ప్ర‌త్యేక క‌థ‌నం


ఓటరు నాడినీ పడతారు
వైద్యులకు అధిక సంఖ్యలో సీట్లు ఇస్తున్న ప్రధాన పార్టీలు
30 మంది వరకు బరిలో నిలిచిన డాక్టర్లు
ఈనాడు - హైదరాబాద్‌
ప్రజలతో ప్రత్యక్ష సంబంధాలు...సమాజంలో గౌరవం...ఆర్థిక బలం... రాజకీయాల్లో రాణించడానికి ఇంతకు మించి ఇంకేం అర్హతలు కావాలి? ఇవన్నీ పుష్కలంగా ఉన్నందుకేమో అన్ని రాజకీయ పార్టీల వారు వైద్యులకు పెద్దపీట వేస్తున్నాయి. ఇప్పటికే ఎంతోమంది వైద్యనిపుణులు రాజకీయాల్లో రాణించారు. మంత్రులుగా కూడా సేవలందించిన వారు ఉన్నారు. ఈసారి కూడా పదుల సంఖ్యలో వైద్యులు ప్రజాక్షేత్రంలో ప్రవేశిస్తున్నారు.
భాజపా నుంచి...
అయిండ్ల సువర్ణారెడ్డి: ప్రభుత్వ వైద్యాధికారిణిగా పనిచేస్తూ సెప్టెంబరులో రాజీనామా చేసిన ఈమె నిర్మల్‌ అసెంబ్లీ నియోజకవర్గం నుంచి భాజపా ఎమ్మెల్యే అభ్యర్థిగా బరిలో నిలిచారు.

పి.విజయచంద్రారెడ్డి: వరంగల్‌లోని ఎంజీఎం ఆసుపత్రిలో ఎముకల వైద్యుడిగా పనిచేశారు. ఉద్యోగానికి రాజీనామా చేసి 2012 ఉప ఎన్నికల్లో పరకాల భాజపా అభ్యర్థిగా పోటీ చేశారు. రెండోసారి పరకాల నుంచి పోటీ చేస్తున్నారు.

కొత్తపల్లి శ్రీనివాసులు: సిర్పూర్‌ నుంచి భాజపా అభ్యర్థిగా మొదటిసారి ఎన్నికల్లో పోటీ  చేస్తున్నారు.

జె.వెంకట్‌: వైద్యుడైన ఈయన కోరుట్లలో భాజపా నుంచి పోటీ చేస్తున్నారు. ప్రజారాజ్యం పార్టీ నుంచి 2009 ఎన్నికల్లో ఆయన భార్య పోటీ చేశారు.

బూక్యా ప్రసాదరావు: అశ్వారావుపేటలో తన భార్యతో కలిసి ఆసుపత్రిని నడుపుతున్న ప్రసాదరావు భాజపా నుంచి పోటీలో దిగారు. గత ఎన్నికల్లో ఆయన అదే స్థానం నుంచి స్వతంత్ర అభ్యర్థిగా పోటీ చేసి సుమారు 2,500 ఓట్లు పొందారు.


తెరాస నుంచి...
తాటికొండ రాజయ్య: పిల్లల వైద్యుడైన రాజయ్య వరంగల్‌ రూరల్‌ జిల్లా స్టేషన్‌ఘన్‌పూర్‌ నుంచి తెరాస తరఫున బరిలో నిలిచారు. ఇప్పటికీ హన్మకొండలో ఆయనకు సొంత ఆసుపత్రి ఉంది. గత ఎన్నికల్లో అదే స్థానం నుంచి గెలిచి దాదాపు ఏడాదిపాటు ఉప ముఖ్యమంత్రి హోదాలో వైద్య ఆరోగ్యశాఖ మంత్రిగా వ్యవహరించారు.

తళ్లెం వెంకటరావు: భద్రాచలం నియోజకవర్గం నుంచి తెరాస అభ్యర్థిగా పోటీ చేస్తున్న వెంకటరావు అదే పట్టణంలో నర్సింగ్‌ హోమ్‌ నడుపుతున్నారు. 2014 ఎన్నికల్లో వైకాపా నుంచి మహబూబాబాద్‌ ఎంపీ అభ్యర్థిగా పోటీ చేసి పరాజయం పొందారు.

ఎం.సంజయ్‌కుమార్‌: నేత్ర వైద్యుడైన సంజయ్‌కుమార్‌ జగిత్యాల తెరాస అభ్యర్థిగా కాంగ్రెస్‌ అభ్యర్థి జీవన్‌రెడ్డితో తలపడుతున్నారు.  2014 ఎన్నికల్లో ఆయన పోటీ చేసి ఓడిపోయారు.

అబ్రహం: ఒకసారి ఎమ్మెల్యేగా గెలిచారు. తెదేపాలో చేరిన ఆయన 2014 ఎన్నికల్లో ఆలంపూర్‌ నియోజకవర్గం నుంచి  పోటీ చేసి కాంగ్రెస్‌ అభ్యర్థి సంపత్‌కుమార్‌ చేతిలో ఓడిపోయారు. కొద్ది నెలల క్రితమే ఆయన తెరాసలో చేరి ప్రస్తుతం అదే స్థానం నుంచి బరిలో నిలిచారు.

సి.లక్ష్మారెడ్డి: హోమియో వైద్యుడైన లక్ష్మారెడ్డి తెరాస తరఫున మహబూబ్‌నగర్‌ జిల్లా జడ్చర్ల నుంచి బరిలో నిలిచారు. వైద్య, ఆరోగ్యశాఖ మంత్రిగా ఉన్నారు. ఇక్కడి నుంచి రెండు సార్లు ఆయన గెలుపొందారు.

కాంగ్రెస్‌ నుంచి..

మల్లు రవి: వైద్య విద్య (ఎంబీబీఎస్‌, డీఎల్‌ఓ) అభ్యసించిన రవి జడ్చర్ల నుంచి కాంగ్రెస్‌ అభ్యర్థిగా ఎన్నికల క్షేత్రంలో దిగారు. గత ఎన్నికల్లోనూ అదే స్థానం నుంచి పోటీ చేసి తెరాస అభ్యర్థి లక్ష్మారెడ్డి చేతిలో ఓటమిపాలయ్యారు.
నాగం జనార్దనరెడ్డి: వైద్యుడైన నాగం తెదేపా ద్వారా రాజకీయాల్లో అడుగుపెట్టారు. అయిదుసార్లు ఎమ్మెల్యేగా గెలిచారు. ఆయన 2013లో భాజపాలో, ఆ తర్వాత కాంగ్రెస్‌ పార్టీలో చేరారు. నాగర్‌కర్నూల్‌ నుంచి కాంగ్రెస్‌ అభ్యర్థిగా బరిలో నిలిచారు.
జె.గీతారెడ్డి: గైనకాలజిస్టు అయిన గీతారెడ్డి రాజీవ్‌గాంధీ హయాంలో రాజకీయాల్లోకి ప్రవేశించారు. సంగారెడ్డి జిల్లా జహీరాబాద్‌ నుంచి ఇప్పటికే 2009, 2014లో విజయం సాధించిన ఆమె మూడోసారి అదే స్థానం నుంచి ఎన్నికల బరిలో నిలిచారు. అంతకుముందు గజ్వేల్‌ నుంచి రెండు సార్లు ఎమ్మెల్యేగా గెలిచారు.
పాల్వాయి హరీశ్‌బాబు: సిర్పూర్‌ కాగజ్‌నగర్‌ నుంచి మొదటిసారి పోటీ చేస్తున్నారు. ఆయన పిల్లల వైద్య నిపుణుడు. హరీశ్‌బాబు ఇటీవలే కాంగ్రెస్‌లో చేరి అభ్యర్థిగా బరిలో నిలిచారు.
జాటోతు రామచంద్రు నాయక్‌: జనరల్‌ సర్జన్‌గా పేరొందిన రామచంద్రు నాయక్‌ సూర్యాపేటలో ప్రైవేట్‌ ఆసుపత్రిని నడుపుతున్నారు. ఆయన డోర్నకల్‌ నుంచి కాంగ్రెస్‌ అభ్యర్థిగా సీటు దక్కించుకున్నారు. తెలంగాణ రాష్ట్ర డాక్టర్స్‌ ఫోరమ్‌ ప్రధాన కార్యదర్శిగా వ్యవహరిస్తున్నారు.
సి.వంశీకృష్ణ: జనరల్‌ సర్జన్‌ అయిన ఆయన 1998లోనే ప్రభుత్వ ఉద్యోగానికి రాజీనామా చేసి కల్వకుర్తిలో తండ్రి బాలయ్య పేరిట క్లినిక్‌ ప్రారంభించారు. రాజకీయాల్లోకి ప్రవేశించిన ఆయన కాంగ్రెస్‌ తరఫున పోటీ చేసి 2004లో ఎమ్మెల్యేగా అచ్చంపేట నుంచి గెలుపొందారు. అదే స్థానం నుంచి 2009, 2014లో పోటీ చేసినా విజయం దక్కలేదు. తాజాగా మళ్లీ బరిలో నిలిచారు.
బీఎల్‌ఎఫ్‌ నుంచి..
ఇక బహుజన లెఫ్ట్‌ ఫ్రంట్‌ (బీఎల్‌ఎఫ్‌)లో భాగంగా సీపీఎం భద్రాచలం నుంచి మిడియం బాబూరావును, మధిర నుంచి కోటా రాంబాబు, కామారెడ్డి నుంచి పుట్టా మల్లికార్జున్‌కు సీట్లు ఇచ్చి ఎన్నికల క్షేత్రంలో నిలిపాయి.
ప్రధాన పార్టీల నుంచే దాదాపు 30 మంది వరకు ఎన్నికల బరిలో దిగి ఓటరు నాడిని పట్టే ప్రయత్నంలో నిమగ్నమయ్యారు.

మరిన్ని

జిల్లా వార్తలు
జిల్లా తాజా వార్తలు

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.