్‌ సహకారంతో తాత్కాలికంగా వాహనాల ట్రాఫిక్‌ పరిశీలన చేయించాల్సి ఉంటుంది. భవనం నిర్మించే చోట ప్రస్తుతం ఎన్ని వాహనాలు తిరుగుతున్నాయి? నిర్మాణం తరువాత ఎన్ని పెరుగుతాయి? పెరిగే వాటికి అనుగుణంగా రోడ్ల విస్తరణకు ఎటువంటి తోడ్పాటు ఇస్తారు? దీన్ని ఎలా చేపట్టాలన్న దానిపై తాత్కాలిక ప్రణాళికను భవన నిర్మాణ అనుమతి పత్రంతోపాటు సమర్పించాల్సి ఉంటుంది.
* నిర్మిత ప్రాంతంలో ట్రాఫిక్‌ ఇబ్బందులు లేకుండా ఎలాంటి చర్యలు తీసుకోవాలన్న దానిపై నివేదికను ఇవ్వడానికి వీలుగా టీఐఏ తరఫున కొంతమంది నిపుణుల కమిటీని బల్దియా నియమించనుంది. ఈ కమిటీ నిర్మిత ప్రాంతంలో
సమగ్ర సర్వే చేస్తుంది.
* పెరిగే ట్రాఫిక్‌కు అనుగుణంగా వచ్చే పదేళ్లలో ఆయా కూడళ్లలో వాహన రద్దీ ఏర్పడకుండా ఉండాలంటే ఏం చర్యలు చేపట్టాలన్న దానిపై ఈ కమిటీ నివేదికను ఇస్తుంది. ఈ నివేదికకు నిర్మాణదారు సమ్మతించిన తరువాతే అక్కడ భవన నిర్మాణానికి అనుమతి ఇస్తారు.
* ఇదే సమయంలో భవనం వల్ల ఉత్పన్నమయ్యే ట్రాఫిక్‌ ఇబ్బందులను అధిగమించడానికి అయ్యే వ్యయంలో కొంతమొత్తం నిర్మాణదారు భరించాల్సిందేనని అధికారులు చెబుతున్నారు.

ట్రాఫిక్‌ ఇబ్బందులను తప్పించడానికే
బంజారాహిల్స్‌ జీవీకే మాల్‌ దగ్గర ఇటీవల సర్వే చేయించాం. ఈ రోడ్డులో వారాంతంలో గంటకు ఒకవైపు 713, మరోవైపు 752 వాహనాలు తిరుగుతున్నాయి. ఈ మాల్‌ వల్ల అదనంగా గంటకు 411 వాహనాలు కొత్తగా తోడయ్యాయి. మాల్‌ కట్టకముందే టీఐఏ చేసుంటే కొత్తగా వచ్చే వాహనాలకు అనుగుణంగా రోడ్ల విస్తరణ జరిగి ఉండేది.  ప్రస్తుతం మాదాపూర్‌, రాయదుర్గం, ఆర్థిక జిల్లా పరిధిలో ఐదు లక్షలమంది ఉద్యోగాలు చేస్తున్నారు. వచ్చే మూడేళ్లలో మరో రెండు లక్షల మంది ఉద్యోగులు, లక్షమంది వివిధ రకాల పనులు చేసే వారు ఈ ప్రాంతంలో చేరతారని గుర్తించాం. రాబోయే మూడేళ్లలో ఈ ప్రాంతంలో భారీ నిర్మాణాలు రాబోతున్నాయి. జాగ్రత్తలు తీసుకోకపోతే భారీ ఎత్తున ట్రాఫిక్‌ సమస్యలు ఏర్పడే అవకాశముంది. అందుకే మంత్రి కేటీఆర్‌ ఆదేశాల మేరకు టీఐఏ విధానాన్ని తీసుకురాబోతున్నాం.

- దేవేందర్‌రెడ్డి, బల్దియా ముఖ్య ప్రణాళికాధికారి

మరిన్ని

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.