close

ఆదివారం, సెప్టెంబర్ 23, 2018

జనరల్

రైతుబజారుల్లో పారిశుద్ధ్యం అధ్వానం
రికార్డుల నిర్వహణ సరిగా లేదు
విజిలెన్స్‌ అండ్‌ ఎన్‌ఫోర్స్‌మెంట్‌ ఆకస్మిక తనిఖీ
కడప నేరవార్తలు, వ్యవసాయం (న్యూస్‌టుడే): రైతుల సంక్షేమం కోసం ప్రభుత్వం రైతుబజార్లను ఏర్పాటు చేసింది. కావున రైతులే రైతుబజార్‌లో ఉండాలి. దళారీ వ్యవస్థకు తావు లేదని విజిలెన్స్‌ అండ్‌ ఎన్‌ఫోర్సుమెంట్‌ అదనపు ఎస్పీ నరహరి, డీఎస్పీ రాజశేఖర్‌బాబులు స్పష్టం చేశారు. విజిలెన్స్‌ అండ్‌ ఎన్‌ఫోర్సుమెంట్‌ డీజీ ఉత్తర్వుల మేరకు శనివారం రాష్ట్రవ్యాప్తంగా రైతుబజార్లను తనిఖీ చేశారు. అందులో భాగంగా కడప జడ్పీ వద్ద ఉన్న రైతుబజారును అధికారులు ఆకస్మిక తనిఖీ చేశారు. తనిఖీలో భాగంగా ఒక్కో స్టాల్‌ వద్దకు వెళ్లి కూరగాయలు, ఆకుకూరలు విక్రయిస్తున్న వారి వివరాలను సేకరించారు. వారి గుర్తింపు కార్డులను పరిశీలించారు. ఎంత కాలం నుంచి విక్రయిస్తున్నారనే వివరాలను అడిగి తెలుసుకున్నారు. అక్కడున్న రైతులతో మాట్లాడి వారి సమస్యలను అడిగారు. కొన్ని సమయాల్లో ధరలు తక్కువ వేస్తున్నారని కొంతమంది రైతులు ఆరోపించారు. సరైన గిట్టుబాటు ధరలు లేవన్నారు. అలానే ఎర్రగడ్డలు తూకం వేస్తున్న వ్యక్తి వద్దకు వెళ్లి దగ్గరుండీ తూకం వేయించారు. తూకంలో 130 గ్రాములు వ్యత్యాసాన్ని అధికారులు గుర్తించారు. కుళ్లిన కూరగాయాలను రైతు బజారు ఆవరణలోనే పడేయడంతో దుర్గంధం వస్తోందని రైతులు వాపోయారు. అలానే ప్రజలు కూడా వాసనకు తట్టుకోలేక చాలా మంది రావడం లేదని రైతులు తెలిపారు. అనంతరం ఎస్టేట్‌ అధికారితో మాట్లాడారు.. ఎన్ని స్టాల్స్‌ ఉన్నాయి.. ఎంత మంది ఉన్నారు.. రైతులు కాకుండా ఎవరైన ఉన్నారా..? దళారీ వ్యవస్థ ఉందా..? ధరలు ఎలా నిర్ణయిస్తారనే వివరాలన్నింటినీ తెలుసుకున్నారు. అనంతరం దస్త్రాలను పరిశీలించారు. ఈ సందర్భంగా వారు మాట్లాడుతూ.. రైతులు పండించిన పంటకు గిట్టుబాటు ధర కల్పించాలనే మంచి ఉద్దేశంతో ప్రభుత్వం రైతుజజార్లను ఏర్పాటు చేశారన్నారు. కానీ ఇటీవల కాలంలో రైతుబజారులో దళారీ వ్యవస్థ రాజ్యమేలుతుందనే సమాచారం తమ దృష్టికి రావడంతో తనిఖీలు నిర్వహించామన్నారు. రైతుజజారులో ఉన్న ప్రతి ఒక్కరినీ విచారించామన్నారు. నిజమైన రైతులకే ఇక్కడ స్థానం ఉంటుందన్నారు. లైసెన్స్‌ రెన్యూవల్‌ తదితర అంశాలను పరిశీలించామన్నారు. కాకపోతే పాతమార్కెట్‌, రైతుబజారులో ధరలకు వ్యత్యాసం ఉందన్నారు. ఒక కమిటీ కూర్చుని ధరలను నిర్ణయిస్తారని చెప్పారు. క్షుణ్ణంగా ఒక్కో స్టాల్‌ను పరిశీలిస్తామని తెలిపారు. అనంతరం రైతుబజారును పరిశీలించారు. చెత్తాచెదారం లేకుండా తొలగించాలని ఎస్టేట్‌ అధికారిని ఆదేశించారు. కార్యక్రమంలో సీఐలు నరసింహరావు, లింగప్ప, నాగరాజు, ఎస్సై రంగస్వామి, వ్యవసాయాధికారి సురేషన్‌, వాణిజ్య పన్నుల తనిఖీ అధికారి శివప్రసాద్‌, ఎంపీడీవో ఖాదర్‌బాషా, సిబ్బంది సునీల్‌, హరి,.ప్రసాద్‌, జనార్థన్‌, రాము, నాగేశ్వరరావు, సుదర్శన్‌రెడ్డి, హోంగార్డులు మహేష్‌, భాస్కర్‌లు ఉన్నారు.

విజిలెన్స్‌ తనిఖీల్లో వెల్లడైన వాస్తవాలివి
కడప నేరవార్తలు, న్యూస్‌టుడే: కడప రైతుజజారును శనివారం విజిలెన్స్‌ అండ్‌ ఎన్‌ఫోర్సుమెంట్‌ అధికారులు ఆకస్మిక తనిఖీలు నిర్వహించారు. తనిఖీల్లో భాగంగా అధికారులు పలు లోపాలను గుర్తించారు. రైతులు పండించిన పంటను కొనుగోలు చేసేందుకు రైతుబజార్లకు తీసుకొస్తారు, విక్రయించిన కూరగాయలు, ఆకుకూరలు పోను మిగిలిన వాటిని దాచుకునేందుకు శీతలీకరణ కేంద్రాలు లేకపోవడం వల్ల కూరగాయాలు, ఆకుకూరలు చెడిపోతున్నాయి, కావున రైతుబజారులో శీతలీకరణ కేంద్రాలను ఏర్పాటు చేయాలని ప్రతిపాదనలు పంపారు. పారిశుద్ధ్యం అధ్వానంగా ఉంది. ఆరు కిరాణా దుకాణాల్లో ఒక్కరికే అనుమతి ఉంది. మిగిలిన వారికి అనుమతులు లేవు. స్టాల్స్‌ నంబర్లు నిర్వహణ సక్రమంగా లేదు. దస్త్రాల నిర్వహణ సరిగా లేదన్నారు. రైతులకు గిట్టుబాటు ధరలు కల్పించడం లేదనే లోపాలను అధికారులు గుర్తించారు.

మరిన్ని వార్తలు

జిల్లా వార్తలు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.