ప్ర‌త్యేక క‌థ‌నం

...మేం గెలవకపోతే  రాజకీయ సన్యాసమే
విపక్షాలకు ఆ మాట చెప్పే ధైర్యముందా?
ఐదు లక్షల జీతం వదులుకొని వచ్చా
ముఖ్యమంత్రి పదవిపై ఆశ లేదు
చంద్రబాబు పచ్చి అవకాశవాది
ఆయనకు ఒంటరిగా పోటీ చేసే దమ్ములేదు
పొరుగు రాష్ట్రాలతో సత్సంబంధాలు పాటిస్తున్నాం
‘మీట్‌ ద ప్రెస్‌’లో మంత్రి కేటీఆర్‌ వెల్లడి
2006లో కేసీఆర్‌ యూపీఏ నుంచి బయటికి వచ్చారు. కేంద్రమంత్రి పదవికి, కరీంనగర్‌ ఎంపీ పదవికి రాజీనామా చేశారు. ఉప ఎన్నికలు వచ్చాయి. అప్పటికే నేను అమెరికా నుంచి ఇక్కడికి వచ్చాను. ఓ ఇన్‌ఫ్రా కంపెనీలో నెలకు రూ. 5 లక్షల వేతనంతో పనిచేస్తున్నాను. ఆనాటి ఉప ఎన్నికలు తెలంగాణ ఉద్యమానికి జీవన్మరణ సమస్య. కేసీఆర్‌ ఓడిపోతే తెలంగాణ నినాదమే లేదని చెప్పే పరిస్థితి. ఆ సమయంలో మూడు నెలల సెలవడిగితే కంపెనీ వాళ్లు ఒప్పుకోలేదు. దీంతో ఉద్యోగాన్ని వదులుకొని ఉద్యమంలోకి వచ్చా. ఉద్యోగానికి రాజీనామా చేసినప్పుడు కేసీఆర్‌కు కూడా చెప్పలేదు. 2014లో పార్టీ అధికారంలోకి వచ్చాక మంత్రిని అయ్యాను. ఆ పదవి వస్తుందని ఊహించలేదు. నాకు ఇంత కంటే పెద్ద పదవి వద్దు. మరో 15 ఏళ్లు కేసీఆరే సీఎంగా ఉంటే తెలంగాణ ఆకాంక్షలు   నెరవేరుతాయి.’’
ఎన్నికల్లో తెలంగాణ రాష్ట్ర సమితి చిరస్మరణీయమైన విజయాన్ని నమోదు చేయబోతోందని రాష్ట్ర మంత్రి కేటీఆర్‌ అన్నారు. పార్టీ అధికారంలోకి రాకపోతే రాజకీయ సన్యాసం చేస్తానని చెప్పారు. ఈ సవాలును విపక్షాలు స్వీకరించే దమ్ముందా అని ఆయన ప్రశ్నించారు. ముఖ్యమంత్రి కేసీఆర్‌ ఉద్యమకారుడిగానే కాదు.. గొప్ప పరిపాలనాదక్షుడిగానూ నిరూపించుకున్నారని,  గత నాలుగున్నరేళ్లలో ఆయన తెలంగాణను దేశానికే తలమానికంగా నిలిపారని అన్నారు. సంక్షేమానికి ఇది స్వర్ణయుగమని, నవతెలంగాణ సాధన లక్ష్యంగా ముందుకు దూసుకెళ్తున్నామని తెలిపారు. చంద్రబాబునాయుడు అవకాశవాది అని, స్వయంప్రకాశం లేని చంద్రుడని, ఎప్పుడూ ఆయన ఎన్నికల్లో ఒంటరిగా పోటీ చేయలేదని, ఇప్పటి వరకు వైకాపా మినహా అన్ని పార్టీలతో ఆయన పొత్తు పెట్టుకున్నారని పేర్కొన్నారు. భవిష్యత్తులో వైకాపాతోనూ పొత్తు పెట్టుకున్నా ఆశ్చర్యపోనవసరం లేదని అన్నారు. గురువారం ప్రెస్‌క్లబ్‌లో కేటీఆర్‌ మీట్‌ ద ప్రెస్‌’ కార్యక్రమంలో మాట్లాడారు.

‘‘గత నాలుగు సంవత్సరాల్లో తెలంగాణ సాధించిన ప్రగతి మీ కళ్ల ముందుంది. పరిపాలనలోనూ కేసీఆర్‌ గొప్పగా రాణించారంటూ భాజపాకి చెందిన కేంద్రమంత్రి అరుణ్‌ జైట్లీ స్వయంగా చెప్పారు. తెలంగాణ ఏర్పడిన తొలిరోజుల్లో అనేక అనుమానాలున్నాయి. ఈ అనుమానాల నీడల నుంచి ఆర్థిక, రాజకీయ స్థిరత్వం సాధించాం. 40 ఏళ్ల ఇండస్ట్రీ అని చెప్పుకునే వాళ్లు ఆశ్చర్చపోయేలా పాలన అందించాం.

మూడంచెలతో ముందుకు పోతున్నాం
సంస్కరణలతో ఆదాయం సృష్టించి సంపద పెంచాం. పేదలకు పంచాం. వ్యవసాయరంగ సంక్షోభానికి తెర దించేందుకు రైతు బంధు, రైతు బీమా పథకాలు తెచ్చాం. రైతు ఆత్మహత్యలు తగ్గుముఖం పట్టాయని కేంద్రమంత్రి పురుషోత్తం రూపాల స్వయంగా పార్లమెంటులో చెప్పారు. చేనేతరంగంలో కష్టాలను తగ్గించాం. ఆర్థిక అభివృద్ధితో పాటు 16 అంశాల్లో దేశంలో ప్రథమ స్థానంలో ఉన్నాం. శాంతిభద్రతలను అదుపులో పెట్టాం. 1.09 లక్షల ప్రభుత్వ ఉద్యోగాల భర్తీకి అనుమతించగా, 87 వేలకు ప్రకటనలు వచ్చాయి. 38,000 ఖాళీలు భర్తీ చేశాం. స్వయం ఉపాధి, ప్రైవేటురంగంలో ఉద్యోగాలు, ఉపాధి.. ఇలా మూడంచెలతో ముందుకు పోతున్నాం. ప్రభుత్వ ఉద్యోగాలన్నీ భర్తీ చేసినా నిరుద్యోగ సమస్య తీరదు.

ఉత్తర, దక్షిణ తేడా లేదు
ఉత్తర, దక్షిణ తెలంగాణలనే తేడా మాకు లేదు. డిసెంబర్‌ 7 కల్లా మిషన్‌ భగీరథ పూర్తవుతుంది. అసెంబ్లీ రద్దు అనేది అధికారంలో ఉన్న పార్టీకి రాజ్యాంగం కల్పించిన వెసులుబాటు. మా నిర్ణయం తప్పో.. ఒప్పో రేపు ప్రజలే నిర్ణయిస్తారు. కాంగ్రెస్‌లాగా మా హామీలు ఆపదమొక్కుల్లాంటివి కాదు. కాంగ్రెస్‌ ఇంకా మేనిఫెస్టో విడుదల చేయలేదు, చేస్తుందో లేదో కూడా తెలియదు.
 


భాజపాకు డిపాజిట్లు దక్కనివ్వం
మేం ఎవ్వరికీ భయపడం. మోదీ పట్ల మెతక   వైఖరి లేదు. భాజపాకు డిపాజిట్లు దక్కకుండా చేస్తాం. ప్రస్తుత స్థానాలన్నింటా ఓడిస్తాం. భాజపాకు, కాంగ్రెస్‌కు పెద్ద తేడా లేదు. ఎన్నికల సమయంలో వలసలు సహజం. జర్నలిస్టుల సంక్షేమానికి మేము చేసినంతగా ఏ రాష్ట్రం చేయలేదు. జర్నలిస్టుల స్థలాల సమస్యను గత ప్రభుత్వాలు జటిలం చేశాయి, ఇప్పుడది సుప్రీంకోర్టులో ఉంది. అక్కడ తేలగానే స్థలాలిస్తాం’’ అని కేటీఆర్‌ అన్నారు.

సొల్లు విమర్శలు పట్టించుకోం..
రాష్ట్రాన్ని గాడిలో పెట్టడమే సీఎం పని. రేషన్‌ కార్డులివ్వడం, మోరీలు శుభ్రం చేయించడం వంటివి కూడా ఆయనే చేయాలంటే ఎలా? పనిలేని వారు చేసే సొల్లు విమర్శలు పట్టించుకోం. హైదరాబాద్‌ రాత్రికి రాత్రే విశ్వనగరంగా కాదు. మెట్రో రైలు మార్గాల నిడివి పెంచుతాం. ధర్నాచౌక్‌ను పునరుద్ధరిస్తూ హైకోర్టు ఇచ్చిన తీర్పును స్వాగతిస్తాం. గాంధీభవన్‌ను మూసేశారు కనుక మహాకూటమి నేతలు ఇప్పుడు ధర్నాచౌక్‌ దగ్గర ధర్నా చేసుకోవచ్చు. ప్రజాప్రతినిధుల పిల్లలను ప్రభుత్వ స్కూళ్లకే పంపాలనే నిబంధన పెట్టడం వీలు కాదు.. ఇది సహజ న్యాయ సూత్రాలకు విరుద్ధం.
ఏపీతో మా పాలన పోల్చుకోండి
పొరుగు రాష్ట్రాలతో సత్సంబంధాలు నెరుపుతున్నాం. హైదరాబాద్‌ను తానే అభివృద్ధి చేశానని చంద్రబాబు గొప్పలు చెబుతున్నారు. చార్మినార్‌కు తానే ముగ్గు పోశానని కూడా చెప్తారు. స్వీయ ధ్రువీకరణను పారిశ్రామికవేత్తలు ఇచ్చుకోవాలే తప్ప రాజకీయవేత్తలు కాదు. ప్రపంచ తెలుగు సభలు ఏపీలో తెలుగుదేశం ప్రభుత్వం నిర్వహించకున్నా మేం ఘనంగా నిర్వహించాం. బాబు రాహుల్‌ ప్రచారం చేయనివ్వండి -మా ప్రచారం మేము చేస్తాం ఎవరికి ఓటెయ్యాలో ప్రజలే నిర్ణయించుకుంటారు.
‘‘బాబు హైదరాబాద్‌ను అభివృద్ధి చేశానంటే... మరి 2004లో  నగరంలో తెదేపా ఎందుకు గెలవలేదు? ఏపీలో పాలనను, తెలంగాణలో పాలనను   పోల్చుకుని ప్రజలు ఓటేయాలని నేను ఖమ్మంలో కోరా. హైదరాబాద్‌ను ఎవరు అభివృద్ధి చేశారో డిసెంబరు 7న ప్రజలు తీర్పు ఇస్తారు.
- ఈనాడు, హైదరాబాద్‌

మరిన్ని

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.