close

మంగళవారం, ఏప్రిల్ 24, 2018

జనరల్

ఎక్కడుంటే అక్కడే రేషన్‌..!
పోర్టబులిటీ విధానంపై సర్వత్రా హర్షం
సమయం ఆదా... తగ్గిన ఆర్థికభారం
అర్బన్‌ కలెక్టరేట్‌, కమలాపూర్‌, న్యూస్‌టుడే
రాష్ట్ర ప్రభుత్వం పౌరసరఫరాల శాఖ ద్వారా పంపిణీ చేసే బియ్యం పక్కదారి పట్టకుండా ఆధార్‌తో అనుసంధానం చేసి బయోమెట్రిక్‌ విధానాన్ని తీసుకొచ్చింది. ఇది బాగానే ఉన్నా బతుకుదెరువు కోసం స్వస్థలాన్ని వదిలి మరో ప్రాంతాలకు వలస వెళ్లిన వారు ఈ విధానంతో ఇబ్బంది పడ్డారు. రేషన్‌ బియ్యం ఇస్తున్నప్పుడు స్వస్థలానికి వెళ్లి తీసుకోవలసిన పరిస్థితి ఏర్పడింది. కొన్ని నెలలపాటు తీసుకోకుంటే కార్డు రద్దయ్యే ప్రమాదం ఉండటంతో తప్పనిసరిగా వెళ్లాల్సిన పరిస్థితి. ఈ సమస్యను గుర్తించిన ప్రభుత్వం ఎక్కడి నుంచైనా బియ్యం తీసుకునే పోర్టబులిటీ విధానాన్ని తీసుకొచ్చింది. ఈ విధానం తమకు మేలు చేకూర్చిందని ఎంతోమంది చెబుతున్నారు. ఏప్రిల్‌లో ఈ పద్ధతి అమలు తీరుపై ‘న్యూస్‌టుడే’ కథనం.
* మొత్తం కార్డులు : 2,52,697
* ఏప్రిల్‌లో పోర్టబులిటీ సౌకర్యం
వినియోగించుకున్న కార్డుదారులు : 30,169
* కార్డుదారులు తీసుకున్న బియ్యం : 582 మెట్రిక్‌ టన్నులు
* మొత్తం చౌక ధరల దుకాణాలు : 459
* పోర్టబులిటీ లావాదేవీల సౌకర్యమున్నవి : 450
* ఇతర జిల్లాల్లో బియ్యం తీసుకున్న జిల్లావాసులు  : 5894

జిల్లాలో ఫిబ్రవరి మాసం నుంచి మొదలైన ఈ-పాస్‌ విధానం మొదట కొంత ఇబ్బందులను తెచ్చిపెట్టినా ఇప్పుడు కార్డుదారులకు సౌకర్యంగా మారింది. జిల్లా వ్యాప్తంగా 459 చౌక ధరల దుకాణాలుండగా అన్ని చోట్ల ఈ-పాస్‌ యంత్రాలతో బియ్యం అందిస్తున్నారు. ఈ విధానంలో వేలి ముద్ర వేస్తేనే బియ్యం పంపిణీ చేయడంతో మొదటి నెలలో వేలిముద్రలు పడక, కార్డు ఒక చోట మనుషులు మరో చోట ఉండటంతో చాలామంది సరకులు తీసుకోలేకపోయారు. కార్డుదారుల ఇబ్బందులను దృష్టిలో ఉంచుకొని ప్రభుత్వం ఉన్న చోటనే రేషన్‌ తీసుకోవచ్చని పోర్టబులిటీ విధానాన్ని అమల్లోకి తీసుకొచ్చింది. ముందుగా జిల్లావాసులకే ఈ అవకాశం కల్పించినా ఈ నెల నుంచి రాష్ట్రంలో ఎక్కడైనా రేషన్‌ దుకాణంలో సరకులు తీసుకునేలా సాంకేతిక మార్పులు చేశారు.

మూడు మండలాల్లº అధికంగా..
జిల్లావాసులు వేరే ప్రాంతాల్లో ఉన్న వారితోపాటు ఇతర జిల్లాల నుంచి ఇక్కడకు వలస వచ్చిన వారికి రేషన్‌ సరకులు తీసుకునే వెసులుబాటు లభించింది. ఉపాధి నిమిత్తం పట్టణంలో నివాసం ఏర్పరచుకున్న వారంతా తమ గ్రామాల్లో కార్డును కలిగిన వారంతా నెలనెల అక్కడికి వెళ్లి బియ్యం తెచ్చుకోవాల్సిన పరిస్థితి ఉండేది. ఈ విధానంతో ఆ బాధలు దూరమయ్యాయి. జిల్లాలోని హన్మకొండ, వరంగల్‌, ఖిలావరంగల్‌ మండలాలలో ఈ సేవలు ఎక్కువ మంది వినియోగించుకున్నారు.

రవాణా ఖర్చులు తగ్గాయి
అల్లం రవీందర్‌, కమలాపూర్‌
నేను హైదరాబాద్‌లో సెక్యూరిటీ గార్డ్‌గా పని చేస్తున్నా. నా ఆహార భద్రత కార్డు కమలాపూర్‌లోనే ఉంది. రేషన్‌ బియ్యంపై ఆధారపడి ఉన్న తాము బియ్యం కోసం ప్రతి నెల కమలాపూర్‌కు వెళ్లాల్సి ఉంది. ఇక్కడకు వచ్చి వెళ్లేందుకు ప్రతి నెల రూ.500లకుపైగా ఖర్చు చేయాల్సి వచ్చేది. ఇప్పుడు పోర్టబులిటీ విధానంతో ఎక్కడైన బియ్యం తీసుకునే అవకాశం వచ్చింది. బియ్యం కోసం గ్రామానికి వెళ్లేందుకు ఖర్చుల భారం తగ్గింది.

సమయం కలిసి వచ్చింది
పచ్చిమట్ల కుమారస్వామి
కమలాపూర్‌ మండలం మాధన్నపేటకు చెందిన నేను ఉపాధి కోసం హైదరాబాద్‌లో ఉంటున్నాం. ఆహార భద్రత కార్డు స్వగ్రామంలోనే ఉండడంతో రేషన్‌ బియ్యం కోసం ప్రతి నెల స్వగ్రామానికి వెళ్లాల్సి వచ్చేది. బియ్యం కోసం చేసే విధులకు సెలవు పెట్టి వెళ్లడంతో సమయం వృథా కావడంతోపాటు ఖర్చుల భారం పడేది. పోర్టబులిటీ విధానం అమలు చేయడంతో మేము ఉన్న చోటే బియ్యం తీసుకోగలుగుతున్నాం.

మరిన్ని వార్తలు

జిల్లా వార్తలు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.