close

మంగళవారం, ఏప్రిల్ 24, 2018

జనరల్

ఆలోచన ఘనం.. ఉబికిన జలం
జేఎన్‌టీయూలో కుంట తవ్వి వృథా నీరు మళ్లింపు
పెరిగిన భూగర్భజలాలు
న్యూస్‌టుడే- జేఎన్‌టీయూ
ఒక చిన్న ఆలోచన విద్యాలయంలో నీటి సమస్యకు చరమగీతం పాడింది. వేసవిలోనూ పాతాళగంగ ఉబికి వస్తోంది. ఇదెక్కడో కాదండి మన అనంతపురం జేఎన్‌టీయూలో. ఇక్కడ వసతి గృహాల్లోని నీరు రహదారులపై పారేది. ఆ ప్రాంతంలోని ప్రజలు పలుమార్లు కలెక్టరుకు ఫిర్యాదు చేశారు. విద్యాలయం కావడంతో ఎవరూ ఏమి అనలేని పరిస్థితి. మన వల్ల మరొకరు ఇబ్బంది పడకూడదనే ఉద్దేశంతోపాటు వర్సిటిలో నీటి ఎద్దడిని నివారించాలని విద్యాలయం ఇంజినీరింగ్‌ విభాగం అధికారులు తలిచారు. విద్యాలయంలో పెద్ద కుంటను తవ్వించారు. వృథా నీటితోపాటు వాడుక నీటిని అందులోకి మళ్లించారు.

నిండు కుంట!
వర్సిటీలోని ఆడిటోరియం సమీపంలో కుంటను ఏర్పాటు చేశారు. వసతి గృహాల్లోని వాడుక నీరు, వర్షంనీరు, ఇతర భవనాల నుంచి వచ్చే నీరంతా ఆ కుంటలోకి చేరుతుంది. ఫలితంగా చుట్టుపక్కల భూగర్భ జలాలు పెరిగాయి. వేసవిలో సైతం కుంట నీటితో కళకళలాడుతోంది.

బోర్లలో పుష్కలంగా జలం
గత సంవత్సరం వర్సిటీకి తీవ్రమైన నీటి ఎద్దడి ఏర్పడింది. ఈ క్రమంలో నీటి కుంట సమీపంలో బోరు ఏర్పాటు చేశారు. అక్కడ మూడు ఇంచుల నీరు పడింది. మరో బోరు వసతి గృహాల సమీపంలో తవ్వారు. అందులోనూ పుష్కలంగా జలం పడింది.

అందుతున్న ఫలాలు
అనంతపురం జేఎన్‌టీయూలో విద్యార్థులు, ఇతర విభాగాలు, పరిపాలనా భవనం అవసరాలకు సరిపడా నీరు లభ్యం కాలేదు. బోర్లలోని నీటిని మొక్కలకు పెట్టడమే కాకుండా ఇతర అవసరాలకు వినియోగించుకున్నారు. కుంట తవ్వడంతో రెండేళ్లుగా ఫలాలను పొందుతున్నారు. ఏవిధమైన ఖర్చు లేకుండానే పాతాళగంగ పైకి వస్తోంది. నగరాల్లో పెద్ద పెద్ద అపార్టుమెంట్లలోని వృథా నీటిని అరికడితే నీటి సమస్యకు అడ్డుకట్ట వేయవచ్చని శాస్త్రవేత్తలు సూచిస్తున్నారు. బోరు తవ్వడం కంటే ఉన్న నీరు ఇంకింపజేస్తే భవిష్యత్తులో ఏవిధమైన కష్టం ఉండదనడానికి నిదర్శనం జేఎన్‌టీయూలో తవ్విన నీటి కుంటే.

గుంత తవ్వుకోడానికి రూ.3 వేలు
రాయదుర్గం, న్యూస్‌టుడే : రాయదుర్గం నియోజకవర్గంలో భూగర్భ జలాల పెంపునకు 1,045 ఇంకుడు గుంతలు నిర్మించేందుకు ప్రభుత్వానికి ప్రతిపాదనలు పంపినట్లు డ్వామా ఏపీడీ పరంధామ తెలిపారు. ఆదివారం రాయదుర్గంలో ఆయన ‘న్యూస్‌టుడే’తో మాట్లాడారు. రాయదుర్గం మండలంలో 384, బొమ్మనహాళ్‌ మండలంలో 150, గుమ్మఘట్టలో 300, కణేకల్లులో 90, డి.హీరేహాళ్‌లో 150 ఇంకుడు గుంతలు నిర్మించేందుకు ప్రతిపాదనలు పంపామని ఉత్తర్వులు రాగానే నిర్మాణాల ప్రారంభిస్తామని చెప్పారు. గతంలో ఒక్కో ఇంకుడు గుంత నిర్మాణానికి రూ. వేయి మంజూరయ్యేదని, ప్రస్తుతం రూ.3 వేలు ఇవ్వనున్నారు. ఇంకుడు గుంత కనీసం లోతు, వెడల్పు, పొడవు ఒక మీటరు ఉండాలన్నారు.

మరిన్ని వార్తలు

జిల్లా వార్తలు

© 1999- 2018 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.