ప్ర‌త్యేక క‌థ‌నం

రోడ్డు అధ్వానం.. డ్రైవరు నిర్లక్ష్యం
ఆర్టీసీ అధికారుల ప్రాథమిక అంచనా  60కి చేరిన మృతులు
కొండగట్టులో పెను ప్రమాదానికి అసలు కారణాలివే
విచారణాధికారిగా నల్గొండ ఆర్టీసీ ప్రాంతీయ మేనేజర్‌
ఈనాడు, హైదరాబాద్‌: డ్రైవర్‌ నిర్లక్ష్యం, ఘాట్‌ రోడ్డు నిర్మాణంలో లోపాలే ఘోర ప్రమాదానికి కారణమని ఆర్టీసీ అధికారులు ప్రాథమికంగా అంచనాకు వచ్చారు. బస్సు అదుపు తప్పినప్పుడు అత్యవసరంగా వినియోగించే హ్యాండ్‌ బ్రేకును కూడా డ్రైవర్‌ ఉపయోగించలేదని గుర్తించారు. ప్రమాదంపై నల్గొండ ఆర్టీసీ ప్రాంతీయ మేనేజర్‌తో విచారణ చేయించాలని ఆర్టీసీ నిర్ణయించింది. జగిత్యాల జిల్లా కొండగట్టు ఆలయం నుంచి ఘాట్‌ రోడ్డులో వస్తున్న బస్సు మంగళవారం అదుపు తప్పి గుంతలోకి పడటంతో 61 మంది ప్రయాణికులు మృత్యువాత పడిన విషయం తెలిసిందే. రవాణా, పంచాయతీరాజ్‌, రహదారి భద్రత అధికారులు బుధవారం ఆ మార్గాన్ని పరిశీలించారు. ఘాట్‌ రోడ్డు నిర్మాణం లోపభూయిష్టంగా ఉన్నట్లు గుర్తించారు. దిద్దుబాటుకు చర్యలు చేపట్టారు.

పిట్టగోడా లేదు: ఘాట్‌ రోడ్డులో భక్తుల కోసం కాలిబాట నిర్మించలేదు. వాహనాల రాకపోకలకు వీలుగా మార్గాన్ని కొంత మేరకు విస్తరించినప్పటికీ కందకాలు ఉన్నచోట రాతితో పిట్టగోడ నిర్మించాలి. అదీ లేదు. కేవలం సన్నటి రెయిలింగు ఉంది. పాదచారుల మార్గం ఉన్నా, పిట్టగోడ ఉన్నా.. ప్రమాద తీవ్రత కొంతైనా తగ్గి ఉండేదని అధికారులు చెబుతున్నారు. కొండ ప్రాంతాల్లో వాలు (స్లోప్‌) ఉన్న చోట్ల స్పీడ్‌ బ్రేకర్లను నిర్మించకూడదు. ఒకవేళ నిర్మించాల్సివస్తే మూడు అంగుళాల ఎత్తులో మాత్రమే నిర్మించాలన్నది నిబంధన. ఇక్కడ దానినీ పట్టించుకోలేదు. అలాగే ఘాట్‌ రోడ్డు వెంబడి రియాల్టర్లు మట్టి కోసం సుమారు 40 అడుగుల మేరకు తవ్వకాలు చేపడితే అధికారులు ఏమి చేస్తున్నారన్న ప్రశ్న కూడా తలెత్తుతోంది. ఘాట్‌ రోడ్డు అనుసంధానంగా కొండకు మరోవైపు మార్గంలో ఎలాంటి తవ్వకాలు చేపట్టకూడదన్న నిబంధన ఉన్నా పట్టించుకున్న దాఖలాలు లేవు.

డ్రైవర్‌ నిర్లక్ష్యం..: ఇక్కడి ప్రమాదంలో డ్రైవర్‌ నిర్లక్ష్యం ప్రస్ఫుటంగా కనిపిస్తోందని ఆర్టీసీ అధికారులు చెబుతున్నారు. ప్రమాదానికి కాస్త ముందుగానే డ్రైవర్‌ బస్సుపై నియంత్రణ కోల్పోయినట్లు భావిన్నారు. మార్గం వాలుగా ఉండటం, వెంట వెంటనే మూడు స్పీడు బ్రేకర్లు ఉండటంతో బస్సు నియంత్రణ తప్పింది. స్పీడు బ్రేకర్ల వద్ద ఒక్కసారిగా పైకి లేచింది. నియంత్రించే కంగారులో కుడి వైపు బదులుగా ఎడమవైపునకు తప్పటంతో బస్సులు లోయలాంటి ప్రాంతంలోకి దూసుకుపోయింది. ఘాట్‌రోడ్డులో తిరుగు ప్రయాణంలో వాలుగా ఉన్న ప్రాంతాల్లో న్యూట్రల్‌ (ఇంజిన్‌ ఆఫ్‌ చేసి) బస్సును నడపకూడదన్నది నిబంధన. దానికి విరుద్ధంగా బస్సును న్యూట్రల్‌లో నడిపినట్లు అధికారులు గుర్తించారు. కనీసం హ్యాండ్‌ బ్రేక్‌ను వాడినా బస్సు నియంత్రణలోకి వచ్చేది అధికారులు చెబుతున్నారు. ప్రమాదానికి గురైన బస్సును పరిశీలించిన అధికారులు హ్యాండ్‌ బ్రేకును వినియోగించలేదని గుర్తించారు.

డ్రైవర్లకు శిక్షణ: ఘాట్‌ రూట్‌లలో బస్సులు నడిపే డ్రైవర్లకు ప్రత్యేక శిక్షణ ఇవ్వాలని ఆర్టీసీ ఇన్‌ఛార్జి మేనేజింగ్‌ డైరెక్టర్‌ సునీల్‌శర్మ నిర్ణయించారు. బుధవారం ఆర్టీసీ ప్రాంతీయ మేనేజర్లతో జరిగిన సమావేశంలో ఈ మేరకు నిర్ణయం తీసుకున్నారు. భవిష్యత్తులో ప్రమాదాలు జరగకుండా సూచనలు చేసేందుకు ఆర్టీసీ, రవాణా, ఆర్‌ అండ్‌ బీ, పోలీసు అధికారులతో కమిటీ ఏర్పాటు చేశారు. డ్రైవర్లకు రోజూ జాగ్రత్తలను గుర్తుచేయాలని.. బస్సుల వేగ పరిమితులను నియంత్రించాలని సునీల్‌శర్మ సూచించారు. రోడ్డు భద్రతపై పోలీసు, ట్రాఫిక్‌, ఇతర నిపుణులతో డ్రైవర్లకు శిక్షణ ఇప్పించాలని కోరారు. కొండగట్టు వద్ద సురక్షిత ప్రయాణానికి ప్రత్యామ్నాయ మార్గాన్ని గుర్తించాలన్నారు. మూలమలుపులు, ప్రమాదాలకు ఆస్కారమున్న చోట బారికేడ్లు ఏర్పాటు చేయించాలని ఆదేశించారు. ఘాట్‌రోడ్లు ఉన్న పుణ్యక్షేత్రాలకు నడిచే బస్సుల కండిషన్‌పై ప్రత్యేక దృష్టి సారించాలని నిర్ణయించారు.


బ్రేక్‌ బదులు ఎక్స్‌లేటర్‌ నొక్కాడు..
ఆర్టీసీ అధికారుల ప్రాథమిక నివేదిక
కరీంనగర్‌ రవాణా విభాగం, న్యూస్‌టుడే: కొండగట్టులో బస్సు ప్రమాదానికి డ్రైవర్‌ నిర్లక్ష్యమే కారణమని ఆర్టీసీ అధికారులు ప్రాథమిక నివేదిక పంపినట్లు సమాచారం. ‘డ్రైవర్‌ నిర్లక్ష్యంగా నడపడంతోనే బస్సు అదుపు తప్పి ముందున్న మినీ వ్యాన్‌ను ఢీకొట్టింది.. దీంతో డ్రైవర్‌ ఒత్తిడికి గురయ్యాడు. అక్కడే స్పీడ్‌ బ్రేకర్లు రావడంతో వాటివద్ద బ్రేక్‌ వేయాల్సిందిపోయి ఎక్స్‌లేటర్‌ తొక్కాడు. దీంతో బస్సు వేగం పెరిగి అదుపుతప్పి లోయలో పడిందని’ నివేదికలో వెల్లడించినట్లు తెలిసింది. డ్రైవర్‌ శ్రీనివాస్‌ మృతి చెందడంతో ప్రమాదం ఎలా జరిగిందో స్పష్టంగా తెలియడం లేదని.. క్షతగాత్రులకు చికిత్స అనంతరం వారినుంచి మరికొన్ని వివరాలు తెలుసుకునే ప్రయత్నం చేస్తామని అధికారులు చెబుతున్నారు.

మరిన్ని

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.