ప్ర‌త్యేక క‌థ‌నం


తుపాకీ నీడలో.. ఎన్నికల సమరం
ఛత్తీస్‌గఢ్‌ సరిహద్దులో పోలీసుల డేగకన్ను
తెలంగాణలో ప్రశాంతంగా నిర్వహణకు ఏర్పాట్లు
మావోయిస్టుల పడగనీడలోనే ఛత్తీస్‌గఢ్‌లో తొలి దశ పోలింగ్‌ ప్రశాంతంగా ముగిసింది. కానీ అదంత సులభంగా ఏమీ సాధ్యం కాలేదు. ఎంతటి భారీ ఎత్తున బందోబస్తు ఏర్పాటుచేసినా.. మావోయిస్టులు ఏదో మూల విధ్వంసాలు సృష్టిస్తూనే ఉన్నారు. ఒకరకంగా నోటిఫికేషన్‌కు ముందు నుంచే అక్కడ కొంత భయానక వాతావరణం నెలకొంది. ఈ ప్రభావం సరిహద్దున ఉన్న తెలంగాణ నియోజకవర్గాలపై పడకుండా చూడడమే ఇప్పుడు భద్రతా బలగాల ముందున్న పెద్ద సవాల్‌.
అలజడులను ఏ రూపంలో సృష్టించాలనుకున్నా వాటిని ముందే పసిగట్టి ఆపేందుకు ఛత్తీస్‌గఢ్‌ సరిహద్దున ఉన్న తెలంగాణ జిల్లాల్లో పోలీసు బలగాలు భారీ కసరత్తు చేస్తున్నాయి.

ప్రస్తుత 5 రాష్ట్రాల శాసనసభ ఎన్నికల్లో ఒక్క ఛత్తీస్‌గఢ్‌లో మాత్రమే రెండు దశల్లో ఎన్నికలు జరుగుతున్నాయి. ఇందుకు ప్రధాన కారణం మావోయిస్టుల హింసాత్మక చర్యలే. ఆ రాష్ట్రంలో మొత్తం 90 శాసనసభ స్థానాలు ఉండగా తొలిదశగా.. మావోయిస్టుల ప్రాబల్యం ఎక్కువగా ఉండే 18 నియోజకవర్గాల్లో ఈ నెల 12న పోలింగ్‌ జరిగింది. మిగిలిన 72 నియోజకవర్గాల్లో 20న జరగనుంది. ముందు జాగ్రత్తగా రెండో దశ పోలింగ్‌కూ అధికారులు పటిష్ఠ చర్యలు చేపడుతున్నారు. మరోవైపు తెలంగాణ శాసనసభ ఎన్నికల తేదీ కూడా ముంచుకొస్తుండడంతో రాష్ట్ర అధికారులు, పోలీసులు ఛత్తీస్‌గఢ్‌ సరిహద్దున ఉన్న ఉమ్మడి ఖమ్మం జిల్లాలోని పలు నియోజకవర్గాలపై ప్రస్తుతం ప్రత్యేక దృష్టి సారించారు.

ఛత్తీస్‌గఢ్‌లోని బస్తర్‌, బీజాపూర్‌, దంతెవాడ, కంకేర్‌, కొండగావ్‌, నారాయణపూర్‌, సుకుమా జిల్లాల్లో వామపక్ష తీవ్రవాదం ఎక్కువ. అక్కడ ఎలాంటి హింస చోటు చేసుకున్నా సరిహద్దున ఉన్న భద్రాద్రి కొత్తగూడెం జిల్లాపై ప్రత్యక్షంగానో పరోక్షంగానో ప్రభావం పడే వీలుంది. దీంతో కలెక్టర్‌ రజత్‌కుమార్‌ శైనీ, ఎస్పీ సునీల్‌దత్‌ క్షేత్ర పర్యవేక్షణ పెంచి సిబ్బందిని అప్రమత్తం చేసేందుకు సమాయత్తమయ్యారు. ఈసారి ఎలాంటి హింసకు తావు లేకుండా పకడ్బందీగా ఎన్నికల ప్రక్రియ జరిగేందుకు పోలీసు విభాగం ప్రణాళికలు రచిస్తోంది.

దేశవ్యాప్తంగా ఆంధ్రప్రదేశ్‌, తెలంగాణ, ఛత్తీస్‌గఢ్‌, ఒడిశా, బిహార్‌, ఝార్ఖండ్‌, మధ్యప్రదేశ్‌, మహారాష్ట్ర, ఉత్తర్‌ప్రదేశ్‌, పశ్చిమ్‌బెంగాల్‌ రాష్ట్రాల్లోని 106 జిల్లాల్లో తీవ్రవాద ప్రభావం ఉన్నట్లు కేంద్ర హోం మంత్రిత్వ శాఖ జారీ చేసిన నివేదికల ద్వారా తెలుస్తోంది. వీటిలోని 30 జిల్లాల్లో మావోయిస్టుల హింసాత్మక ఘటనలు ఎక్కువగా చోటుచేసుకుంటున్నట్లు తేల్చారు. ఈ 30లో తెలంగాణ నుంచి భద్రాద్రి కొత్తగూడెం జిల్లా ఉండడంతో పోలింగ్‌ ప్రక్రియ సజావుగా కొనసాగించేందుకు అన్ని ప్రభుత్వ శాఖలు ముందస్తు జాగ్రత్తలు చేపడుతున్నాయి.

13 స్థానాల్లో గంట ముందే పోలింగ్‌ ముగింపు
ఛత్తీస్‌గఢ్‌లో ఎలాంటి సంఘటనలు చోటు చేసుకున్నా సరిహద్దుల్లో తెలంగాణ, ఆంధ్రప్రదేశ్‌ రాష్ట్రాల వైపు అలజడి నెలకొనడం సర్వసాధారణంగా మారింది. తెలంగాణలోని మొత్తం 119 నియోజకవర్గాల్లో.. 106 స్థానాల్లో మాత్రం ఉదయం 7 నుంచి సాయంత్రం 5 వరకు పోలింగ్‌ చేపట్టనుండగా, మావోయిస్టుల ముప్పు ఎక్కువగా ఉందని భావిస్తున్న మన్యం ప్రాంతంలోని 13 నియోజకవర్గాల్లో గంట ముందే పోలింగ్‌ను ముగించాలని అధికారులు నిర్ణయించారు. ఈ 13 నియోజకవర్గాల్లో 5 నియోజకవర్గాలు భద్రాద్రి జిల్లాలో ఉన్నాయి. ఎన్నికలు దగ్గరపడుతున్న నేపథ్యంలో ఇప్పటి నుంచే సరిహద్దు ప్రాంతాల్లో విస్తృత తనిఖీలు చేపడుతున్నారు.

భద్రత.. కత్తిమీద సామే
మావోయిస్టు క్యాడర్‌లో ఈ మధ్య కీలక మార్పులు చోటు చేసుకున్నాయి. ఇప్పటి వరకు ఆ పార్టీ ప్రధాన కార్యదర్శిగా ఉన్న గణపతి స్థానంలో నంబాల కేశవరావును నియమించారు. ప్రస్తుతం ఎన్నికలు నిర్వహిస్తున్న ఛత్తీస్‌గఢ్‌పై మంచి పట్టున్న నేత కావడంతో రెండో దశ ఎన్నికల సమయంలోను మరింత అప్రమత్తంగా ఉండాలని ఆ రాష్ట్ర పోలీసులు నిర్ణయించారు. మరోవైపు,  ఇటీవలే ఆంధ్రప్రదేశ్‌లో అరకు ఎమ్మెల్యే కిడారి సర్వేశ్వరరావుతోపాటు మాజీ ఎమ్మెల్యే సోమను మావోయిస్టులు హత్యచేశారు. దీంతో ఉమ్మడి ఖమ్మం జిల్లాలోని ఛత్తీస్‌గఢ్‌కు దగ్గరగా ఉండే నియోజకవర్గాల్లో ప్రచారం చేసే నాయకులకు భద్రత కల్పించడం పోలీసులకు కత్తిమీద సాములా మారింది.
సరిహద్దుల్లో వరుస సంఘటనలు
ఒకవైపున ఛత్తీస్‌గఢ్‌ రాష్ట్రం ఎన్నికల్లో పూర్తిగా తలమునకలైన సమయంలోనే మావోయిస్టులు పంజా విసురుతూ వరుసగా విధ్వంసాలు సృష్టించారు.
* గత నెల 30న దంతెవాడ జిల్లా నీలవాయి అటవీ ప్రాంతంలో 100 మంది నక్సల్స్‌కు భద్రతా దళాలకు మధ్య ఎదురు కాల్పులు చోటు చేసుకోగా ఇందులో ఇద్దరు పోలీసులతో పాటు దూరదర్శన్‌ కెమెరామెన్‌ చనిపోయారు.

* ఈ నెల 8న ఛత్తీస్‌గఢ్‌లోని దంతెవాడ జిల్లా ఆకాష్‌నగర్‌-బచేలీ మార్గంలో మావోయిస్టులు బస్సును పేల్చిన సంఘటనలో నలుగురు పౌరులతో పాటు ఒక జవాను దుర్మరణం పాలయ్యారు. ఇంకో ఇద్దరు జవాన్లకు గాయాలయ్యాయి. ఇది ఎన్నికల విధుల కోసం కేటాయించిన బస్సు కావడం గమనార్హం.

* ఈ నెల 12న ఒకవైపు మొదటి దశ పోలింగ్‌ సాగుతుండగానే.. బీజాపూర్‌ జిల్లాలో వేర్వేరు చోట్ల భద్రతా బలగాలకు మావోయిస్టులకు మధ్య ఎదురుకాల్పులు చోటుచేసుకున్నాయి. ఇందులో ఐదుగురు భద్రతా సిబ్బందికి గాయాలవ్వగా మావోయిస్టులకు పెద్ద దెబ్బే తగిలినట్లు భావిస్తున్నారు. 12 నుంచి 15 మంది మావోయిస్టులకు తీవ్ర గాయాలై ఉండడమో చనిపోవడమో జరిగి ఉంటుందని అక్కడి సీఆర్‌పీఎఫ్‌ అధికారి ప్రకటించారు.

మూడు మావోయిస్టు ప్రభావిత జిల్లాలతో సంబంధం
కేంద్ర హోం శాఖ తెలంగాణలోని 31 జిల్లాల్లో 7 జిల్లాలు.. ఆదిలాబాద్‌, పెద్దపల్లి, జయశంకర్‌ భూపాలపల్లి, భద్రాద్రి కొత్తగూడెం, మంచిర్యాల, అసిఫాబాద్‌, మహబూబాబాద్‌ జిల్లాలను మావోయిస్టుల ప్రభావిత ప్రాంతాలుగా గుర్తించింది.  వీటిలో మూడు జిల్లాలతో ఉమ్మడి ఖమ్మం జిల్లాకు సంబంధాలు ఉన్నాయి. దీంతో ఈ ప్రాంతంలో ఎన్నికల నిర్వహణకు గట్టి ఏర్పాట్లు చేయాల్సిన అవసరం ఏర్పడుతోంది.

ఆకాశ మార్గంలో బలగాల పయనం
కూంబింగ్‌తో పాటు పలు రకాల విధుల నిమిత్తం పోలీసు బలగాలు దండకారణ్యంలో సంచరిస్తున్నాయి. బేస్‌ క్యాంపుల నుంచి సమీపంలో ఉండే సంతలకు గానీ మార్కెట్‌కు గానీ వెళ్లి నిత్యావసర సరకులను కొనుగోలు చేసే క్రమంలో గతంలో కొన్ని దుర్ఘటనలు చోటు చేసుకున్నాయి. అధికారులు అనారోగ్యానికి గురైతే వెంటనే ఆసుపత్రికి పంపించాలంటే కాలయాపన జరుగుతోంది. ఈ నేపథ్యంలో హెలికాప్టర్‌లను ఆశ్రయిస్తున్నారు. ఇటీవల సరిహద్దు ప్రాంతంలో విధులు నిర్వహిస్తున్న ఓ అధికారి అనారోగ్యం పాలైతే  హెలికాప్టర్‌లో భద్రాచలం ఆసుపత్రికి తరలించి చికిత్స అందించారు. కూంబింగ్‌లో ఉండే పోలీసులకు అవసరమైన మంచినీరు, ఆహార పదార్థాలు, మందులు, నిత్యావసర సరకులను తరలించేందుకు సైతం హెలికాప్టర్లను ఉపయోగిస్తున్నారని సమాచారం.  ఎన్నికల సమయంలోనూ వీటిని అవసరమైన మేరకు ఉపయోగించే అవకాశం ఉంది.

- భద్రాచలం, న్యూస్‌టుడే

మరిన్ని

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.