close

సోమవారం, డిసెంబర్ 10, 2018

జనరల్

ఆదర్శ కేంద్రాల్లో భారీగా పోలింగ్‌
పెద్దపల్లి, న్యూస్‌టుడే: పోలింగ్‌ కేంద్రాల్లో మెరుగైన సేవలు అందించడంతోపాటు అందంగా తీర్చిదిద్దాలనే ఉద్దేశంతో ఎన్నికల కమిషన్‌ చేపట్టిన ప్రయత్నానికి ఓటర్ల నుంచి సానుకూల స్పందన లభించింది. ఒక్కో నియోజకవర్గానికి ఒక నమునా, ఒక మహిళా పోలింగ్‌ స్టేషన్‌ను ఎన్నికల సంఘం ఏర్పాటు చేసింది. రామగుండం నియోజకవర్గంలో మాత్రం రెండు సఖి(మహిళ) పోలింగ్‌ కేంద్రాలను ఏర్పాటు చేశారు. ఈ కేంద్రాలను అందంగా పూలతో అలంకరించడం, ఓటర్లు సేదతీరేందుకు షామియానాలు ఏర్పాటు చేయడం మొదలు, ఓటర్లకు చల్లని శుద్ధజలాన్ని కూడా అందించారు. పోలింగ్‌ కేంద్రంలో కార్పెట్‌ వేసి, అందమైన స్వాగత తోరణం నిర్మించి ఓటర్లను ఆకర్షించే ప్రయత్నం చేశారు. మున్నుందు ఇలాంటి కేంద్రాలు మరిన్ని ఏర్పాటయ్యే అవకాశముంది.

ఆదర్శ కేంద్రాల్లో పెరిగిన పోలింగ్‌ శాతం
ఎన్నికల సంఘం ఏర్పాటు చేసిన నమూనా పోలింగ్‌ కేంద్రాల్లో పోలింగ్‌ శాతం గణనీయంగానే పెరిగింది. పట్టణ ప్రాంతంలో ఏర్పాటు చేసిన కేంద్రాల కంటే గ్రామాల్లో ఏర్పాటు చేసిన పోలింగ్‌ కేంద్రాల్లోనే బాగా పోలింగ్‌ నమోదయింది. మంథనిలో ఏర్పాటు చేసిన సఖీ పోలింగ్‌ బూత్‌లో 85.04 శాతం, మల్లెపల్లిలో ఏర్పాటు చేసిన నమూనా కేంద్రంలో 88.64 శాతం పోలింగ్‌ నమోదైంది. రామగుండం మండలం పొట్యాలలో ఏర్పాటు చేసిన కేంద్రంలో 77.85 శాతం పోలింగ్‌ జరగగా రామగుండం కార్పొరేషన్‌ పరిధిలోని మేడిపల్లి(ఎన్టీపీసీ) కేంద్రంలో అతితక్కువగా 40 శాతం పోలింగ్‌ నమోదైంది. పెద్దపల్లిలోని బాలికల జడ్పీ ఉన్నత పాఠశాలలో ఏర్పాటు చేసిన నమూనా కేంద్రంలో 66.67 శాతం, వ్యవసాయ మార్కెట్‌లో ఏర్పాటు చేసిన సఖీ పోలింగ్‌ కేంద్రంలో 62.64 శాతం పోలింగ్‌ నమోదైంది. పట్టణప్రాంతాల కంటే గ్రామీణ ప్రాంతాల్లోనే ఎక్కువగా పోలింగ్‌ శాతం నమోదైంది. రాబోయే ఎన్నికల్లో ఇలాంటి కేంద్రాలు సంఖ్య పెరిగితే పోలింగ్‌ శాతం కూడా పెరిగే అవకాశముందనడంలో సందేహం లేదు.

మరిన్ని వార్తలు

తాజా వార్తలు

జిల్లా వార్తలు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.