close

సోమవారం, డిసెంబర్ 10, 2018

జనరల్

పల్లెలకు వెలుగులేవీ
రూ.32  కోట్ల నష్టాల్లో జిల్లా
      ఆర్టీసీ కార్మికులపై   అదనపు    పనిభారం
కలగా మారిన కడప డిపో-2
బస్సు బాడీ బిల్డింగ్‌-టైర్ల పరిశ్రమ
నేడు ఆర్టీసీ ఎండీ  సురేంద్రబాబు రాక
జిల్లాలో ఆర్టీసీ సేవలు సామాన్యులకు   గగనంగా మారుతున్నాయి. అక్రమ రవాణా ఫలితంగా పల్లె ప్రయాణికులకు సేవలను సంస్థ కుదిస్తోంది. దీంతో ఏళ్ల తరబడి సేవలు పొందిన వివిధ గ్రామాల ప్రజలు ఇబ్బందులు ఎదుర్కొంటున్నారు. ఆర్టీసీ ఎండీ సురేంద్రబాబు సోమవారం  రానున్న సందర్భంగా జిల్లాలో ఆ సంస్థ సేవలు పరిశీలిస్తే..

చిన్నచౌకు (కడప), న్యూస్‌టుడే: నిత్యం 3.27 లక్షల కిలోమీటర్లు తిరుగుతూ.. 4.5 లక్షల మందిని గమ్యస్థానాలు చేర్చుతున్న ఆర్టీసీ నష్టాల బాటలోనే పయనిస్తోంది. ఎంతో మంది ఎండీలు వచ్చివెళ్తున్నా సంస్థను లాభాల బాటలోకి మాత్రం తీసుకెళ్లలేకపోతున్నారు. జిల్లా వ్యాప్తంగా 290 మార్గాల్లో బస్సులు రాకపోకలు సాగిస్తున్నాయి.

గ్రామీణ ప్రాంతాలను మరచిన..
ఒకప్పుడు ఆర్టీసీ బస్సు కోసం ప్రజలు ఎదురు చూసేవారు.. ప్రస్తుతం ప్రయాణికుల కోసం ఆర్టీసీ ఎదురు చూసే పరిస్థితులు నెలకొన్నాయి. జిల్లాలో ఇప్పటికి 70 గ్రామాలకు బస్సులే వెళ్లడం లేదు. ఆయా గ్రామాలకు రోడ్డు సౌకర్యం లేకపోవడమే దీనికి కారణమని అధికారులు చెబుతున్నారు. రోడ్డు నిర్మిస్తే బస్సు సర్వీసులను తిప్పుతామని ఆర్టీసీ అధికారులు పేర్కొంటున్నారు. ఇదే అదనుగా భావించి ప్రైవేటు వాహనదారులు గ్రామీణ ప్రాంతాల్లోకి చొచ్చుకెళుతున్నారు. దీంతో సంస్థ నష్టాల్లోకి వెళుతోంది. కడప నుంచి పెండ్లిమర్రి, భాకరాపేట, రామాపురం, చెన్నూరు తదితర ప్రాంతాలకు ఆటోలు, సెవెన్‌సీటర్‌ ఆటోలు విచ్చలవిడిగా రాకపోకలు సాగిస్తున్నాయి. కడప పాతబస్టాండులోకి ఆటోలు వచ్చి ప్రయాణికులను ఎక్కించుకుని వెళ్తున్నా ఏమి చేయలేని నిస్సహాయస్థితిలో అధికారులున్నారు. పూర్తిగా గ్రామీణ ప్రాంతాలకు బస్సు సర్వీసులు వెళ్లడం మరచిపోయాయి. దీంతో ప్రైవేటు వాహనాలు గ్రామీణ ప్రాంతాలను ప్రైవేటు వాహనచోదకులు ఆక్రమించారు.

రోజుకు లక్షల్లో నష్టం..
జిల్లాలో అక్రమ రవాణా వల్ల సుమారు రూ.40 లక్షల వరకు నష్టం వాటిల్లుతుంది. జిల్లా కేంద్రం నుంచి ప్రతి రోజు హైదరాబాదు, విజయవాడ, బెంగళూరు, తిరుపతి ప్రాంతాలకు ప్రైవేటు బస్సులు వెళ్తున్నాయి. ఇవీ కాక జిల్లా వ్యాప్తంగా ఆటోలు, సెవెన్‌సీటర్‌ ఆటో, జీపులు, తదితర వాహనాలు తిరుగుతున్నాయి. కడప నుంచి రాజంపేట, రాయచోటి, వేంపల్లె, కమలాపురం, ఖాజీపేట, ప్రాంతాలకు భారీ సంఖ్యలో ప్రైవేటు వాహనాలు వెళ్తున్నాయి. దీంతో ఆర్టీసీ బస్సుల్లో ఎక్కాల్సిన ప్రయాణికులు ప్రైవేటు వాహనాల వైపు మొగ్గు చూపుతున్నారు.

రూ.32 కోట్ల నష్టాల్లో ఆర్టీసీ..
జిల్లా ఆర్టీసీ రూ.32 కోట్ల నష్టాల్లో నడుస్తోంది. కడప, ప్రొద్దుటూరు,.రాజంపేట, రాయచోటి, మైదుకూరు, బద్వేలు, జమ్మలమడుగు, పులివెందుల డిపోలన్నీ కోట్ల రూపాయల నష్టాల్లో ఉన్నాయి. ఇంధనం, విడిభాగాల ధరల పెరుగుదల ఆర్టీసీని నష్టాల్లోకి నెడుతున్నాయి. ఈ ఏడాది ఏప్రిల్‌ నుంచి నవంబరు వరకు ఇంధన పెరుగుదల వల్ల ఆర్టీసీకి రూ.12 కోట్ల అదనపు భారం పడింది. ఇటీవల ఆర్టీసీ ప్రమాదాలు సంఖ్య కాస్త పెరిగాయి.

కిలోమీటర్లు పూర్తైనప్పటికీ..
జిల్లాలో సుమారు ఆర్టీసీ, అద్దె బస్సులన్నీ కలుపుకుని సుమారు 900 వరకు ఉన్నాయి. వీటిల్లో కొన్ని బస్సులకు కిలోమీటరు పూర్తి అయ్యాయి. వాటిని అలానే తిప్పుతున్నారు. దీని వల్ల బస్సులు మార్గమధ్యలోనే మొరాయిస్తున్నాయి. వాటి స్థానంలో కొత్త బస్సులను తెప్పించాలి.

కార్మికులపై అదనపు పనిభారం
జిల్లావ్యాప్తంగా ఆర్టీసీ కార్మికులపై అదనపు భారం మోపుతున్నారు. ఇప్పటికీ చెన్నై, బెంగళూరుకు వెళ్లే బస్సులకు ఒకే ఒక డ్రైవరు ఉంటున్నారు. ఒకే డ్రైవర్‌ వెళ్లి తిరిగి అతనే మళ్లీ రావాలి. దీంతో విశ్రాంతి కరవుతుంది. డబల్‌ డ్యూటీలు చేయించుకుంటున్నారు. విశ్రాంతి లేకపోవడంతో కార్మికులు అనారోగ్యాలకు గురై విధుల్లోనే మృతి చెందుతున్నారు. ఇటీవల ప్రొద్దుటూరు డిపోకు చెందిన కండక్టరు బస్సులోనే గుండెపోటుతో మృతి చెందాడు. అదనపు భారాన్ని తగ్గించి, అవసరమైనంత మంది ఉద్యోగులను నియమించాల్సిన అవసరం ఉంది.

కలగా మారిన డిపో-2
కడపకు డిపో-2 కలగా మారింది. ఎప్పటి నుంచో ఈ ప్రతిపాదన ఉంది. అయినా ఇప్పటి వరకు అమలుకు నోచుకోలేదు. పక్క జిల్లాలైన చిత్తూరు, కర్నూలులో రెండో డిపోలున్నాయి. కడపకు మాత్రం లేదు. 110 బస్సు సర్వీసులు దాటితే రెండో డిపో ఏర్పాటు చేయాలనే నిబంధన ఉంది. కడప డిపోలో 150 బస్సులున్నాయి.

9 ఏళ్ల నుంచి ఎదురు చూపులు
రాష్ట్రవ్యాప్తంగా 9 ఏళ్ల కిందట కొన్ని వందల మందిని కాంట్రాక్టు పద్ధతిపై విధుల్లోకి తీసుకున్నారు. వారిలో కొంతమంది సేవలను క్రమబద్ధీకరించారు. ఇంకా చాలా మంది మిగిలిపోయారు. జిల్లాలో 120 మందికి కాంట్రాక్టు పద్ధతిపై తీసుకున్నారు, వారిని ఇప్పటి వరకు విధుల్లోకి తీసుకోలేదు. రెగ్యులర్‌ కానీ వారు ఇంకా 90 మంది ఉన్నారు. వీరందరు ఆర్టీసీలో ఉద్యోగాల కోసం ఎదురు చూస్తున్నారు.

30 పడకల ఆసుపత్రి ఏదీ
రాష్ట్రంలోనే కడప జిల్లా ఆర్టీసీ ఆసుపత్రికి ప్రత్యేకమైన గుర్తింపు ఉంది. చిన్నపాటి శస్త్ర చికిత్సలను ఇక్కడున్న వైద్యులే చేస్తున్నారు. పెద్ద శస్త్ర చికిత్సలుంటేనే విజయవాడకు పంపిస్తున్నారు. దీంతో కడప ఆర్టీసీ ఆసుపత్రి అంటే రాష్ట్ర స్థాయి అధికారులకు గుర్తింపు ఉంది. కాకపోతే ఎప్పటి నుంచి 30 పడకల ఆసుపత్రిగా మార్చుతామని చెపుతున్నారు. ఇప్పటి వరకు అమలు కాలేదు. రోజుకు సుమారు 150 మందికి పైగా ఆసుపత్రికి వచ్చి చూపించుకుని వెళ్తున్నారు.

బస్సు బాడీ బిల్డింగ్‌
ఏపీ సమైక్యంగా ఉన్నప్పుడు మియాపూర్‌లో బస్సు బాడీ బిల్డింగ్‌ ఉండేది. రాష్ట్రం విడిపోయిన తరువాత తెలంగాణ  రాష్ట్రానికి వెళ్లిపోయింది. ప్రస్తుతానికి ఏపీలో బస్సు బాడీ బిల్డింగ్‌ లేదు. కడప ఆర్టీసీ జోనల్‌ వర్కుషాపు బస్సుబాడీబిల్డింగ్‌కు అనుకూలంగా ఉంది. అవసరమైనంత స్థలం ఉంది. పైగా అన్ని జిల్లాలకు మధ్యలో ఉంది. అలానే టైర్ల పరిశ్రమ ఇప్పటి వరకు లేదు. ఆర్టీసీ వారు బయట కొనుగోలు చేస్తున్నారు. టైర్ల పరిశ్రమను ఏర్పాటు చేస్తే బాగుంటుంది.

మరిన్ని వార్తలు

తాజా వార్తలు

జిల్లా వార్తలు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.