close

సోమవారం, డిసెంబర్ 10, 2018

న్యూస్‌టుడే, సూళ్లూరుపేట
ముగ్గురితో మెలిక.. చెప్పింది చాలిక !
క్షేత్రస్థాయిలో సీఎండీ ఆదేశాలు బేఖాతర్‌
వ్యవసాయ విద్యుత్తు సర్వీసులకు అన్నదాత ఎదురుచూపు
ముగ్గురు ఉండాలని ముడిపెడుతున్న డిస్కం సిబ్బంది
వద్దని వేడుకుంటున్న రైతులు
న్యూస్‌టుడే, సూళ్లూరుపేట
‘మాది రైతు ప్రభుత్వం. రైతులకు పెద్దపీట వేస్తున్నాం. 24 గంటల విద్యుత్తు సరఫరా చేస్తున్నాం. అందులో వ్యవసాయానికి ఏడు గంటలపాటు ఇస్తున్నాం’
- ముఖ్యమంత్రి, మంత్రులు, నేతలు చెబుతున్న మాటలు ఇవి.
* అన్నదాతలు వ్యవసాయ విద్యుత్తు సర్వీసుల కోసం నెలల తరబడి డిస్కం కార్యాలయాల చుట్టూ తిరగాల్సి వస్తోంది. వ్యయ ప్రయాసలు పడి డిస్కం అధికారుల వద్దకు వస్తే ముగ్గురుంటేనే తమ వద్దకు రావాలని లేదంటే కుదరని ముడిపెడుతున్నారు. పంటలను ఎలా గట్టెక్కించుకోవాలో తెలియక కుమిలిపోతున్నారు. - క్షేత్రస్థాయిలో వాస్తవ పరిస్థితి.
ఈ చిత్రంలో కనిపిస్తున్న యువకుడిది  సూళ్లూరుపేట గ్రామీణ మండలంలోని ఉగ్గుమూడి. ఇతని పేరు  పవన్‌కుమార్‌. డిగ్రీ వరకు చదువుకున్నాడు. ఖాళీగా ఉండకుండా సొంత భూమిని సాగు చేసుకుంటున్నాడు. బోరు బావి ఉంది. 2016 డిసెంబరులో అతని తల్లి భానుమతి పేరుపై వ్యవసాయ విద్యుత్తు సర్వీసుకు దరఖాస్తు చేశాడు. అప్పటి నుంచి కార్యాలయానికి తిరుగుతున్నాడు. అదిగో.. ఇదిగో అంటూ డిస్కం ఇంజినీర్లు జాప్యం చేశారు. చివరికి సమయం అయిపోయి అతని దరఖాస్తును తిరస్కరించారు. ఇక చేసేదిలేక ఆ యువకుడు మళ్లీ 2017 జూన్‌లో తండ్రి చెదులుపాక హరినాథ్‌ పేరుతో 8 హెచ్‌పీ విద్యుత్తు సర్వీసుకు దరఖాస్తు చేశాడు. ఆనాటి నుంచి నేటి వరకు ఓపిగ్గా డిస్కం కార్యాలయానికి తిరుగుతూనే ఉన్నాడు. ‘మీ వ్యవసాయ భూమి ఉన్న ప్రాంతంలో మరో ఇద్దరు విద్యుత్తు సర్వీసులకు దరఖాస్తు చేస్తేనే తాము కనెక్షన్‌ మంజూరు చేస్తాం’ అని అధికారులు చెబుతున్నారు. చేసేదిలేక ఆ యువకుడు కొదనెలల కిందట పక్కన పొలానికి చెందిన మనుబోలు మునిరాజా పేరుతో వ్యవసాయ విద్యుత్తు సర్వీసు కోసం దరఖాస్తు చేయించాడు. అయినా నేటి వరకు సర్వీసు మంజూరు చేయలేదు. ప్రస్తుతం ఇద్దరే ఆ ప్రాంతంలో సర్వీసు కోసం దరఖాస్తు చేశారని, ముగ్గురుంటేనే తాము మంజూరు చేయగలమని, మూడో వ్యక్తి దరఖాస్తు చేయాలని డిస్కం సిబ్బంది సూచిస్తున్నారు. ఆ యువకుడు ఎన్ని మాటలు చెప్పినా ఎవరూ పట్టించుకోవడం లేదు.
*ఇది ఉగ్గుమూడికి చెందిన వపన్‌కుమార్‌ ఒక్కరి పరిస్థితి కాదు.... జిల్లాలోని వందలాది మంది రైతులు ఎదుర్కొంటున్న సమస్య..
* జిల్లాలో దరఖాస్తు చేసిన ప్రతి రైతుకు వ్యవసాయ సర్వీసులను అక్టోబరు 31 నాటికి మంజూరు చేయాలి. విద్యుత్తు సరఫరాలో అంతరాయాల్లేకుండా నాణ్యమైన విద్యుత్తు సరఫరా చేయాలి. రైతులు అడిగితేనే  వెంటనే సర్వీసులు మంజూరు చేసేలా  చర్యలు తీసుకోవాలి.
* ఈ ఏడాది సెప్టెంబరు 15న నెల్లూరు విద్యుత్తు భవన్‌లో జరిగిన  వివిధ విభాగాల ఇంజినీర్ల సమీక్షలో డిస్కం ఛైర్మన్‌ అండ్‌ మేనేజింగ్‌ డైరెక్టర్‌ (సీఎండీ) ఎం.ఎం.నాయక్‌ అన్న మాటలు ఇవి.

పెడచెవిన సీఎండీ ఆదేశాలు
స్వయానా డిస్కం ఛైర్మన్‌ అండ్‌ మేనేజింగ్‌ డైరెక్టర్‌ (సీఎండీ) నాయక్‌ ఇచ్చిన ఆదేశాలు జిల్లాలో అమలు కావడం లేదు. జిల్లాలో డిస్కం ఇంజినీర్లు మాత్రం నిబంధనల పేరు చెబుతూ వ్యవసాయ విద్యుత్తు సర్వీసులు మంజూరు చేయడం లేదు. విద్యుత్తు సర్వీసుల కోసం రైతులు పడుతున్న అవస్థలు వర్ణనాతీతం. నెలల తరబడి డిస్కం కార్యాలయాల చుట్టూ ప్రదక్షిణలు చేస్తున్నారు. ఇంజినీర్లు కనికరించడం లేదు. ఒక్కరు.. ఇద్దరు ఉంటే వ్యవసాయ విద్యుత్తు సర్వీసులు మంజూరు చేసే ప్రసక్తే లేదని ఇంజినీర్లు స్పష్టం చేస్తున్నారు. ముగ్గురుంటేనే సర్వీసులు మంజూరు చేస్తామని స్పష్టం చేస్తున్నారు. ఇక్కడ డిస్కం సీఎండీ ఆదేశాలను రైతులు పరిగణనలోకి తీసుకోవాలా.. లేదంటే.. స్థానికంగా ఇంజినీర్లు చెబుతున్న మాటలను రైతులు నమ్మలా.. అనేది అర్థం కావడం లేదు. సంస్థకు చెందిన ఓ ఉన్నతాధికారి జిల్లాలోని డిస్కం ఇంజినీర్ల సమక్షంలో చెప్పిన ఆదేశాలనే అమలు చేయకపోతే ఇక సామాన్యుల పరిస్థితి ఏమిటో.. దీనిని బట్టి తెలుస్తోంది.

జిల్లాలో పరిస్థితి.. జిల్లాలో పలు ప్రాంతాల్లో గ్రామాలకు సుదూర ప్రాంతాల్లో పొలాలు ఉంటున్నాయి. అక్కడ కేవలం ఒకరిద్దరు పంట పొలాలే ఉంటాయి.అలాంటి ప్రాంతాల నుంచి విద్యుత్తు సర్వీసుల కోసం రైతులు వస్తే.. డిస్కం ఇంజినీర్లు ఆ ప్రాంతానికి చెందిన ముగ్గురు రైతులు దరఖాస్తు చేస్తేనే సర్వీసులు మంజూరు చేయగలమని స్పష్టం చేస్తున్నారు. మా చుట్టుపక్కల వ్యవసాయ విద్యుత్తు సర్వీసులు అవసరమైన రైతులు లేరని చెబుతున్నా అలా ఉంటే తాము ఏమీ చేయలేమని, ముగ్గురింటేనే సర్వీసులు ఇస్తామని తెగేసి చెబుతున్నారు. ఇద్దరు ఉన్నా.. కూడ సర్వీసులు మంజూరు చేయడం లేదు. రైతుల పంటల ఎండపెట్టుకోవాల్సిన పరిస్థితి ఏర్పడుతోంది. ముగ్గురు రైతులు వ్యవసాయ విద్యుత్తు సర్వీసులకు దరఖాస్తు చేస్తే.. వారి అందరికీ కలిపి హెచ్‌డీఎస్‌ కింద ఓ ట్రాన్స్‌ఫార్మర్‌ ఏర్పాటు చేసి, కనెక్షన్లు ఇస్తామని ఇంజినీర్లు చెబుతున్నారు.
దరఖాస్తులు పరిశీలిస్తే.. జిల్లాలోని డిస్కం సర్కిల్‌ పరిధిలో ఈనెల 16 తేదీ నాటికి 11,823 మంది రైతులు వ్యవసాయ విద్యుత్తు సర్వీసుల కోసం దరఖాస్తు చేశారు. వీరిలో ఇప్పటి వరకు 8,709 మందికి సర్వీసులను మంజూరు చేసినట్లు అధికారిక లెక్కలు చెబుతున్నాయి. ఇంకా 3,114 మందికి సర్వీసులను మంజూరు చేయాల్సి ఉంది.

* కావలి ప్రాంతంలోనే 1192 మందికి సర్వీసులు మంజూరు కావల్సి ఉంది.  వీరికాక ఒకటి, రెండు సర్వీసుల కోసం దరఖాస్తు చేసేందుకు డిస్కం కార్యాలయాల చుట్టూ తిరుగుతున్న వారు వందలాది మంది ఉన్నారు.. వారిని పైన కనబరిచిన లెక్కల్లో చూపలేదు.  ః సూళ్లూరుపేట గ్రామీణ మండలంలోనే ఒకరు చొప్పున విద్యుత్తు సర్వీసులకు దరఖాస్తు చేసిన వారు 24 మంది వరకు ఉన్నారు. అలాగే ఇద్దరు చొప్పున దరఖాస్తు చేసిన వారు పది మంది రైతులు ఉన్నారు. జిల్లాలోని ప్రతి మండలంలోనూ కుప్పలుతెప్పలుగా ఒకరు, ఇద్దరు చొప్పున వ్యవసాయ సర్వీసులకు దరఖాస్తు చేసిన రైతులు ఉండటం కలవరపెడుతోంది.

తాజా వార్తలు

జనరల్

జిల్లా వార్తలు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.