సంపాదకీయం

సర్పయాగంలో సమిధలు
ముకలు కొరికే ఎనిమిది డిగ్రీల సెల్సియస్‌ శీతల వాతావరణ స్థితిగతుల్లోనూ భయానక ఉగ్రవాదం సెగలు పొగలతో కశ్మీరం భుగభుగలాడుతోంది. ఉగ్రవాదుల ఏరివేతలో సైన్యం, ప్రతీపశక్తులకు సాధ్యమైనంతగా దడి కట్టాలనుకొంటున్న జనం... ఈ పోరులో అనివార్యంగా అమాయక జనహననం- యావద్దేశాన్ని కలచివేస్తోంది. కశ్మీరులో పూర్తిస్థాయిలో ప్రజలకు చేరువ అయ్యామని, ఉగ్రవాదంపై సైన్యం భారీస్థాయిలో విరుచుకుపడిందని, రికార్డుస్థాయిలో టెర్రరిస్టుల్ని ఏరేసిందని ప్రధాని మోదీ బహిరంగంగా ప్రకటించిన రోజునే- కశ్మీరులోని పుల్‌వామాలో జరిగిన భీకర ఎదురుకాల్పుల(ఎన్‌కౌంటర్‌) ఘటనలో ముగ్గురు మిలిటెంట్లు, ఓ జవాను సహా ఏడుగురు పౌరులూ కడతేరిపోయారు. 2016లో యువ ఉగ్రవాది బుర్హాన్‌ వనీని భద్రతా బలగాలు మట్టుపెట్టిన దరిమిలా, టెర్రరిస్టులకు కశ్మీరీల సంఘీభావం పెరిగిందన్నది తెలిసిందే. రాళ్ల దాడులతో రక్షణ దళాలను నిలువరించి టెర్రరిస్టులను తప్పించే క్రమంలో ఇంతకుముందూ భద్రత బలగాల కాల్పుల్లో పౌరులు ప్రాణాలు కోల్పోయినా- ఏ దుర్ఘటనలోనూ నిహతులైనవారి సంఖ్య అర డజను దాటలేదు. అలాంటిదిప్పుడు ఫుల్‌వామా జిల్లా సిర్నూ గ్రామంలో ఎదురుకాల్పులు జరుగుతున్న సంగతి తెలిసి ఆ ప్రాంతాన్ని అన్ని వైపుల నుంచి పౌరులు చుట్టిముట్టి ఆవేశోద్రేకాలతో విరుచుకుపడబోతుంటే కాల్పులు జరపాల్సి వచ్చినట్లు సైనిక బలగాలు చెబుతున్నాయి. మృతులలో పదమూడేళ్ల బాలుడు, ఇండొనేసియాలో ఎమ్‌బీఏ చేసి వచ్చిన వ్యక్తి (మూడు నెలల పాపకు తండ్రి) ఉండటం, పదుల సంఖ్యలో పౌరులు బుల్లెట్‌ గాయాల పాలుకావడం పరిస్థితిని మరింతగా విషమింపజేస్తోంది. ‘ఎదురుకాల్పుల సందర్భంగా జనం నిరసనలు కొత్త కానప్పుడు, గతం నుంచి గుణపాఠాలు నేర్చి మరిన్ని జాగ్రత్తలు తీసుకోలేమా?’ అన్న ఒమర్‌ అబ్దుల్లా ట్వీట్లతో, తన ప్రజల్ని తానే చంపుకొని ఏ దేశమూ యుద్ధాన్ని గెలవలేదన్న మెహబూబా ముఫ్తీ విమర్శలతో- రాజకీయమూ వేడెక్కింది. నేడు గవర్నర్‌ పాలన నుంచి మరో మూన్నాళ్ల తరవాత రాష్ట్రపతి పాలనలోకి వెళ్లనున్న జమ్మూకశ్మీర్‌కు, పెను సంక్షుభిత స్థితి ఇది!

మొన్న ఆగస్టులో తన పాలన మొదలయ్యాక- ఎదురు కాల్పుల వేళ భద్రతా దళాలపై మూకదాడులు బాగా తగ్గిపోయాయని, హింసాత్మక ఘటనలూ తగ్గుతున్నాయని గవర్నర్‌ సత్యపాల్‌ మాలిక్‌ ఘనంగా చాటుకొంటున్నారు. అక్టోబరు మూడో వారంలో కుల్గాం జిల్లా లారూ గ్రామంలో ఆరుగురు పౌరులు మరణించినప్పుడు- ఎదురు కాల్పులు  జరిగిన ప్రదేశాన్ని తాము శుభ్రం చెయ్యకముందే వచ్చి పేలుడు పదార్థాలపై నడిచి వాళ్లు ప్రాణం మీదకు తెచ్చుకొన్నారని సర్కారు వారు నమ్మబలికారు. ఈసారి అలాంటి సాకు చెప్పే అవకాశమే లేకపోవడం- ఒకే నాణేనికి రెండు    పార్శ్వాల్లాంటి నిజాన్ని కళ్లకు కడుతోంది. పాకిస్థాన్‌ ఇండియాపై చేస్తున్న నాలుగంచెల ప్రచ్ఛన్న యుద్ధ వ్యూహంలో అత్యంత ప్రమాదకరమైన అంకం- మన వేళ్లతో మన కళ్లే పొడిచేలా స్థానికంగా ఉగ్రవాదుల్ని పెంచి పోషించడం. దాని అణచివేత పెరిగేకొద్దీ స్థానిక యువజనంలో ఇంతలంతలయ్యే కసి, విద్వేషాలే ఎరువుగా ఉగ్రవాదం అజరామరం కావడం! ఇన్సానియత్‌ (మానవత్వం), జమ్‌హురియత్‌ (ప్రజాస్వామ్యం), కశ్మీరియత్‌ (సామరస్యానికి గొడుగుపట్టే కశ్మీరీ సంస్కృతి)- వాటి ఆధారంగా విస్తృత సంప్రతింపుల ప్రక్రియతో కశ్మీరానికి రాజకీయ పరిష్కారం సాధిస్తామన్న మోదీ ప్రభుత్వం, ఆ దిశగా అరకొర అడుగులే కదిపింది. షోపియన్‌, అనంతనాగ్‌, బుద్గామ్‌, కుల్గామ్‌, శ్రీనగర్‌ ప్రాంతాల్లోనే మెజారిటీ టెర్రరిస్టులు మేట వేశారంటూ వాళ్లను చావుదెబ్బ తీయాల్సి ఉందని పక్షం రోజుల క్రితం భారత సైనిక దళాధిపతి రావత్‌ స్పష్టీకరించారు. ఉగ్రవాదుల గుట్టుమట్లపై స్థానికుల నుంచే సమాచారం అందుతోందని, వాతావరణం సానుకూలంగా మారుతోందని చెబుతున్నా- క్షేత్రస్థాయి వాస్తవాల్ని విస్మరించే వీల్లేదు!

పాకిస్థాన్‌ ప్రాపులో కోరసాచిన ఉగ్రవాద విష భుజంగం ఈ 28 ఏళ్ల కాలంలో సుందర కశ్మీరంలో ఎంతటి మానవ మహావిషాదం సృష్టించిందో సర్కారీ గణాంకాలే చాటుతున్నాయి. 22 వేల మందికి పైగా మిలిటెంట్లు భద్రత బలగాల కాల్పుల్లో హతమారిపోగా, అయిదు వేలమందికిపైగా జవాన్లూ అమరులయ్యారు. కశ్మీరీల విముక్తి కోసమే పోరాడుతున్నామన్న పాకిస్థాన్‌ కపట నాటకం, దాదాపు 15 వేలమంది పౌరుల్నీ బలిగొంది. గత సంవత్సరం 213 మంది టెర్రరిస్టుల్ని సైన్యం మట్టుబెట్టగా ఈ ఏడాది ఆ సంఖ్య 240కి చేరిందంటున్నా- నరికినకొద్దీ మొలుచుకొస్తున్న రావణాసురుడి తలల్లా ఉగ్రవాదం అలుపెరుగక పంజా విసరుతూనే ఉంది. భద్రత బలగాల దాడి నుంచి ఉగ్రవాదుల్ని తప్పించడం, అప్పటికేవాళ్లు హతమారిపోయి ఉంటే, మృతదేహాల్ని ఎత్తుకెళ్లి, యువజనానికి ఉత్ప్రేరకంగా అంతిమ యాత్రలు నిర్వహించడం- అనే జంట లక్ష్యాల కోసం అక్కడి యువతరం పోటెత్తుతోంది. సామాజిక మాధ్యమాల దన్నుతో సమూహ శక్తిగా భారత వ్యతిరేక భావజాలంతో ఊగిపోతున్న యువజనంలోని ఆవేశకావేషాల్ని ఏ విధంగా ఉపశమింపజేయాలన్న దానిపై- పార్టీ భేదాలకు అతీతంగా నేతాగణాలు దృష్టి సారించాలి. రాష్ట్ర జనాభాలో 18-29 మధ్యవయస్కులు దాదాపు పాతిక శాతం ఉండగా, నిరుద్యోగిత రేటు జాతీయ సగటు కంటే అధికంగా నమోదవుతోంది. రూ.89 వేలకోట్లతో తాజాగా రాష్ట్ర గవర్నర్‌ రూపొందించిన బడ్జెట్టూ- ఉపాధి కల్పన అవకాశాలపై శీతకన్నేసింది. కీలక సరిహద్దు రాష్ట్రంలో ఉపాధి లేమి నిరాశా నిస్పృహలతో ఉన్న యువజనాన్ని ఉగ్రవాద సమర్థకులుగా మార్చేస్తున్న ప్రస్తుత దుస్థితి- కేవలం సైనిక చర్యలతో తొలగిపోయేది కాదు. రాష్ట్రం బాగోగులు పట్టని దుర్రాజకీయం కొనసాగినన్నాళ్లూ ఉగ్రవాద పీడ నుంచి దేశానికి నిష్కృతి లేదు!

జిల్లా వార్తలు
జిల్లా తాజా వార్తలు
    ఎక్కువ మంది చదివినవి (Most Read)

దేవ‌తార్చ‌న

రుచులు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.