close

సోమవారం, డిసెంబర్ 10, 2018

జనరల్

మారుమూల గ్రామం.. ఓటింగ్‌లో అధికం
120 కేంద్రాల్లో 90శాతానికి పైగా పోలింగ్‌
షాద్‌నగర్‌లో నియోజకవర్గం గ్రామాల్లో కొత్త ఒరవడి
షాద్‌నగర్‌, న్యూస్‌టుడే
ఎంతో చైతన్యం ఉందనుకునే పట్టణాలు.. విద్యావంతులు, మేధావులతో నిండిన నగరాల్లో పోలింగ్‌ శాతం 50ను మించడం లేదు. షాద్‌నగర్‌కు సమీపంలో ఉన్న హైదరాబాద్‌ మహానగరాన్నే తీసుకుంటే 48.89శాతమే నమోదైంది. అక్షరాస్యత శాతం తక్కువగా ఉండే గ్రామాలు, వలసకూలీలుగా జీవనం సాగిస్తున్న గిరిజనులు ఉండే షాద్‌నగర్‌ నియోజకవర్గం ఓటింగ్‌ శాతంలో చైతన్యాన్ని చాటింది. 90శాతానికిపైగా పోలింగ్‌ నమోదైన కేంద్రాలు 120 ఉండటం విశేషం.

ఫరూక్‌నగర్‌ మండలంలో ఓ మారుమూల గ్రామం వెంకన్నగూడ. ఇక్కడ అత్యధికులు నిరక్షరాస్యులే. 568 మంది ఓటర్లలో 493 మంది తమ ఓటు హక్కును వినియోగించుకున్నారు. తమ చైతన్యాన్ని చూపించారు. ఇదే రీతిలో ఏనుగు మడుగుతండాలో 96.58శాతం, భైర్‌ఖాన్‌పల్లిలో 96.52శాతం, శేరిగూడలో 96.48శాతం, సిద్దాపూర్‌లో 96.41 శాతం ఓట్లు పోలయ్యాయి. 61 కేంద్రాలలో 90 నుంచి 96 శాతం ఓట్లు పోలయ్యాయి. కొత్తూరు మండలంలో ఒక్క మండల కేంద్రాన్ని మినహాయిస్తే 9చోట్ల 90 శాతానికి మించి ఓట్లు నమోదు కావడం అక్కడి ఓటరు చైతన్యానికి నిలువెత్తు నిదర్శనంగా కనిపిస్తోంది. మరో 30 కేంద్రాలలో 80 నుంచి 90 మధ్య ఓట్ల శాతం నమోదైంది. 243 కేంద్రాలలో 6 కేంద్రాలను మినహాయిస్తే మిగితా అన్ని చోట్లా 70 శాతాన్ని ఓటర్లు దాటి చూపించారు. ముఖ్యంగా మారుమూల తండాలు, గ్రామాలలో  ఓటర్లు ఉత్సాహంగా ముందుకు వచ్చి తమ ఓటు హక్కును వినియోగించుకున్నారు. కొత్తగా ఓటు వేసే యువకులు ఈసారి ఎక్కువగా ఆసక్తిని కనబరచడంతో గతంలో ఎన్నడూ లేని విధంగా ఓట్లు నమోదయ్యాయి. దీనిపై అభ్యర్థుల్లో సంతృప్తి వ్యక్తమవుతోంది. అయితే.. ఇంతా భారీగా నమోదైన పోలింగ్‌ శాతం ఎవరికి లాభిస్తుందనేది ఆసక్తికరంగా మారింది.

పట్టణంలోనే కాస్త తక్కువ
షాద్‌నగర్‌ నియోజకవర్గంలో 243 పోలింగ్‌ కేంద్రాల్లో ఎక్కడా ఓటింగ్‌ 60శాతం కంటే తక్కువ కాలేదు. కేవలం ఒక్క కొందుర్గు మండల పరిధిలోని పెద్దఎల్కిచర్లలోని 84వ పోలింగ్‌ కేంద్రంలో 297 మంది ఓటర్లు ఉన్నారు. ఇక్కడ 60.34శాతం మాత్రమే ఓట్లు పోలయ్యాయి. గ్రామాల విషయంలో ఇదొక్కచోటే ఈ పరిస్థితి. ఇక షాద్‌నగర్‌ పురపాలిక విషయానికి వస్తే ఇక్కడి పోలింగ్‌ కేంద్రాల్లోనే తక్కువ శాతం పోలింగ్‌ జరిగింది. పట్టణ వాసులే తమ ఓటు హక్కుకు దూరంగా ఉన్నారు. పట్టణంలోని 218, 239, 224, 231, 240, 238, 229, 237, 233 పోలింగ్‌ కేంద్రాలలో 61 నుంచి 71.09 శాతం మాత్రమే ఓట్లు పోలయ్యాయి. మొత్తానికి గ్రామీణులు, తండావాసులు మాత్రమే తమ ఓటుహక్కును చైతన్యవంతంగా వినియోగించుకున్నట్లు అర్థమవుతోంది. కొత్తగా నమోదు చేసుకున్నవారికి పూర్తిస్థాయిలో అవకాశం రాకపోవడం, ఓటరు జాబితాలో పేర్లు గల్లంతు కావడం వంటివి చోటు చేసుకోకుండా ఉండి ఉంటే షాద్‌నగర్‌ నియోజకవర్గం 90 శాతం మార్కును చేరుకొని ఉండేది.

మరిన్ని వార్తలు

తాజా వార్తలు

జిల్లా వార్తలు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Terms & Conditions   |    Privacy Policy

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.