ప్ర‌త్యేక క‌థ‌నం

అరకు కాఫీ అదరహో
పారిస్‌ పోటీల్లో విశాఖ మన్యం కాఫీకి బంగారు పతకం
సేంద్రియ ఉత్పత్తులకు పెరుగుతున్న గిరాకీ
పొరుగు రాష్ట్రాలకు కాఫీశాలలను విస్తరిస్తున్న జీసీసీ
పొద్దున్నే కమ్మటి కాఫీ వాసన పీలిస్తేనే తెల్లారుతుంది చాలామందికి.. ప్రాంతాలను బట్టి కాఫీలో కూడా ఎన్నో రుచులు. విశాఖ మన్యంలో పండుతున్న అరకు కాఫీకి మరోసారి అంతర్జాతీయ స్థాయిలో గుర్తింపు లభించింది. ఇటీవల ఫ్రాన్స్‌ రాజధాని పారిస్‌లో జరిగిన ప్రతిష్ఠాత్మక ‘ప్రిక్స్‌ ఎపిక్యూర్‌ 2018’లో బంగారు పతకాన్ని సొంతం చేసుకుంది. కాఫీ మార్కెట్‌లో ప్రసిద్ధ బ్రాండ్లుగా పేరొందిన సుమత్రా, కొలంబో రకాలతో పోటీపడి బంగారు పతకం సాధించిన తొలి భారతీయ కాఫీ మిశ్రమంగా సత్తా చాటింది.

అరకు కాఫీ రుచే వేరు..
విశాఖ జిల్లాలోని చింతపల్లి ఏజెన్సీ సముద్ర మట్టానికి 2,500 అడుగుల ఎత్తులో ఉండగా... పాడేరు, అరకు ప్రాంతాలు 3000 అడుగుల ఎత్తులో ఉండడంతో ఇక్కడ కాఫీ పంటకు అనుకూల వాతావరణం ఉంది. కర్ణాటక, కేరళ రాష్ట్రాలతో పోలిస్తే ఉత్పత్తి తక్కువే అయినా నాణ్యత ఎక్కువ కావడంతో మన్యం కాఫీకి గిరాకీ ఎక్కువ. ఆంధ్రా-ఒడిశా రాష్ట్రాల్లో పండించే కాఫీని అరకు కాఫీగా పిలుస్తారు. విశాఖ మన్యంలో ప్రస్తుతం పార్చిమెంట్‌, అరబికా చెర్రీ, రొబస్టా రకాలు పండిస్తున్నారు. అరబికా రకానికి ప్రపంచ మార్కెట్‌లో డిమాండ్‌ ఉంది. విదేశాల్లో గిరాకీ ఉన్న సేంద్రియ కాఫీ సాగును రాష్ట్ర సర్కారు ప్రోత్సహిస్తోంది. జీసీసీ, ఐటీడీఏ, కాఫీ బోర్డులు గిరిజనుల్లో చైతన్యం నింపి సేంద్రియ పద్ధతులను ఆచరించేలా సహకరిస్తున్నాయి.

ఎగుమతికి ‘నాంది’
మన్యంలో నాంది ఫౌండేషన్‌ మొదటిసారిగా సేంద్రియ సాగును అమల్లోకి తెచ్చి ఆ ఉత్పత్తులను విదేశాలకు ఎగుమతి చేయడంలో చొరవ చూపించింది. ఇలా పారిస్‌లోను అరకు కాఫీశాల ఏర్పాటైంది. విదేశాల్లో అరకు పేరుతో ప్రత్యేకంగా ఓ కాఫీ షాపు తెరిచింది కూడా ఇక్కడే. ప్రిక్స్‌ ఎపిక్యూర్‌ పోటీల్లో పతకం సాధించడం ద్వారా ఈ కాఫీ షాపు మరింత ప్రాచుర్యం పొందడానికి అవకాశం కలిగింది.
పొరుగు రాష్ట్రాలకు విస్తరణ
అంతర్జాతీయంగా గుర్తింపు తెచ్చుకున్న అరకు కాఫీని దేశీయంగా అందరికీ అందుబాటులోకి తెచ్చేందుకు గిరిజన సహకార సంస్థ(జీసీసీ) కృషి చేస్తోంది. ఇప్పటికే విశాఖపట్నం విమానాశ్రయంలో ఈ కాఫీ షాపును ఏర్పాటు చేసింది. రేణిగుంట, విజయవాడ, శంషాబాద్‌, చెన్నై విమానాశ్రయాల్లోనూ షాపుల ఏర్పాటుకు సన్నద్ధమవుతోంది. అమరావతిలోని రాష్ట్ర సచివాలయంలోనూ ఇటీవలే ఓ ఔట్‌లెట్‌ను ఏర్పాటు చేసింది. దిల్లీలోని సుప్రీంకోర్టు ఆవరణలోను, శాస్త్రి భవన్‌లోనూ జీసీసీ ఔట్‌లెట్ల ఏర్పాటుకు సంబంధించి అధికారులతో సంప్రదింపులు జరుపుతోంది. ఆంధ్రప్రదేశ్‌లోనూ రాష్ట్రవ్యాప్తంగా రైతు బజార్లు, రైల్వేస్టేషన్లు, బస్టాండ్లు, పర్యాటక ప్రాంతాల్లోనూ జీసీసీ కాఫీ శాలలు, ఔట్‌లెట్లను ఏర్పాటు చేయడానికి కసరత్తు చేస్తోంది.



మన్యంలో సాగు ఇలా..
* విశాఖ మన్యంలో లక్షన్నర ఎకరాల్లో గిరిజనులు కాఫీ తోటలను సాగు చేస్తున్నారు.
* అటవీశాఖ పరిధిలో మరో పది వేల ఎకరాల పంట సాగవుతోంది.
* ఏటా 10,500 టన్నుల కాఫీ గింజలు ఉత్పత్తి అవుతున్నాయి.
* వీటిని గిరిజన సహకార సంస్థతో పాటు స్వచ్ఛంద సంస్థలు, ప్రైవేటు వర్తకులు కొనుగోలు చేస్తున్నారు.
- ఈనాడు డిజిటల్‌, విశాఖపట్నం

మరిన్ని

జిల్లా వార్తలు
జిల్లా తాజా వార్తలు
    ఎక్కువ మంది చదివినవి (Most Read)

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.